Nayanakak idiay Riga a kabesera ti Latvia. Ni Nanang ti nangpadakkel kadakami ken manangko. Nupay Katoliko ni Nanang, makimisakami laeng no adda narelihiosuan a piesta. Nabayagen a mamatiak iti maysa a natan-ok a pannakabalin, ngem kas agtutubo, adu ti pakasingaak gapu kadagiti paginteresak.

Bayat a dumakdakkelak, nadlaw ni Nanang a pagaayatko a pagsisinaen dagiti bambanag sa isublik manen. Gapu iti kaadu ti alikamen a mabalin a pagsisinaen iti uneg ti balay, dinak ibatbati ni Nanang nga agmaymaysa. Isu nga inikkannak iti metal construction kit a pagaayatko a pagsisinaen ken pagsisilpuen. Malaksid iti dayta, adda pay sabali a paginteresak, ti panagmotorsiklo. Insalinak ni Nanang iti lumba ti babassit a motor a naawagan iti Zelta Mopēds (The Golden Moped). Nangrugiak a makikarera babaen iti bassit a motorsiklo ken idi agangay, babaen kadagiti dakdakkel a motorsiklo.

Nalakaak a nakasursuro ken nagbalinak a nalatak iti daytoy napartak ken napeggad nga isport. Namitlo a nangabakak iti Latvian championship iti nagduduma a lumba ti motor, ken namindua iti Baltic States Superbike Championship.

Bayat dayta a tiempo, naam-ammo ti nobiak a ni Evija (nagbalin nga asawak idi agangay) dagiti Saksi ni Jehova. Nakasarak ni Evija kadagiti literaturada nga addaan iti kupon. Sinuratanna dayta sa impatulodna tapno agkiddaw iti panagadal iti Biblia. Di nagbayag, dua a Saksi ti simmarungkar kenkuana ket nangrugi a nakipagadal iti Biblia. Okey laeng dayta kaniak, ngem saanak pay nga interesado idi kadagiti naespirituan a bambanag.

Idi agangay, inawisdak dagiti Saksi a makikadua iti panagadal ni Evija iti Biblia. Pinatgak ti awisda ket nagustuak ti nangngegko. Ti nangnangruna a naginteresak ket ti kari ti  Biblia a paraiso a daga. Kas pagarigan, naipakita kaniak ti sasao iti Salmo 37:10, 11: “Iti apagbiit laengen a kanito, ket daydiay nadangkes awanton; ket pudno unay nga imutektekamto ti lugarna, ket isu awanton. Ngem dagidiay naemma tagikuaendanto ti daga, ket pudno a maragsakandanto iti napalalo iti kinaruay ti talna.” Nagustuak dayta a kari.

Nagtultuloy a naginteresak kadagiti naespirituan a bambanag. Nabigbigko a nagadu ti palso a pannursuro ti relihion. Iti kasumbangirna, nagustuak ti lohikal ken nalawag a pannursuro iti Biblia.

Bayat ti panagadalko iti Biblia, naammuak no kasano kapateg ken Jehova ti biag. (Salmo 36:9) Dakkel ti epekto dayta iti pannakikarerak iti motorsiklo, isu a diak kayaten nga isagmak ti biagko. Imbes ketdi, kayatko nga usaren dayta a mangidayaw ken Jehova. Gapuna, saanen a napateg kaniak ti kinalatak, dayaw, ken ti ragsak nga iyeg ti karera iti motorsiklo.

Idi 1996, timmabunoak iti internasional a kombension dagiti Saksi ni Jehova idiay Tallinn, Estonia nga asideg iti istadium a pagkareraan iti motorsiklo. Iti kombension, nakitak nga agkaykaysa ken sitatalna nga agtataripnong ti nagduduma a puli. Kas pagarigan, idi napukaw ti pitaka ti maysa a Saksi, impagarupko a dinan mabirokan dayta. Ngem di nagbayag, nabirokan dayta ti maysa a Saksi ket insublina nga awan kurangna. Talaga a nasdaawak! Maawatak itan a pudno nga agbibiag dagiti Saksi a maitunos kadagiti nangato a pagalagadan ti Biblia. Nagtultuloykami a rimmang-ay ken Evija iti panagadalmi, ket idi 1997 nabautisarankami kas Saksi ni Jehova.

Natay ti dadduma kadagiti gagayyemko gapu iti napeggad a karera iti motorsiklo. Gapu iti panagadalko iti Biblia, naawatak nga adda responsabilidadko ken Jehova, ti Gubuayan ti biag. Nalabit dayta a pannakaammo ti nangispal iti biagko.

Iti uneg ti uppat a tawen, naaddaankami ken Evija iti pribilehio nga agserbi kas amin-tiempo a ministro iti sanga nga opisina dagiti Saksi ni Jehova idiay Riga. Maragragsakankami ita a mangpadakkel ken mangtulong iti anakmi a ni Alise a mangayat ken Jehova. Maysa nga aldaw kada lawas, adda met pribilehiok nga agtrabaho iti translation office tapno agtarimaan iti lugan ken dadduma pay a naperdi a banag. Talaga a maragsakanak a mangusar iti nasursurok a paglaingan idi ubingak pay! Wen, pagsisinaek latta dagiti bambanag sa isublik manen dagitoy.

Ipatpategmi kas pamilia ti pribilehio a mangikasaba maipapan iti maymaysa a pudno a Dios, maigapu amin dayta iti naadalko iti Biblia. Pudno a ti kari a paraiso a daga binalbaliwanna ti biagko!