Ipatpateg kadi ni Jehova ti maar-aramidan dagiti adipenna a mangikagkagumaan a mangparagsak kenkuana? Mabalin a saan ti sungbat ti dadduma, ngamin ibagada a saan nga interesado ti Dios kadatayo. Ngem ti kasta a kapanunotan ket kinaulbod maipapan iti Dios. Ilinteg ti Biblia dagiti di umiso a kapanunotan ken patalgedanna nga ipatpateg ni Jehova ti panangikagumaan dagiti matalek nga agdaydayaw kenkuana. Usigem ti sasao ni apostol Pablo iti Hebreo 11:6.

Kasanom a maparagsak ni Jehova? “No awan ti pammati di mabalin nga ay-aywen [ti Dios] a naan-anay,” insurat ni Pablo. Saan a kinuna ni Pablo a narigat nga ay-aywen wenno paragsaken ti Dios no awan ti pammati. Imbes ketdi, kinunana nga imposible a maaramid dayta. Kayatna a sawen, napateg ti pammati tapno maparagsak ti Dios.

Ania a kita ti pammati ti mangparagsak iti Dios? Ti pammatitayo iti Dios ramanenna ti dua nga aspeto. Umuna, ‘masapul a patientayo nga isu adda.’ Kuna ti dadduma a patarus a “patientayo nga isu ket pudno.” Kasanotayo a maparagsak ti Dios no agduaduatayo iti kaaddana? Ngem saan la a dayta ti kasapulan ti pudno a pammati, ta uray dagiti demonio mamatida iti kaadda ni Jehova. (Santiago 2:19) Mapaneknekantayo a pudno ti pammatitayo iti Dios babaen ti aramidtayo ken iti wagas ti panagbiagtayo a makaparagsak kenkuana.—Santiago 2:20, 26.

Maikadua, ‘masapul a patientayo’ a ti Dios ket “mananggunggona.” Makuna a pudno ti pammatitayo no kombinsidotayo a saan nga ubbaw ti panagreggettayo nga agbiag iti wagas a mangparagsak iti Dios. (1 Corinto 15:58) Kasanotayo a maparagsak ni Jehova no pagduaduaantayo ti abilidadna a manggunggona kadatayo? (Santiago 1:17; 1 Pedro 5:7) No ibaga ti maysa a tao a saan a maseknan, saan a naayat, ken saan a naparabur ti Dios, saanna a talaga nga am-ammo ti Dios a nadakamat iti Biblia.

Siasino ti gunggonaan ni Jehova? ‘Dagidiay sipapasnek a mangsapsapul kenkuana,’ kuna ni Pablo. Kuna ti maysa a reperensia para kadagiti agipatpatarus ti Biblia a ti Griego a sao a naipatarus a “sipapasnek a mangsapsapul” dina kaipapanan ti “agbirok,” imbes ketdi, ipakitana ti umadani iti Dios “tapno agdayaw.” Kuna ti sabali pay a reperensia a ti nausar a Griego a sao ket mangipasimudaag iti kinapinget ken kinapasnek. Wen, gunggonaan ni Jehova dagidiay naimpusuan ken naregta nga agdayaw kenkuana gapu iti pammatida.—Mateo 22:37.

Kasano a gunggonaan ni Jehova dagiti matalek nga adipenna? Inkarina ti di magatadan a gunggona iti masanguanan a mangipakita iti kinaparabur ken kinamanagayatna—ti biag nga agnanayon iti Paraiso a daga. (Apocalipsis 21:3, 4) Uray ita, adun a bendision ti sagsagrapen dagidiay sipapasnek nga agsapsapul ken Jehova. Tagtagiragsakenda ti naragsak ken makapnek a biag gapu iti tulong ti nasantuan nga espiritu ken sirib a magun-odan iti Saona.—Salmo 144:15; Mateo 5:3.

Talaga a nadungngo a Dios ni Jehova ta ipatpategna ti panagserbi dagiti matalek nga agdaydayaw kenkuana. Gapuna, kayatmo kadi ti umadani kenkuana? No kasta, ammuem ti ad-adu pay no kasanom a mapatanor ken maipakita ti pammati a mangparagsak ken Jehova tapno gunggonaannaka.