Mamatika kadi iti Dios? No kasta, adda kadi maibagam a pammaneknek iti kaaddana? Kinapudnona, nalikmuttayo iti ebidensia nga adda masirib, mannakabalin, ken naayat a Namarsua. Ania dagitoy nga ebidensia ken kasano kabileg dagita? Tapno masungbatan dagita, usigentayo ti sasao ni apostol Pablo a nairekord iti suratna kadagiti Kristiano idiay Roma.

Kinuna ni Pablo: “Dagiti di makita a kualidadna [ti Dios] ket silalawag a makita manipud pannakaparsua ti lubong ken agpatpatuloy, agsipud ta matarusan ida babaen iti bambanag a naaramid, ti mismo nga agnanayon a pannakabalin ken kina-Diosna, iti kasta awan ti pagpambarda.” (Roma 1:20) Kas dinakamat ni Pablo, nalawag nga ipakita dagiti ebidensia nga adda Namarsua gapu kadagiti pinarsuana. Usigentayo a naimbag dagita a sasao ni Pablo.

Kinunana a makita dagiti galad ti Dios “manipud pannakaparsua ti lubong ken agpatpatuloy.” Iti daytoy a konteksto, ti Griego a sao a “lubong” dina tukoyen ti planeta a daga no di ket dagiti tattao. * Gapuna, ibagbaga ni Pablo a sipud idi naparsua ti tao, makitada dagiti galad ti Namarsua babaen kadagiti bambanag nga inaramidna.

Dagita nga ebidensia ket saan a nailemmeng no di ket “silalawag a makita” iti aglawlawtayo. Manipud kadakkelan agingga iti kababassitan, nalawag nga ipakita dagiti parsuana nga adda Namarsua ken adda met dagiti nagsasayaat a galadna. Saan kadi a nalawag a makita ti kinasirib ti Dios kadagiti nagsasayaat a parsuana iti aglawlaw? Saan kadi nga ipakita ti namituen a langit ken dadakkel a dalluyon ti pannakabalinna? Saan kadi a makita ti ayatna kadagiti tattao iti nagduduma a taraon a magusgustuantayo ken ti nagpintas nga isisingising ken ilelennek ti init?—Salmo 104:24; Isaias 40:26.

Kasano kalawag ti ebidensia? Nakalawlawag ta ‘awan pagpambar’ dagidiay saan a mangbigbig kadagita ken saan a mamati iti Dios. Kastoy ti panangyilustrar ti maysa nga iskolar: Iladawam ti maysa a drayber a saan a nangsurot iti karatula a “Detour—Turn Left.” Pinasardeng ti polis sa tiniketanna. Inrason ti drayber a dina nakita ti karatula. Ngem saan a rason dayta ta nalawag a makita ti karatula, ken awan met ti problema ti panagkita ti drayber. Maysa pay, kas drayber obligasionna a kitaen ken suroten dagiti karatula. Kasta met, makita iti nakaparsuaan dagiti ebidensia nga adda Dios. Dayta a “karatula” ket nalawag a makita. Kas nasaririt a parsua, awan pagpambartayo ta nalawag a makita dagita.

Kinapudnona, adu ti masursurotayo maipapan iti Namarsua kadagiti bambanag a pinarsuana. Ngem adda sabali pay a libro a mangipalgak iti ad-adu pay maipapan kenkuana—ti Biblia. Babaen kadagiti linaonna, maammuantayo ti sungbat daytoy nagpateg a saludsod: Ania ti panggep ti Dios ditoy daga ken kadagiti tattao nga agnanaed? No maammuantayo ti sungbat dayta a saludsod, sumingedtayo iti Dios ta “dagiti di makita a kualidadna ket silalawag a makita” iti aglawlawtayo.