Nayanakak iti narang-ay nga ili ti Bilbao, iti makin-amianan nga Spain. Siak ti maikadua iti uppat nga annak. Deboto a Katoliko ti pamiliami, ken inaldaw a makimisaak. Nagbalinak a maestra idi agtawenak iti 23. Pagay-ayatko ti agisuro ken tinagiragsakko dayta iti 40 a tawen. Malaksid iti dadduma a subject, maragsakanak met nga agisuro iti relihion a Katoliko. Iti rabii, agserbiak a katekista a mangisuro iti aramiden dagiti babbalasitang iti umuna a komunionda.

Kalpasan ti 12 a tawen a naragsak a panagasawami, natay ni lakayko isu a siak laeng ti nangaywan iti uppat nga annakmi a babbai. Agtawenak laeng idi ti 33! Inkagumaak ti agbirok iti pannakaliwliwa iti relihionko a Katoliko, ngem adu latta dagiti saludsodko. Pinampanunotko: ‘Apay a matay latta dagiti tattao idinto ta sinubbotnatayon ni Kristo? Apay nga ikararagtayo nga umay ti Pagarian ti Dios no mapan idiay langit amin a nasingpet a tao?’ Kangrunaan ti amin, naisaludsodko: ‘No ukomennatayo ti Dios inton mataytayo, apay a masapul a panawantayo pay ti langit, purgatorio, wenno ti impierno inton dumteng ti maudi a panangukom?’

Insaludsodko dagita kadagiti padi a naam-ammok. Kuna ti maysa kadakuada: “Diak ammo. Saludsodem iti obispo. Napateg aya dayta? Saan kadi a mamatika iti Dios? Umdas daytan!” Ngem intultuloyko a sinapul ti sungbat dagiti saludsodko. Tinabunuak ti lektiur dagiti Jesuita, Pentecostal, ken Agnostiko. Ngem saanak a mapnek iti sungbatda.

Idi agtawenakon iti nasurok a 60, inawisnak ti pito ti tawenna nga estudiante a tumabuno iti gimong dagiti Saksi ni Jehova. Nagustuak ti nakitak ken nangngegko, ngem gapu ta okupadoak, saankon a nakasarita dagiti Saksi. Dua a tawen kalpasanna, binisitadak ti agassawa a Saksi a da Juan ken Maite. Iti tallo a bulan a panangsarungkarda kaniak, nasungbatanda amin a saludsodko. Idi agangay, nakipagadalakon iti Biblia.

Kanayon a padpadaanak ti panagadalmi! Nagsukimatak a naimbag nga inusarko ti tallo a patarus ti Biblia tapno  masiguradok no pudno ti isursuro dagiti Saksi ni Jehova. Idi agangay, nabigbigko a nabayagen a matiktikawak iti relihionko. Mariribukanak iti dakkel a nagdumaan ti dati a patpatiek ken ti agdama a masursurok iti Biblia. Diak mailawlawag ti riknak, arigna naparut ti nauneg ti pannakairamutna a pammatik.

Idi kuan, nagsakit iti nakaro ti maikadua nga asawak, ket natay. Di nagbayag, nagretiroak iti trabahok ket pimmanawak pay laeng idiay Bilbao. Immakar met da Juan ken Maite. Nakalkaldaang ta naisardengko ti nagadal iti Biblia. Ngem ammok a nakasarakak iti nagpateg a gameng. Diak pulos malipatan dayta.

Agarup 20 a tawen kalpasanna, idi agtawenak iti 82, nagsubli da Juan ken Maite idiay Bilbao, ket binisitadak. Naragsakanak a nakakita manen kadakuada! Naamirisko a saannak a nalipatan ni Jehova, ket intuloyko manen ti nagadal. Nakaan-anus da Juan ken Maite uray no maulit-ulit dagiti saludsodko. Masapul a kanayon a mangngegko ti sungbat ti Biblia kadagiti saludsodko tapno maluk-atanak kadagiti nabangonak a sursuro. Masapul met a nakasaganaak a kanayon a mangilawlawag iti kinapudno ti Biblia kadagiti gagayyem ken pamiliak.

Ti kararagsakan nga aldaw iti biagko ket idi nabautisaranak iti maysa nga asamblea dagiti Saksi ni Jehova. Agtawenak idi iti 87. Maysa a Kristiano a panglakayen ti nangipaay iti naibasar iti Biblia a palawag para kadagiti mabautisaran. Urayak la nakalua iti nangngegko. Panagriknak, ni Jehova ti makisarsarita kaniak. Kalpasan ti bautismok, adu a Saksi ti nangabrasa kaniak, nupay idi la a naam-ammok ti adu kadakuada!

Ammok idin a ni Jesu-Kristo “ti dalan.” (Juan 14:6) Ngem babaen ti panagadalko iti Biblia naam-ammok ni Jehova, a pangiturturongan kadatayo ni Jesus. Ita, mabalinkon ti agkararag iti Dios kas patpatgek nga Ama ken Gayyem. Dakkel ti nagbalbaliwan ti biagko idi binasak ti libro nga Umadanika ken Jehova. * Idi damo, nalpasko a binasa dayta iti agpatnag! Natukay ti riknak iti kinamanangngaasi ni Jehova.

No subliak ti nabayag a panagsapulko iti kinapudno, malagipko ti kinuna ni Jesus: “Itultuloyyo ti agdawat, ket maitedto dayta kadakayo; itultuloyyo ti agsapul, ket makasarakkayto; itultuloyyo ti agtuktok, ket mailukatto dayta kadakayo.” (Mateo 7:7) Ita ta nasungbatanen dagiti saludsodko, maragsakanak met a mangiranud iti dayta iti sabsabali.

Iti edad a 90, adu pay ti masapul a sursuruek maipapan ken Jehova. Espesial ti tunggal gimong a tabunuak iti Kingdom Hall gapu iti nagpateg a pannakaammo ken iti pannakilangen kadagiti dungdungnguek a kakabsat. Il-iliwek ti mangisuronto manen iti naikari a Paraiso a daga. (Apocalipsis 21:3, 4) Segseggaak a makita a mapagungar dagiti ipatpategko iti biag, ken maaddaan iti gundaway a mangisuro kadakuada ti kinapudno a linaon ti Biblia. (Aramid 24:15) Magagaranakon a mangiranud kadakuada iti nagpateg a sagut ni Jehova kaniak bayat ti kinabaketko!