MAYSA nga agtutubo idiay Japan ti natignay gapu iti kinamanangngaasi ti nataengan a misionero. Daytoy a misionero ket di unay makapagsao iti lenguahe dagiti Hapon gapu ta nabiit pay ditoy a pagilian. Ngem linawas a bumisita iti pagtaengan ti agtutubo tapno iyadalanna iti Biblia. Siaanus a sungbatan daytoy mannakigayyem ken naasi a misionero ti adu a saludsod ti agtutubo nga iyad-adalanna.

Kanayon a malaglagip ti agtutubo ti kinaasi ti misionero. ‘No mapagbalin ti Biblia a nakaan-anus ken naayat ti maysa a tao,’ kuna ti agtutubo, ‘masapul ngarud nga adalek dayta.’ Gapu iti dayta, naparegta a mangadal iti banag a karkarna unay kenkuana. Wen, nabilbileg ti kinamanangngaasi ngem iti sasao a mangtignay iti puso.

Gagangay laeng ti agbalin a naasi kadagidiay nasinged kadatayo, ta ti kinamanangngaasi kaipapananna ti panangipateg gapu iti panagkabagian. Ngem kinapudnona, galad ti Dios ti kinamanangngaasi. Kinuna ni Jesus a ti nailangitan nga Amana ket naasi saan laeng a kadagiti mangay-ayat Kenkuana no di ket uray “kadagiti awanan panagyaman.” Dayta a galad ti Dios ti imparegta ni Jesus a tuladen dagiti pasurotna idi kinunana: “Agbalinkayo a perpekto, a kas iti nailangitan nga Amayo a perpekto.”​—Lucas 6:35; Mateo 5:48; Exodo 34:6.

Tangay naparsua ti tao iti ladawan ti Dios, mayanninawtayo ngarud ti galad a kinamanangngaasi. (Genesis 1:27) Wen, kabaelantayo a tuladen ti Dios ken agbalin a naasi uray kadagidiay saantayo a kabagian. Iti Biblia, nadeskribir ti kinamanangngaasi kas paset ti makaay-ayo a bunga ti nasantuan nga espiritu wenno aktibo a puersa ti Dios. (Galacia 5:22) Gapuna, in-inut a masursuro ti maysa a tao ti agbalin a naasi bayat nga umad-adu ti ammona maipapan iti Dios a Namarsua, ken bayat a sumingsinged kenkuana.

Yantangay ti kinamanangngaasi ket naisigud a galad ti tao ken nagpateg iti Dios, nainkalintegan ngarud nga ibaga ti Dios kadatayo nga “agbalinkayo a manangngaasi iti maysa ken maysa.” (Efeso 4:32) Naiparegta met kadatayo: “Dikay lipatan ti kinamanagpadagus,” wenno panangngaasi kadagiti estranghero.​—Hebreo 13:2.

Iti kaaldawantayo a gagangayen ti kinaawan asi ken kinaawan panagyaman, posible kadi ti agbalin a naasi uray kadagiti estranghero? Ania ti makatulong kadatayo? Kinapudnona, apay a rumbeng nga agbalintayo a naasi?

Kalpasan a dinakamat ni apostol Pablo ti maipapan iti panangipakita iti kinamanangngaasi kadagiti estranghero, kinunana: “Babaen iti dayta ti dadduma, saanda a pagaammo, nangsangailida kadagiti anghel.” Ania ngata ti riknam no adda gundawaymo a mangsangaili kadagiti anghel? Ngem siputam ta kinuna ni Pablo a “saanda a pagaammo.” Kayatna a sawen, mabalin a di ninamnama a magunggonaantayo no ugalitayo ti agbalin a naasi iti sabsabali, agraman kadagiti estranghero.

Kaaduan a bersion ti Biblia nga addaan kadagiti cross-reference inaigna ti sasao ni Pablo iti salaysay maipapan kada Abraham ken Lot iti Genesis kapitulo 18 ken 19. Mabasatayo kadagita a teksto ti maipapan kadagiti anghel  a nagparang kas estranghero nga addaan napateg a mensahe. Ti mensahe ken Abraham ket maipapan iti panangtungpal ti Dios iti karina a maaddaan iti anak. Ti mensahe ken Lot ket maipapan iti pannakaispalna iti pannakadadael ti siudad ti Sodoma ken Gomorra.​—Genesis 18:1-10; 19:1-3, 15-17.

No basaem dagiti nadakamat a teksto, maammuam a nangipakita da Lot ken Abraham iti kinamanangngaasi kadagiti estranghero a napan iti lugarda. Siempre, idi tiempo ti Biblia, kaugalian ken obligasion ti panangpadagus kadagiti agdaldaliasat a gagayyem, kabagian, wenno estranghero. Kinapudnona, kalikaguman ti Mosaiko a Linteg a dagiti Israelita tulonganda dagiti ganggannaet iti dagada. (Deuteronomio 10:17-19) Nupay kasta, naisangsangayan ti impakita da Abraham ken Lot a kinamanangngaasi kadagiti estranghero ta nalablabes pay ngem iti impaannurot ti linteg idi agangay. Gapu iti inaramidda, agpada a nabendisionanda.

Gapu iti kinamanangngaasi ni Abraham, isu ket nabendisionan iti anak a pakagunggonaantayo met. Kasano? Adda napateg a paset da Abraham ken ti anakna a ni Isaac iti kaitungpalan ti panggep ti Dios. Nagbalinda a kangrunaan a pagtaudan ti kapuonan ti Mesias a ni Jesus. Ti kinamatalekda ipakitana no kasano nga isalakan ti Dios ti tao babaen ti ayat ken di kaikarian a kinamanangngaasina.​—Genesis 22:1-18; Mateo 1:1, 2; Juan 3:16.

Nalawag nga ipasimudaag dagita a salaysay no ania ti namnamaen ti Dios kadagiti tattao nga anamonganna ken no kasano kauneg ti panangipategna iti galad a kinamanangngaasi. Rumbeng nga agbalintayo a naasi ta napateg dayta iti Dios.

Kunaen ti Biblia nga iti kaaldawantayo adu ti “saan a managyaman, saan a nasungdo, awanan nainkasigudan a panagayat.” (2 Timoteo 3:1-3) Inaldaw a makalanglangenyo dagita a tattao. Ngem saan a dayta ti manglapped kadatayo a mangipakita iti kinamanangngaasi iti sabsabali. Napalagipan dagiti Kristiano: “Dikay subadan ti dakes iti dakes iti asinoman. Mangipaaykayo iti nasayaat a bambanag iti imatang ti amin a tattao.”​—Roma 12:17.

Ikagumaantayo ti agbalin a naparabur ken naasi ta kuna ti Biblia: “Tunggal maysa nga agayat . . . magun-odanna ti pannakaammo iti Dios.” Maipakitatayo ti ayat babaen ti panagbalin a naasi. (1 Juan 4:7; 1 Corinto 13:4) Wen, no naasitayo, maam-ammotayo a naimbag ti Dios, ket dayta ti mangparagsak pay kadatayo. Kinuna ni Jesus iti Sermonna iti Bantay: “Naragsak dagiti naasi, yantangay maipakitaandanto iti asi. Naragsak dagiti nasin-aw ti pusoda, yantangay makitadanto ti Dios.”​—Mateo 5:7, 8.

 Alaentayo a pagarigan ti Haponesa a ni Aki nga addaan dua nga annak. Idi kellaat a natay ni nanangna, napalalo ti leddaangna nga uray la a masapul nga agpadoktor no kasdiay a madmadi ti riknana. Idi kuan, adda pamilia nga immakar iti lugarda. Nabiit pay a nabalo ti asawa a babai nga addaan lima nga annak ta natay ti asawa a lalaki gapu iti aksidente. Maasian unay ni Aki isu a ginayyemna ti ina ken dagiti annakna. Inkagumaanna a tulongan ti pamilia babaen ti panangtedna iti taraon, kawes a saandan nga us-usaren ken dadduma pay. Kas resultana, simmayaat ti rikna ni Aki. Agpayso kenkuana ti kuna ti Biblia nga: “Ad-adu ti kinaragsak iti panangted ngem iti panangawat.” (Aramid 20:35) Wen, ti panagbalin a naasi ti kasayaatan a maaramidmo no malidlidayka.

Saan a masapul nga aggastoka iti dakkel tapno maipakitam ti asi. Saan met nga agdepende dayta iti abilidad wenno pigsa. Dakkel ti maaramidan ti isem, naasi a sasao, panangtulong, simple a naimpusuan a sagut, ken uray ti panagbalin a napabus-oy wenno paunaentayo iti pila dagiti nakapuy a sumarsaruno kadatayo. No dimo ammo ti ibagam ken aramidem iti maysa a situasion, ipakitam laeng ti kinamanangngaasi. Kasta unay ti pannakatignay ti agtutubo a nadakamat iti rugi daytoy nga artikulo gapu iti asi nga impakita ti nataengan a misionero. Ipakita dayta a kapadasan nga ad-adu ti maaramidan ti tignay ngem iti sasao. Di ngarud pakasdaawan a ti “panangayat iti kinamanangngaasi” ti maysa kadagiti kalikaguman ti Dios kadagiti adipenna!​—Mikias 6:8.

Kas tay kunadan, ti naasi a sao paluknengenna ti pamulinawen a puso. Ipakita dagita a sasao a dakkel ti maaramidan ti bassit a kinamanangngaasi. No naaramid dayta nga addaan umiso a motibo, ken nangruna no nabuyogan iti panagayat iti Dios, paragsakenna dagidiay naipakitaan iti dayta. Uray no saan a naapresiar ti impakitam a kinamanangngaasi, saan a nasayang dayta. Napateg dayta iti Dios. Ipasigurado ti Biblia a no naasitayo iti sabsabali gapu iti panagayattayo iti Dios, kayariganna nga ‘agpapautangtayo ken Jehova.’ (Proverbio 19:17) Apay a dika mangbirok iti pamay-an tapno maipakitam ti kinamanangngaasi iti sabsabali?