Ammok Itan ti Dios a Pagdaydayawak
Bimmisita ti maysa nga ebanghelisador ti Pentecostal nga agkunkuna nga adda pannakabalinna a mangagas. Idi sinagidnak, naawananak iti puot, “nalugananak iti espiritu.” Idi nakapuotakon, kasla nagun-odkon ti kayatko—ti pannakabalinko a mangagas. Apay a napadasak daytoy ken ania ti epekto dayta iti biagko? Sakbay nga estoriaek dayta, bay-anyo nga ilawlawagko ti napalabasko.
NAIPASNGAYAK idi Disiembre 10, 1968 idiay Ilocos Norte, Pilipinas. Maikapitoak kadagiti sangapulo nga annak. Kas iti kaaduan a Filipino, napadakkelkami a Katoliko. Nagraduarak iti haiskul idi 1986, ket ambisionko ti agbalin a nars. Ngem saan a natungpal ti arapaapko gapu ta nagsakitak. Impagarupko pay ketdi a matayakon. Nupay naupayak, inkararagko a no maimbaganak, agserbiakon iti Dios bayat a sibibiagak.
Kalpasan ti napaut a panagpaimbagko, nalagipko ti karik iti Dios. Isu nga idi Hunio 1991, nagenrolak iti Pentecostal Bible school. Karaman iti adalenmi ti pananggun-od “iti awanan bayad a sagut ti nasantuan nga espiritu.” Kayatko ti maaddaan iti pannakabalin a mangagas. Naisuro kadakami a magun-odan dayta babaen ti panagayuno ken panagkararag. Naminsan, tapno agpammarangak a nagun-odkon ti “sagut,” sililimed a dimngegak iti maysa a kaklasek nga agkarkararag iti napigsa iti maysa a suli bayat ti panawen ti panagkararag. Idi dandanin malpas, dagus a nagsubliak iti lugar a nagparintumengak. Kalpasanna, imbagak kenkuana ti amin nga inkararagna, ket namati nga addaanakon iti “awanan bayad a sagut”!
Bayat ti panagadalko, adu dagiti saludsodko. Kas pagarigan, dakamaten ti Mateo 6:9 ti “Ama” ken ti “naganna.” Pampanunotek no “Asino ti Ama nga inawagan ni Jesus?” ken “Makinnagan ti masapul a masantipikar?” Masansan a saan a nalawag ken saan a makapnek ti sungbat dagiti mangisursuro. Isursuroda ti maipapan iti Trinidad ken ibagada a misterio, ngem para kaniak makariro dayta. Nupay kasta, intultuloyko latta ti nagadal a kas pastora.
Ti Pagarupko Kadagiti Saksi ni Jehova
Iti Bible school, naisuro kadakami a dagiti Saksi ni Jehova ti kadadaksan nga ulbod a relihion. Tinukoyda pay ida kas antikristo. Gapu iti dayta, kagurak dagiti Saksi ni Jehova.
Bayat ti bakasion iti maikadua a tawen ti panagadalko, nagawidak iti balaymi tapno sarungkarak dagiti nagannakmi. Nadamag ni manangko a Carmen a nagawidak isu a simmarungkar met. Maysa idin a bautisado ken amin-tiempo a ministro dagiti Saksi ni Jehova. Idi kayatnak a kasabaan maipapan iti Dios, nakaungetak ket kinunak: “Ammok ti Dios a pagserserbiak!” Kalpasan ti panangbugkawko kenkuana, induronko ken diakon inikkan iti gundaway nga agsao.
Idi nagsubliakon idiay Bible school, pinatulodannak ni Manang Carmen iti broshur a Rumbeng Aya a Patienyo ti Trinidad? * Dagus a kinunes sa impuorko ta makapungtotak pay laeng kenkuana.
Panagbalin a Pastora
Idi nagraduarak a kas pastora
Bayat ti panagadalko iti Bible school, adda dagiti napasurotko. Ipagpannakkelko unay idi nagbalin met a Pestecostal ni Nanang ken ni manongko.
Idi Marso 1994, nagraduarak iti Pentecostal Bible school. Kas naibaga iti rugi, adda idi bumisbisita nga ebanghelisador. Kayatmi amin ti makikadua kenkuana gapu ta mamatikami nga addaan iti sagut a panagagas. Kinaduami iti entablado, nga aglalagto ken agpapalakpakkami a maibuyog iti banda. Kalpasanna, tunggal maysa a sagidenna matumba, “naluganan iti espiritu.” * Idi sinagidnak, natumbaak met ken naawan ti puotko. Idi nagsublin ti puotko, mabutengak, ngem panagriknak adda pannakabalinkon a mangagas, isu a maragragsakanak.
Idi agangay, inusarko daytoy a pannakabalin a mangpaimbag iti ubing a nangato ti gurigorna. Idi nagkararagak, dagus a nagkalimduosan ti ubing ket awanen ti gurigorna. Kamaudiananna, matungpalko met laengen ti karik iti Dios. Ngem nakaskasdaaw ta mariknak a kasla adda kurang. Patiek nga adda laeng maymaysa a Dios, ngem diak ammo no asino. Pagduaduaak ti adu a doktrina ti relihionmi.
Inusarko daytoy a pannakabalin a nangpaimbag iti ubing a nangato ti gurigorna
Bambanag a Nangbalbaliw iti Panagpampanunotko
Kalpasan dagita a pasamak, kimmaro pay ti rurodko kadagiti Saksi ni Jehova. No adda masarakak a publikasion dagiti Saksi, puorak dagitoy. Idi kuan, adda di ninamnama a napasamak. Nasdaawak ta saanen a kayat ni Nanang ti relihionmi. Iyad-adalan gayamen iti Biblia ni Manang Carmen! Karurodko unay ni manangko.
Naminsan, nakitak ti magasin nga Agriingkayo! iti balay da Nanang. No adda makitak idi puorak, ngem gapu ta kayatko a maammuan ti basbasaenna, inukagko dayta. Naginteresak iti maysa nga artikulo maipapan iti indibidual a napasnek a manamati iti isursuro ti relihionna. Ngem idi rinugianna a basaen ti Biblia ken ti publikasion dagiti Saksi ni Jehova, nakombinsir a saan a naibatay iti Biblia dagiti sursuro a Trinidad, impierno ken imortalidad ti kararua. Natukay ti pusok. Dagitoy ti sursuro a kayatko a matarusan. Sipud idin, tartarigagayakon ti tiempo a matarusak ti kinapudno manipud iti Biblia.
Kalpasan a nabasak ti sabali pay a pakasaritaan ti biag iti magasin nga Agriingkayo! maipapan iti maysa nga alkoholiko ken adikto iti droga a nagbalbaliw gapu iti panagadalna iti Biblia, intultuloyko ti nagbasa kadagiti publikasion dagiti Saksi. Nakakitaak met iti broshur a Ti Nasantuan a Nagan nga Agtalinaed iti Agnanayon. * Nabasak a Jehova ti nagan ti Dios. Naragsakanak a makaammo iti kinapudno maipapan iti maymaysa a pudno a Dios!—Deuteronomio 4:39; Jeremias 10:10.
Naragsakanak a makaammo iti kinapudno maipapan iti maymaysa a pudno a Dios!
Intultuloyko ti sililimed a panagbasak ken ad-adu pay ti naammuak a kinapudno manipud iti Biblia. Kas pagarigan, naisuro iti Pentecostal school a ni Jesus ti Dios, ngem naammuak manipud iti Biblia nga isu “ti Anak ti sibibiag a Dios.”—Mateo 16:15, 16.
Nagbalbaliwen ti Panangmatmatko
Idi nagkitakami manen ken Manang Carmen, nasdaaw idi nagkiddawak iti kopiak a broshur a Ti Nasantuan a Nagan nga Agtalinaed iti Agnanayon ken dadduma pay a literatura. Adu a tawen a nagadalak iti Bible school, ngem saan a naisuro ti kinapudno kaniak; isu a naallilawak. Maragragsakanak unay itan gapu kadagiti kinapudno a maad-adalko manipud iti Biblia. Pimmudno kaniak ti kinuna ni Jesus: “Maammuanyonto ti kinapudno, ket ti kinapudno wayawayaannakayto.” (Juan 8:32) Dagita a kinapudno ti in-inut a nangbalbaliw iti biagko.
Dagitoy a kinapudno ti in-inut a nangbalbaliw iti biagko
Ipagarupko idi a mabalinko ti agdayaw ken Jehova a sililimed ken agtultuloy kas pastora. Di nagbayag, diak kabaelanen nga isuro ti adu a doktrina ti relihionmi. Ngem maamakak. Anianto ngatan ti pagsapulak no agikkatak kas pastora? Maibilang a pakaibabainan ti relihionmi no ti maysa a pastora ket agbalin a maysa a Saksi ni Jehova! Isu nga intultuloyko ti nangisuro kas maysa a pastora, ngem diak insuro dagiti palso a doktrina ti relihionmi.
Iyad-adalannak iti Biblia ni Precious
Idi nagkitakami manen ken Manang Carmen, imbagana a padasek ti makigimong kadagiti Saksi ni Jehova. Gapu ta masansan a mapanak iti dakdakkel a kapiliami idiay siudad ti Laoag, binirokko sadiay ti Kingdom Hall a paggigimongan dagiti Saksi. Inyam-ammodak ken Alma Preciosa Villarin, pagaammo iti palayaw a “Precious,” maysa nga amin-tiempo a ministro iti dayta a kongregasion. Nupay negatibo pay laeng ti panangmatmatko kadagiti Saksi, inawatko ti intukonna a panagadal iti Biblia.
Nakaan-anus kaniak ni manangko a mangiranranud kadagiti kinapudno manipud iti Biblia. Kasta met laeng ti kinaanus ni Precious. Tinulongannak a mangtarus iti Biblia, uray no makarurodak ken makirikiarak kenkuana, ken makapungtotak pay no dadduma, ta ipapilitko dagiti dati a nasursurok. Ti personal nga interes, kinapakumbaba, ken kinaanus ni Precious ken ti dadduma pay a Saksi ti nakatignayak nga agserbi ken Jehova.
Idi Hulio 1995, nabigbigko a no talaga a kayatko nga ay-aywen ti Dios masapul nga agikkatak kas maysa a pastora. Apay? Iti simboliko a pamay-an, kastoy ti kuna ti Apocalipsis 18:4 maipapan iti palso a relihion: “Rummuarkayo kenkuana, tattaok, no saanyo a kayat ti makiraman kenkuana kadagiti basolna, ken no saanyo a kayat ti umawat iti paset dagiti saplitna.” Anianto ngaruden ti pagsapulak? Naammuak iti Hebreo 13:5 a no aramidentayo ti pagayatan ti Dios, inkarina: “Saankanto a pulos panawan ket saankanto a pulos baybay-an.”
Idi nagbautisarkami ken Nanang
Nupay busbusorendak da Tatang ken manongko, dua a lawas sakbay ti panagbautisarko kas maysa a Saksi, naaddaanak iti tured nga agawid tapno puorak amin dagiti alikamenko kas maysa a pastora. Kalpasan dayta, nariknak nga awanen ti naisangsangayan a pannakabalin a naited kaniak. No maturogak idi, mariknak a kasla adda mangpampandag kaniak, adda pay dagiti makitkitak nga anniniwan iti tawa ti kuartok, ngem ita awanen. Naammuak iti panagadalko iti Biblia a dagiti makunkuna a sagut ita, kas iti pannakabalin a mangagas ket saan a nagtaud iti Dios no di ket kadagiti dakes nga espiritu. Maragsakanak unay ta nakalapsutakon iti impluensiada, kas iti adipen a babai a winayawayaan ni Pablo manipud iti “sairo iti panagpadles.”—Aramid 16:16-18.
Kas maysa nga amin-tiempo a ministro dagiti Saksi ni Jehova
Maragsakanak ta kaduak ni nanangko a nagpabautisar kas Saksi ni Jehova idi Setiembre 1996. Kalpasan ti bautismo, simrekak kas amin-tiempo a ministro dagiti Saksi ni Jehova ken adun a tawen nga agserserbiak.
Ita, adda asawakon, ni Silver. Ikagkagumaanmi a sanayen ti balasangmi iti kinapudno. Agserserbi metten ken Jehova ti dadduma a kakabsatko. Nupay pagbabawyak a diak naam-ammo ti Dios iti adu a tawen, maragsakanak unay ta am-ammok itan ti Dios a pagdaydayawak.
Kaduak ni lakayko, ti balasangmi, ken adu a kabagiak a nakikadua kadakami iti pudno a panagdayaw
^ par. 10 Impablaak dagiti Saksi ni Jehova ngem saanen a mayim-imprenta.
^ par. 13 Ti “naluganan iti espiritu” tukoyenna ti karkarna a pasamak iti dadduma a relihion a patienda a sumrek ti “espiritu” kadagiti manamati nga urayda la maawanan iti puot gapu iti dayta a puersa.
^ par. 18 Impablaak dagiti Saksi ni Jehova.
