“Idi bigla a nagsuek ti ekonomia ti nasionmi, ngimmina ken dandani awanen ti magatang a makan,” kuna ti naasawaan a ni Paul nga addaan dua nga annak. “Adu nga oras a makipilakami, ngem kaaduanna a maibusen ti makan sakbay pay a batangmi ti gumatang. Nakakutkuttongen dagiti tattao gapu iti bisin, ken adda pay dagiti matalimudaw lattan iti kalsada. Uray la immabot iti bilion ti presio dagiti kangrunaan a gagatangen. Idi kuan, awanen ti pateg ti kuartami. Naawan metten ti urnongko iti banko, insurance, ken pensionko.”

Ammo ni Paul a masapulna ti “praktikal a kinasirib” tapno mabiagna ti pamiliana. (Proverbio 3:21) “Maysaak nga electrical contractor ngem awatek uray ania a trabaho uray pay nababa ti ibayadda,” kunana. “Adda dagiti mangbayad kaniak iti makan wenno dagiti mausar iti balay. No 4 a bareta ti sabon ti ibayadda, 2 laeng ti usarek sa ilakok ti nabati. Idi kuan, naaddaanak iti 40 a piek. Idi dimmadakkeldan, inlakok ida sa gimmatangak iti 300 pay a piek. Di nagbayag, insukatko ti 50 a manok iti 2 kaban a nagiling a mais. Dayta ti nabayag a kinkinnanmi a sangapamiliaan ken ti dadduma a pamilia.”

Ammo met ni Paul a ti kasayaatan nga aramiden ti asinoman ket agtalek iti Dios. No surotentayo dagiti bilinna, tulongannatayo. Maipapan iti kasapulantayo iti biag, kuna ni Jesus: “Sumardengkayon a maringringgoran unay; ta . . . ni Amayo ammona a kasapulanyo dagitoy a banag.”—Lucas 12:29-31.

Makapaladingit ta ni Satanas a kangrunaan a kabusor ti Dios, naallilawna ti kaaduan a tattao ditoy lubong a mangisentro iti biagda iti material a bambanag. Madanaganda unay kadagiti kasapulanda ken kadagiti dida met talaga kasapulan. Aramidenda ti amin tapno maaddaanda kadagiti bambanag a saan met a talaga a napateg. Adu met ti umutang, ket naladawen inton maawatanda a ‘ti nakabulod adipen ti tao nga agpapautang.’—Proverbio 22:7.

 Adda met dagiti makaaramid iti desision a di nasayaat ti resultana. “Adu a kalugarak ti nangpanaw iti pamilia ken gagayyemda tapno agbirok iti nasaysayaat a biag iti abrod,” kuna ni Paul. “Dadduma ti awan legal a papelesna isu a dida nakasapul iti trabaho. Aglemlemmengda kadagiti polis ken matmaturogda iti kalkalsada. Saanda nga inikkan ti Dios iti gundaway a mangtulong kadakuada. Ngem determinado ti pamiliami a sangsangkamaysa a mangsango kadagiti problema iti kuarta iti tulong ti Dios.”

Intuloy ni Paul: “Kuna ni Jesus: ‘Diyo pakasikoran [wenno pakadanagan] ti agpaay kadakayo inton bigat; ta ti sumaganad nga aldaw adda bukodna a parikut. Umdasen ti parikut ti maysa nga aldaw iti dayta nga aldaw.’ Isu a ti inaldaw laeng nga ikarkararagko iti Dios ket ‘itedna ti taraonmi ita nga aldaw’ tapno agbiagkami. Ket talaga a tinulongannakami kas inkari ni Jesus. Saan a kanayon a maalami ti kayatmi. Naminsan, nakipilaak iti paglakuan iti makan uray diak ammo ti mailaklako. Idi nakitakon, yogurt met gayam. Diak kayat ti yogurt ngem makan latta met, isu a dayta ti kinnanmi karabiyanna. Agyamyamanak iti Dios ta saan a pulos naturog ti pamiliami a mabisbisin iti dayta a tiempo.” *

“Maymayat itan ti kasasaadmi iti pinansial. Ngem nasursuromi kadagiti kapadasanmi a ti kangrunaan a pangontra iti panagdanag ket ti panagtalek iti Dios. Kanayon a tumulong ni Apo Jehova * no la ket ta kanayon nga aramidentayo ti pagayatanna. Napaneknekanmi a pudno ti kuna ti Salmo 34:8: ‘Nanamenyo ken kitaenyo a ni Jehova naimbag; naragsak ti nabaneg a lalaki nga agkamang kenkuana.’ Isu a saankamin a mabuteng uray agproblemanto manen ti pamiliami iti pinansial.

“Nalawag kadakamin a ti talaga a kasapulan ti tao tapno agbiag ket makan, saan a trabaho wenno kuarta. Padpadaananmi ti aldaw a matungpal ti kari ti Dios a ‘maaddanto ti naruay a bukbukel iti daga.’ Ngem iti agdama, ‘no adda taraon ken kawesmi, mapnekkamin.’ Mapatpatibkerkami iti kuna ti Biblia: ‘Ti wagas ti panagbiagyo siwayawaya koma iti panagayat iti kuarta, bayat a mapnekkayo iti agdama a bambanag. Ta kinunana: “Saankanto a pulos panawan ket saankanto a pulos baybay-an.” Iti kasta mabalintayo ti agtalged ket sawentayo: “Ni Jehova ti katulongak; saanakto nga agbuteng.”’” *

Kas ken Paul ken ti pamiliana, masapul ti napaypayso a pammati tapno ‘makapagnatayo’ a kadua ti Dios. (Genesis 6:9) Nakaro man ti problematayo iti pinansial ita wenno iti masanguanan, adda dagiti nagpateg a masursurotayo iti pammati ken praktikal a sirib nga impakita ni Paul.

Ngem kasanon no problema iti pamilia ti makagapu iti pakadanagantayo?