Sungbat Dagiti Saludsod Maipapan iti Biblia
Talaga kadi a nangpagungar ni Jesus kadagiti natay?
Nalawag nga ibaga ti Biblia a nangpagungar ni Jesus kadagiti natay. Saan a sarsarita dagita a salaysay; napasamakda kadagiti espesipiko a lugar ken tiempo. Kas pagarigan, idi kalgaw ti 31 C.E., maysa a dakkel a grupo dagiti tattao ti nakipagdaliasat ken Jesus manipud Capernaum nga agturong idiay Nain. Iti isasangpetda, nasabatda ti sabali pay a grupo. Kalpasanna, adda napasamak a panagungar. Mapagtalkan dayta gapu ta nairekord iti Biblia a Sao ti Dios, ken adu ti nakakita.—Basaen ti Lucas 7:11-15.
Pinagungar met ni Jesus ti gayyemna a ni Lazaro, nga uppat nga aldawen a natay. Nakappapati ti naipadamag nga inaramid ni Jesus iti daydi nga aldaw gapu ta adu met ti nakakita.—Basaen ti Juan 11:39-45.
Apay a nangpagungar ni Jesus kadagiti natay?
Nangpagungar ni Jesus kadagiti natay gapu iti asina. Inaramidna met dayta tapno ipakita a ni Amana, ti Namarsua iti biag, ti nangted kenkuana iti pannakabalin a mangpagungar.—Basaen ti Juan 5:21, 28, 29.
Dagiti inaramid ni Jesus a panangpagungar pabilgenda ti panagtalektayo kadagiti karina iti masanguanan. Adunto ti pagungarenna, a pakairamanan dagiti nakillo a tattao a di pay nakaam-ammo iti pudno a Dios. Maikkandanto iti gundaway a mangam-ammo ken mangayat ken Jehova a Dios.—Basaen ti Aramid 24:15.