Naus-usar dagiti manomano a gilingan a paggiling kadagiti bukel tapno agbalin nga arina a maaramid a tinapay. Iti dandani amin a balay, paset ti inaldaw a trabaho dagiti babbai wenno katulong ti panagusar iti kasta a gilingan. Isu a kakuykuyog ti inaldaw a panagbiag idi un-unana ti panaggiling.—Exodo 11:5; Jeremias 25:10.

Nailadawan kadagiti drowing ken estatua iti nagkauna nga Egipto ti proseso ti panaggiling. Maikabil ti bukbukel iti rabaw ti medio limmikkaong a dakkel a daplat a bato. Agparintumeng ti aggiling ket iggaman ti dua nga imana ti basbassit a bato sa ipasango-ipalikud nga ikaskasna dayta iti dakkel a daplat a bato tapno marumek dagiti bukel. Sigun iti maysa a reperensia, gagangay nga agtimbang iti 2-4 a kilo ti basbassit a bato a paggiling. No mausar kas armas, makapapatay la ketdi dayta a bato.—Uk-ukom 9:50-54.

Nakapatpateg iti biag ti pamilia ti panaggiling iti bukbukel nga uray la adda linteg iti Biblia a mangiparit iti panangala iti gilingan kas garantia a pagbayad iti utang. “No pautanganyo ti maysa a tao, diyo alaen ti gilinganna kas salda ti impautangyo ta daytoy ti aramatenna iti pagbiag ti familiana,” kuna ti Deuteronomio 24:6, Ti Baro a Naimbag a Damag Biblia.

Kuna ti Biblia a ni Jesus ket “adda iti saklot a saad iti Ama,” a mabalin met a kaipapananna a “nakasadag iti barukong ti Ama.” (Juan 1:18) Ipakita dayta ti naisangsangayan a kinadekket ken anamong ti Dios kenkuana. Tumukoy dayta a sasao iti kaugalian idi dagiti Judio no sumangoda iti panganan.

No mangan dagiti Judio idi kaaldawan ni Jesus, agpuestoda a nakasikig kadagiti sopa a naipalawlaw iti lamisaan. Isadagda ti kannigid a sikoda iti kutson a pagsadagan. Iti dayta a posision, nawaya ti kannawan nga imada. Gapu ta agaabay dagiti mangmangan ken nakasikigda iti kannigid, “ti ulo ti maysa ket asideg iti barukong daydiay adda iti likudna,” kuna ti maysa a reperensia, “isu a maikuna a ‘nakasadag isuna iti barukong’ ti sabali.”

Maibilang idi a dakkel a dayaw wenno pribilehio ti panagsadag iti barukong ti ulo ti pamilia wenno ti nagawis para iti pannangan. Isu nga idi sinelebraran ni Jesus ken dagiti adalanna ti maysa a tinawen a selebrasion dagiti Judio, ‘ti adalan a dinungdungngona’ a ni apostol Juan ket ‘nagsadag iti barukongna’ tapno agsaludsod kenkuana.—Juan 13:23-25; 21:20.