Agballigi ti balakad ti Biblia no kasano nga agbalin a naragsak ti panagasawa ta nagtaud dayta iti Namunganay iti panagasawa, ni Jehova a Dios. Isurona kadatayo no kasano a mapatanor dagiti kababalin a mangparagsak iti panagasawa ken malapdan dagiti kababalin a mangdadael iti dayta. Isurona pay kadatayo no kasano a mapasayaat ti komunikasion a mangparagsak iti panagasawa.—Basaem ti Colosas 3:8-10, 12-14.

Masapul a dayawen ken raemen dagiti agassawa ti maysa ken maysa. No tungpalenda dagiti akem nga impaannong ti Dios kadakuada, agbalinda a naragsak.—Basaem ti Colosas 3:18, 19.

Agpaut ti relasion ti agassawa no ay-ayatenda ti maysa ken maysa. Ti Dios isuronatayo no kasano ti agayat. Ti Dios ken ti Anakna a ni Jesus ket perpekto nga ulidan ti managsakripisio nga ayat.—Basaem ti 1 Juan 4:7, 8, 19.

No ti asawa a lalaki ken babai raemenda ti urnos ti Dios a panagasawa, agtalinaedda nga agkadua. Inyurnos ti Dios ti panagasawa kas permanente a panagkadua ti lalaki ken babai tapno agbalin a natalged ti pamilia. Mabalin nga agpaut ti panagasawa agsipud ta pinarsua ti Dios ti lalaki ken babai tapno agtinnulongda a mangipaay iti pisikal ken emosional a kasapulanda. Inaramidna met ida iti ladawanna nga addaan iti abilidad a mangipakita iti ayat.—Basaem ti Genesis 1:27; 2:18, 24.