Sakbay nga immuli ni Jesu-Kristo idiay langit idi 33 C.E., inkarina nga agsubli. Inyarigna ti bagina iti maysa a natan-ok a tao a pimmanaw iti nabayag ken nagsubli nga addaan pannakabalin nga agturay kas ari. Ti panggep ni Jesus nga agsubli ket mangipaay iti nasayaat a gobierno kadagiti tattao.—Basaem ti Lucas 19:11, 12.

Kasano nga agsubli ni Kristo? Napagungar kas di makita nga espiritu a persona. (1 Pedro 3:18) Kalpasanna, napan idiay langit ken nagtugaw iti makannawan ti Dios. (Salmo 110:1) Idi agangay, dimmatag ni Jesus iti sanguanan ni Jehova a Dios, “ti Kadaanan iti Al-aldaw,” a nangted ken Jesus iti pannakabalin a mangituray iti sangatauan. Isu nga agsubli ni Jesus kas di makita nga Ari saan a kas maysa a tao.—Basaem ti Daniel 7:13, 14.

Inton agsubli ni Jesus a di makita a kadua dagiti anghelna, ukomennanto ti sangatauan. Dadaelenna dagiti dakes a tattao ngem ikkanna iti agnanayon a biag dagidiay mangawat kenkuana kas Ari.—Basaem ti Mateo 25:31-33, 46.

Ti agturturayen nga ari a ni Jesus, pagbalinennanto a paraiso ti intero a daga. Pagungarennanto dagiti natay tapno siraragsak nga agbiagda iti paraiso ditoy daga.—Basaem ti Lucas 23:42, 43.