Ania a klase a regalo ti apresiarem unay? Kaaduan kadatayo ti maragsakan nga umawat iti regalo a naited gapu iti ayat, imbes a daydiay naited gapu ta obligasionna ti mangted iti regalo. No maipapan iti panangted, napateg kadatayo no ania ti motibo. Ngem kangrunaanna, napateg dayta iti Dios. Usigem ti naipaltiing a sasao ni apostol Pablo a nairekord iti 2 Corinto 9:7.

Apay nga insurat ni Pablo dagita a sasao? Kayatna a paregtaen dagiti Kristiano a taga-Corinto a tulonganda dagiti agkasapulan a kapammatianda idiay Judea. Pinilitna kadi a mangted dagiti taga-Corinto? Saan, no di ket kinunana: “Tunggal maysa aramidenna koma kas iti inkeddengna iti pusona, saan nga iti nadagsen a rikna wenno mapilpilit, ta ti Dios ayatenna ti naragsak a manangited.” Usigentayo dagita a pammaregta.

“Kas iti inkeddengna iti pusona.” Mangted ti pudno a Kristiano gapu ta inkeddengna dayta “iti pusona,” kuna ni Pablo. Kasta met, ti matalek a Kristiano sipapanunot iti kasapulan dagiti kapammatianna. Ti orihinal a sao a naipatarus nga “inkeddeng” “kaipapananna nga inkeddengna nga immun-una,” kuna ti maysa nga iskolar. Gapuna, pampanunoten ti maysa a Kristiano ti kasapulan dagiti kapammatianna ken utobenna no ania ti maaramidna tapno maipaay dagita a kasapulan.—1 Juan 3:17.

“Saan nga iti nadagsen a rikna wenno mapilpilit.” Dinakamat ni Pablo ti dua a kita ti panangted a masapul a liklikan dagiti Kristiano, dina kayat ti mangted ken mapilpilit. Ti Griego a sao a naipatarus kas “nadagsen a rikna” literal a kaipapananna “maldaangan (wenno maladingitan).” Ti mangted a nadagsen ti riknana wenno mapilpilit, “maladingitan a mangted gapu ta dina kayat a maksayan ti kuartana,” kuna ti maysa a reperensia. Mangted gapu ta mapuersa a mangaramid iti dayta. Asino kadatayo ti mayat nga umawat iti regalo manipud iti mapilpilit a mangted?

“Ti Dios ayatenna ti naragsak a manangited.” Apaman nga inkeddeng ti maysa a Kristiano ti mangted, maragsakan koma a mangaramid iti dayta, kuna ni Pablo. Kinapudnona, ti kinaragsak ket resulta ti panangted nga umiso ti motibona. (Aramid 20:35) Makita ti dadduma ti rag-o daydiay naragsak a mangted. Ti termino a “naragsak” deskribirenna ti makin-uneg ken makinruar a rikna ti mangted. Ti naragsak a mangted paragsakennatayo ken paragsakenna met ti Dios. Kuna ti sabali pay a patarus: “Ayaten ti Dios ti tao a naayat a mangted.”—Contemporary English Version.

Dagiti naipaltiing a sasao ni apostol Pablo ti mangiwanwan a prinsipio kadagiti Kristiano maipapan iti panangted. Itedtay man ti panawen, pigsa, wenno sanikuatayo, aramidentayo dayta a sibubulos ken maragsakantayo no naparaburtayo iti sabsabali nangruna kadagiti agkasapulan. Ti kasta a panangted ket saan laeng a mangparagsak no di ket ipatpategnatay pay ti Dios ta ‘ayatenna ti naragsak a manangted.’