Iti simmaruno a tawen, naikkanakon kadagiti proyekto a pelikula, a dadduma ket siak ti bida. Magusgustuandak nga interbiuen dagiti reporter ken retratuen dagiti photographer. Kanayon a maawisak kadagiti damo a pannakaipabuya dagiti pelikula, panaglukat dagiti baro a patakder ken negosio, ken kadagiti pannangan. Kanayon idi a siak ti sentro ti atension.

Ngem in-inut a nakitak a saan met gayam a kas kasayaat dayta a kas iti inar-arapaapko. Aksion ti kaaduan a pelikulak, ket delikado dayta. Saan a kas kadagiti artista iti Hollywood, kaaduanna a dagiti artista ditoy Hong Kong ti mismo a mangaramid kadagiti delikado nga eksena imbes nga adda agakto nga agparang a kasla isuda. Isu a siak a mismo ti nangaramid kadagiti kasta nga eksenak, kas iti panangpalagto iti motorsiklo iti ngato ti maysa a kotse. Adu a pelikulak ti immoral ken naranggas. Dadduma met ti nangitampok iti demonismo.

Idi 1995, nakiasawaak iti maysa a producer ti pelikula. Uray no kasla adda kaniakon ti amin a rason nga agbalin a naragsak, kas iti kinalatak, kinabaknang, ken nasingpet nga asawa, nakalidlidayak latta. Nagdesisionak a panawak ti panagartista.

Nalagipko nga idi ubingak, sinabado a mapmapankami ken manangko iti balay ti maysa a pamilia a Saksi ni Jehova. Ti ama a ni Joe McGrath ti mangyad-adal kadakami a kadua ti tallo nga annakna a babbai. Nadekketda nga agkakapamilia, ken nadayaw ti panangtrato ni “Uncle Joe” iti asawana ken kadagiti annakda. Kaykayatko met ti sumursurot kadagiti gimongda. No dadduma, umat-atenderkami met iti dadakkel nga asamblea. Nakaragragsak dagidi a panawen. Natalged ti riknak no kaduak dagiti Saksi.

Ngem saan a kasta ti nariknak iti pamiliami gapu kadagiti di nasayaat a kapadasak iti mismo a pagtaenganmi. Narigatan unay ni Nanang gapu iti wagas ti panagbiag ni Tatang isu a pirmi a nadepres. Idi agarup 10 ti tawenko, saanen a makigimgimong ni Nanang  kadagiti Saksi ni Jehova. Nagtultuloyak latta ngem saan unayen a naimpusuan. Idi 17 ti tawenko, nagpabautisarak. Ngem di nagbayag, adda naaramidko a maikontra iti nakristianuan a panagbiag ket saanakon a paset ti kongregasion.

Di nagbayag kalpasan ti kasarko, dua a manangaywan iti kongregasion dagiti Saksi ni Jehova iti lugarmi ti bimmisita kaniak. Inlawlawagda no kasanoak a makasubli ken Jehova a Dios, ken inyurnosda a tulongannak ti misionera a ni Cindy. Nakakapkapuy idin ti pammatik isu nga imbagak a paneknekanna kaniak no ti Biblia ket talaga met la a Sao ti Dios. Impakitana ti dadduma a padto ti Biblia a natungpalen. In-inut a nagbalinkami a nadekket nga aggayyem, ken inawisnak nga adalenmi a dua dagiti kangrunaan a sursuro ti Biblia. Inawatko dayta. Idi laeng a naawatak a ni Jehova ket Dios ti ayat ken kayatna nga agbalinak a naragsak.

Idi mapmapanak manen kadagiti Nakristianuan a gimong, nariknak a naragragsakak no kaduak dagiti Saksi no ikompara kadagiti tattao iti industria ti pelikula. Ngem gapu kadagiti kapadasak idi ubingak, kasla diak mapagtalkan ti asinoman, ken kasuronko ti bagik. Natulongannak ti maysa a miembro ti kongregasion idi inusarna ti Biblia tapno ipakitana no kasanok a mapagballigian dagita a rikna, ken nasursurok met no kasano ti maaddaan iti pudpudno a gagayyem.

Idi 1997, immakarkami ken lakayko idiay Hollywood, California, U.S.A. Immadu ti tiempok sadiay a mangtulong kadagiti tattao a mabenepisiaran iti sirib a linaon ti Biblia. Dakdakkel a pannakapnek ti inted kaniak ti panangisurok iti Biblia ngem iti panagbalinko a sikat gapu iti panagartistak. Kas pagarigan, idi 2002, nagkitakami ken Cheri a nabayagen nga am-ammok a taga-Hong Kong. Adu ti pagpadaanmi iti biag. Nangabak met a Miss Hong Kong iti tawen sakbay ti panangabakko. Isu a ni Cheri ti nangkorona kaniak idi. Nagbalin met nga artista ken idi agangay, nagbalin a producer isu nga adu a sikat a direktor ti nakatrabahona. Immakar met idiay Hollywood.

Naasianak unay ken Cheri idi naammuak a natay ti pakiasawaanna gapu iti atake iti puso. Saan a nakasarak iti liwliwa iti Budista a relihionna. Kas kaniak, nagaw-atna met ti biag a tangtangaden ken ap-apalan ti dadduma, ngem naliday ken saan a makapagtalek iti asinoman. Imbagak kenkuana dagiti naadalko iti Biblia ngem marigatan a mangawat kadagita gapu iti relihionna.

Maysa nga aldaw idi 2003, timmawag ni Cheri idi adda idiay Vancouver, Canada bayat nga agar-aramid iti pelikula sadiay. Maragragsakan a nangibaga a bayat nga agmanmaneho ken maay-ayatan iti napintas a buya ti probinsia, nagkararag iti napigsa: “Ibagam kaniak, Asino ti pudno a Dios? Ania ti naganmo?” Iti dayta met la a kanito, nalabsanna ti maysa a Kingdom Hall ket nakitana ti nagan a Jehova. Nariknana a sungbat dayta ti Dios, isu a kayatna a maam-ammo dagiti Saksi ni Jehova iti kabiitan a panawen. Tinulongak tapno agbalin a posible dayta, isu nga iti sumagmamano la nga aldaw, nakaatenderen iti gimong a Chinese idiay Vancouver.

“Talaga a nariknak a pudpudno nga interes ti impakitada,” kuna ni Cheri kaniak. “Maibagak kadakuada ti marikriknak.” Naragsakanak unay a nakaammo iti dayta ta idi adda  pay la ni Cheri iti industria ti pelikula, awan pulos nagayyemna. Intuloy ni Cheri ti nakigimgimong. Ngem idi 2005, nagpirma iti kontrata kas producer ti dua a dadakkel a pelikula idiay China, isu a nagsubli ditoy Hong Kong. Makaparagsak ta idi 2006, nagkari ni Cheri ken Jehova a Dios a pagserbiannan isuna iti agnanayon, ket nabautisaran iti maysa nga asamblea dagiti Saksi ditoy Hong Kong. Uray kayatna nga ad-adu koma ti orasna nga agserbi ken Apo Jehova, marigatan a mangaramid iti dayta gapu iti trabahona, isu a saan a naragsak.

Idi 2009, nagbaliw a namimpinsan ti situasion ni Cheri. Nagdesision a tallikudannan ti industria ti pelikula tapno ad-adu ti panawenna nga agserbi ken Apo Jehova. Adu ti nagayyemna iti kongregasion dagiti Saksi. Nagbalin nga amin-tiempo a ministro (70 nga oras kada bulan a mangaskasaba iti naimbag a damag ti Pagarian) ket talaga a maay-ayatan a mangtulong kadagiti tattao a maaddaan iti nasaysayaat a biag.—Mateo 24:14.

Kalpasanna, nagsursuro ni Cheri iti Nepalese tapno makatulong iti dumakdakkel a grupo dagiti Saksi nga agsasao iti Nepalese ditoy Hong Kong. Maipuerpuera ngamin ken matagtagibassit ti kaaduan a Nepalese ditoy ta saanda unay makasao iti Ingles wenno Chinese ken naiduma dagiti kostumbreda. Imbaga ni Cheri a maragragsakan unay a tumultulong kadagitoy a tattao a mangadal iti Biblia. Kas pagarigan, idi nangasaba iti maysa a balay, nakasaritana ti maysa a Nepalese a babai nga adda bassit ammona maipapan ken Jesus ngem awan pulos ammona maipapan iti pudno a Dios a ni Jehova. Impakita ni Cheri kenkuana iti Biblia a nagkararag ni Jesus iti Amana idiay langit. Idi naawatan ti babai a mabalinna ti agkararag iti pudno a Dios nga agnagan Jehova, naimpusuan nga inakseptarna ti naimbag a damag. Di nagbayag, nagadal met iti Biblia ti asawana ken ti balasangna.—Salmo 83:18; Lucas 22:41, 42.

Idi nakitak a nakaragragsak ni Cheri a mangaskasaba iti adu nga oras, napanunotko, ‘Apay ngata a diak maaramid ti ar-aramidenna?’ Aggigianak met idin ditoy Hong Kong. Nagdesisionak nga urnosen manen dagiti prioridadko tapno ad-adu ti panawenko a mangisuro iti kinapudno a linaon ti Biblia. Talaga gayam a nakaragragsak ti dumngeg kadagiti tattao ken tumulong kadakuada a mangtarus iti Sao ti Dios!

Kas pagarigan, natulongak nga agadal iti Biblia ti maysa a Vietnamese a babai a kanayon idi a naliday ken agsangsangit. Ngem maragragsakan itan iti biagna ken talaga a maay-ayatan a makikadkadua kadagiti Saksi.

Nabirokanmi ken Cheri ti banag nga adayo a nasaysayaat ngem iti panagbalin a sikat. Pudno a makapagagar ti industria ti pelikula ken pinagbalinnakami a sikat. Ngem dakdakkel ti pannakapnek a nariknami iti panangisuro kadagiti tattao maipapan ken Jehova a Dios gapu ta pakaidayawanna dayta. Talaga a napaneknekanmi a pudno ti sasao ni Jesus: “Ad-adu ti kinaragsak iti panangted ngem iti panangawat.”—Aramid 20:35.