MAYSA laeng dayta a gagangay nga agsapa iti Makinlaud nga Africa. Masaysay-up ti agburburek a sarsa ken inapoy. Lumablabas dagiti babbai a nagdadakkel ti susuonda. Mangngegan ti paggaak ken panagtitinnawar. Nasapa pay ngem nakapudpudoten.

No makakita ti grupo dagiti ubbing iti Yovo, wenno Americano, mangrugida nga agsala ken agkanta. Mangrugi ti kantada iti “Yovo, Yovo, bon soir,” kalpasanna kunaenda, “Ania ngay ti tangdanmi?” Saan a nagkanta ti maysa nga ubing. Bayat a magmagnaak, sinurotnak ken nagsenias. Kasla sign language. Idi addaak pay idiay United States, nasursurok ti agsenias iti saggaysa a letra ti American Sign Language (ASL). Ngem ti Benin ket maysa a pagilian a Pranses ti us-usarenna a pagsasao.

Naikagumaak nga insenias ti walo a letra ti naganko. Immisem ti ubing ket iniggamanna ti imak sa inturongnak iti akikid a kalsada nga agturong iti balayda a maysa a gagangay a konkreto a balay a dua ti kuartona. Nagaaribungbong ti pamiliana. Agsenseniasda amin. Ania ngarud itan ti aramidek? Inseniasko ti naganko ken insuratko a maysaak a misionero a mangyad-adal iti Biblia ken imbagak nga agsubliakto manen. Immay met ti dadduma a makangngeg a kaarruba ken immanamongda met iti panagsublik. ‘Ania daytoy nasumsumokkon?’ kinunak.

Pinampanunotko idi nakaawidakon, ‘Adda koma tumulong kadagitoy a tattao tapno maammuanda dagiti kari ti Dios: “Maluktanto ti mismo a laplapayag dagidiay tuleng.”’ (Isaias 35:5) Idi nagsukisokak, naammuak iti nabiit pay a sensus nga adda 12,000 a tuleng ken saan unay makangngeg a tattao idiay Benin. Maragsakanak a nakaammo nga ASL ti us-usaren ti eskuelaan dagiti tuleng saan ket a French Sign Language. Ngem nakalkaldaang ta awan uray maysa a Saksi ni Jehova ditoy Benin a makaammo iti ASL. Malidayanak a nangibaga iti maysa a Saksi sadiay, “Adda koma umay mangisuro iti ASL.” Insungbat ti kabsat, “Apay no sika laengen?” Kasta nga agpayso ti napasamak. Nagorderak iti libro ken DVD iti ASL nga impablaak  dagiti Saksi ni Jehova. Nasungbatan ti kararagko idi adda immakar a Saksi a nalaing iti ASL a naggapu idiay Cameroon.

Nagdinamag nga agad-adalak iti sign language. Adda nangibaga a sarungkarak ni Brice nga agpimpinta iti karatula. Ti puestona ket naaramid iti nipa isu a presko uray napudot ti klima. Gapu iti adun a tawen a panagpimpintana, nagduduman ti kolor ti didingna. Pinunasanna ti dua a bangkito ken kinitanak bayat nga ur-urayenna a mangrugiak. Nangikabilak iti DVD iti portable player. Inyasidegna ti tugawna iti bassit nga iskrin. Inseniasna a natarusanna. Immaribungbong met a nakibuya dagiti ubbing a kaarrubana. Kinuna ti maysa, “Apay nga awan uni dayta buybuyaenyo?”

Tunggal sarungkarak ni Brice, umad-adu ti agbuya iti DVD. Di nagbayag, nangrugin a tumabuno ni Brice ken ti dadduma kadagiti Nakristianuan a gimong. Ad-adda a nakatulong kaniak ti panangiseniasko kadakuada. Bayat nga umadu ti grupo, adda payen dagiti mangbirok kaniak. Kas pagarigan, naminsan uray la naganit-it ken nagungor ti napigsa ti daan a luganko idi lumasatak kadagiti lasonglasong a kalsada bayat a likliklikak dagiti bulos a kalding ken baboy. Pagammuan ta adda bigla a nagkanalbuong iti likudak. Kunak la no nadadaelanak manen! Saan met gayam ta kamkamatennak ti maysa a lalaki a tuleng ket pinampagna ti likudan ti luganko tapno laeng agsardengak!

Nangrugi metten iti dadduma a siudad ti grupo ti ASL. Idi adda naorganisar a programa para kadagiti tuleng iti tinawen a kombensionmi, maysaak kadagiti nagipatarus. Idi addaakon iti entablado ken bayat nga ur-urayek ti panagsao ti ispiker, nalagipko idi kasangsangpetko pay laeng iti destinok. Pampanunotek idi, ‘Ania pay ngata ti maaramidak iti Africa?’ Bayat a kitkitaek dagiti dumdumngeg, ammokon ti sungbat ti saludsodko​—agbalin a misionero tapno tumulong kadagiti tuleng. Diakon ibagbaga ti ‘Ania daytoy nasumsumokkon?’