Dimmakkelak iti Ancram, bassit nga ili iti makin-amianan a paset ti New York, U.S.A. Aduan daytoy iti pagtaraknan iti baka. Ad-adu pay ketdin ti baka ngem tattao.

Maymaysa ti simbaan iti ilimi ket dayta ti pakimismisaanmi. Tunggal agsapa ti Domingo, pasilengen ni Lolo ti sapatosko sa mapanak iti Sunday school a tugottugotko ti bassit a puraw a Biblia nga inted ni lolak. Nasursuruankami a mangraem ken mangtulong kadagiti kaarrubami ken agbalin a nagaget ken managyaman kadagiti bendision a maaw-awatmi.

Idi dimmakkelak, pimmanawak iti pagtaenganmi ket nagbalinak a maestra. Adu ti saludsodko maipapan iti Dios ken iti biag. Nalalaing ti dadduma nga estudiantek. Adda met dagiti saan a nalaing ngem nagagetda nga agadal. Adda pisikal a depekto ti dadduma idinto ta nakasalsalun-at ti dadduma. Kasla saan a patas ti kasasaad. No dadduma, kuna dagiti nagannak dagiti saan unay a nalaing nga estudiantek, “Daytoy ti pagayatan ti Dios para iti anakko.” Pampanunotek no apay nga ipalpalubos ti Dios a mayanak nga addaan depekto ti dadduma nga ubbing. Awan met ti dakes nga inaramidda.

Pampanunotek met, ‘Ania ti masapul nga aramidek tapno makagunggona ti biagko?’ Kasla nagalisto ti panaglabas ti aldaw. Dimmakkelak iti nasayaat a pamilia, nagadalak kadagiti nasayaat nga eskuelaan, ken kaay-ayok ti trabahok ita. Ngem kasla adda kurang iti biagko. Mabalinko ti makiasawa, maaddaan iti napintas a balay ken annak, agtrabaho agingga nga agretiro, ken inton agangay, agnaed iti nursing home. Pampanunotek no adda pay nasaysayaat a maaramidak iti biag.

Maysa a kalgaw, kaduak ti dadduma pay a mannursuro a nagpasiar iti Europe. Napankami iti Westminster Abbey, Notre-Dame de Paris, ken iti Vatican, kasta met iti adu a babassit a simbaan. Sadinoman a papanak, agsalsaludsodak. Idi  nakaawidakon iti Sloatsburg, New York, adu a simbaan ti napnapanak. Ngem awan ti nakaipaay kadagiti makapnek a sungbat.

Maysa nga aldaw, inasitgannak ti estudiantek nga agtawen iti 12 ket adda tallo a sinaludsodna. Umuna, dinamagna no ammok nga isu ket maysa a Saksi ni Jehova. Imbagak a wen. Maikadua, dinamagna no kayatko a maammuan ti ad-adu pay maipapan kadagiti Saksi ni Jehova. Imbagak manen a wen. Maikatlo, dinamagna no sadino ti pagnanaedak. Idi imbagak ti adresko, naammuanmi nga agaassidegkami laeng. Diak impagarup a dagidi a tallo a saludsod ti maysa nga ubing ti mangbalbaliw iti biagko.

Di nagbayag, nagbisikleta nga immay iti balayko ket nagadalkami iti Biblia. Dinamagko dagiti insalsaludsodko iti adu a lider ti relihion. Saan a kas kadakuada, impakitana dagiti nalawag ken makapnek a sungbat iti mismo a Bibliak—sungbat nga idi laeng a naammuak!

Naragsakan ken napnekak kadagiti nasursurok iti Biblia. Nasdaawak idi nabasak ti 1 Juan 5:19: “Ti intero a lubong adda iti pannakabalin daydiay nadangkes.” Nabang-aranak a nakaammo a saan a ti Dios, no di ket ni Satanas, ti makinggapuanan iti amin a panagladingit—ket ikkatento ti Dios dagita. (Apocalipsis 21:3, 4) Nakitak a lohikal ti Biblia no mailawlawag a naimbag. Nupay 12 laeng ti tawen ti Saksi a mangyad-adal kaniak, pampanunotek a ti kinapudno ket kinapudno uray asino ti agsasao.

Nupay kasta, kayatko a maammuan no ar-aramiden dagiti Saksi ti ikaskasabada. Kas pagarigan, impaganetget ti ubing a naanus ken nasingpet dagiti pudno a Kristiano. (Galacia 5:22, 23) Pinadasko a suboken no adda kenkuana dagitoy a galad. Naminsan, inggagarak ti sumangpet a naladaw iti panagadalmi. Pampanunotek: ‘Ur-urayennak ngata? Agunget ngata gapu ta naladawak?’ Idi nakasangpetak, nakitak nga agur-uray iti sango ti balayko. Nagtaray nga immasideg ket kinunana: “Agawidak koman, Ma’am, ta ibagak ken nanangko nga umawag kadagiti ospital ken polis tapno maammuanmi no ania ti napasamak kadakayo ta saankay met a maladladaw iti panagadaltayo. Madandanaganak a mangpampanunot kadakayo!”

Naminsan pay, adda insaludsodko nga ammok a narigat a sungbatan ti 12 ti tawenna nga ubing. Kayatko a maammuan no basta mangpanunot lattan iti isungbatna. Idi insaludsodkon, kinitanak sa kinunana: “Narigat dayta a saludsodyo. Isuratko ta damagekto kadagiti nagannakko.” Iti sumaganad a panagadalmi, intugotna ti maysa a ruar Ti Pagwanawanan a mangsungbat iti saludsodko. Dayta ti nakaatrakarak kadagiti Saksi—mangipapaay dagiti publikasionda kadagiti naibatay iti Biblia a sungbat iti amin a saludsodko. Intultuloyko ti nakipagadal iti daytoy nga ubing, ket kalpasan ti makatawen, nabautisaranak kas maysa a Saksi ni Jehova. *

Idi napnekak kadagiti sungbat dagiti saludsodko, kayatko nga ipakaammo dagita iti sabsabali. (Mateo 12:35) Idi damo, binusor ti pamiliak dagiti baro a patpatiek. Ngem idi agangay, nagbalbaliwda. Idi dandanin matay ni nanangko, nangrugi a nakipagadal iti Biblia.Nupay saan a nakapagbautisar, masiguradok a naikeddengna ti agserbi ken Jehova.

Idi 1978, nakiasawaak iti maysa a Saksi nga agnagan iti Elias Kazan. Idi 1981, naayabankami ken Elias nga agbalin a miembro ti pamilia ti Bethel iti United States. * Makapaladingit ta kalpasan laeng ti uppat a tawenmi ditoy, natay ni Elias. Nupay nabaloak, intultuloyko ti nagserbi iti Bethel isu nga adda nangipamaysaak iti panunotko ken naliwliwaak.

Idi 2006, nakiasawaak ken Richard Eldred a miembro met laeng ti pamilia ti Bethel. Tagtagiragsakenmi ken Richard ti pribilehio nga agserbi iti Bethel. Gapu iti naadalko a kinapudno maipapan iti Dios, saan laeng a dagiti sungbat ti naammuak no di pay ket ti pudpudno a panggep ti biag—ket nangrugi ti amin iti tallo a saludsod ti maysa nga ubing.