Ti ayat ket pannakarikna iti nabara a pammateg iti sabsabali. Babaen iti sao ken aramid, ipakita ti naayat a tao ti pammategna kadagiti ay-ayatenna, uray kasapulan nga agsakripisio.

Kasano nga impakita ni Moises ti panagayatna iti Dios? Kastoy ti mabasa iti 1 Juan 5:3: “Daytoy ti kaipapanan ti ayat iti Dios, a tungpalentayo dagiti bilinna.” Tinungpal dayta ni Moises. Tinungpal ni Moises ti amin nga imbilin ti Dios nga aramidenna kas iti narigat nga annongenna a panangsango ken Faraon, ken ti kasla simple laeng a trabaho a panangyunnat iti sarukodna iti Nalabaga a Baybay. Nagtulnog ni Moises, narigat man wenno nalaka ti trabaho. “Inaramidna ti kasta met laeng.”—Exodo 40:16.

Impakita ni Moises ti panagayatna kadagiti padana nga Israelita. Bigbigenda a ni Moises ti us-usaren ni Jehova a mangidaulo iti ilina, isu a mapanda ken Moises no adda parikutda. Mabasatayo: “Dagiti umili nagtaktakderda iti sanguanan ni Moises manipud iti bigat agingga iti rabii.” (Exodo 18:13-16) Nabambannog la ketdi ni Moises a dimngeg iti adu nga oras kadagiti parikut dagiti Israelita! Ngem maragsakan ni Moises a tumulong kadagiti tattao nga ipatpategna.

Saan laeng a dimngeg kadakuada no di ket inkararaganna pay ida ken uray dagiti nakabasol kenkuana. Kas pagarigan, idi nagreklamo ni manangna a Miriam maibusor kenkuana, ni Jehova pinagkukutelna ni Miriam. Imbes a maragsakan iti pannakadusa ni manangna, bimmallaet a dagus ni Moises ket inkararagna: “O Dios, pangngaasim! Paimbagem, pangngaasim!” (Numeros 12:13) Sigurado nga ayat ti nangtignay ken Moises tapno ikararaganna ni manangna.

Matuladtayo ni Moises no maaddaantayo iti nauneg a panagayat iti Dios. Ti kasta nga ayat ti mangtignay kadatayo a naimpusuan nga agtungpal kadagiti bilinna. (Roma 6:17) No naimpusuan nga agtungpaltayo ken Jehova, maparagsaktayo ti pusona. (Proverbio 27:11) Magunggonaantayo met. No agserbitayo iti Dios gapu ta pudno nga ay-ayatentayo, saantayo laeng nga aramiden ti umiso no di ket maragsakantayo a mangaramid kadagita!—Salmo 100:2.

Ti sabali pay a pamay-an a matuladtayo ni Moises ket ti panangpatanortayo iti ayat nga addaan panagsakripisio. No ibaga dagiti gagayyem wenno kapamiliatayo dagiti pakadanaganda, ayat ti mangtignay kadatayo nga (1) agimdeng kadakuada, (2) makipagrikna kadakuada, wenno tarusantayo ti marikriknada, ken (3) ipakitatayo a maseknantayo kadakuada.

Kas ken Moises, ikararagantayo dagiti ipatpategtayo. No dadduma kasla awan maaramidantayo no ibagada dagiti problemada. Nalabit ti laeng maibagatayo, “ladingitek, ta ti laeng maaramidak ket ikararaganka.” Ngem laglagipem: “Ti araraw ti nalinteg a tao, no agtigtignay dayta, aduan iti puersa.” (Santiago 5:16) Dagiti kararagtayo ti mabalin a mangtignay ken Jehova a tumulong iti dayta a tao a nalabit saanna koma a tulongan. Adda kadi pay nasaysayaat a maaramidtayo no di ti mangikararag kadagiti ipatpategtayo? *

Umanamongka kadi nga adu ti masursurotayo ken Moises? Nupay ordinario laeng a tao, nangipakita iti naisangsangayan a pammati, kinapakumbaba, ken ayat. No tuladentayo ti ulidanna, ad-adda a magunggonaantayo ken ti sabsabali.—Roma 15:4.