Ania ti Ibaga ti Biblia Maipapan iti Agkurkurang a Nadalus a Danum iti Intero a Lubong?

I-PLAY

Kasapulantayo ti nadalus a danum tapno agbiagtayo. Ngem “adda nakaro a problema ita iti suplay ti danum iti intero a lubong ta umad-adu ti agkasapulan iti dayta,” imbaga ti UN Secretary-General a ni António Guterres. Binilion a tattao iti intero a lubong ti marigrigatanen a makaala iti nadalus a danum.

Strdel/AFP via Getty Images

Addanto ngata tiempo a saanton nga agkurang ti nadalus a danum? Wenno agtultuloy a problematayo dayta? Ania ti ibaga ti Biblia?

Ti kari ti Biblia maipapan iti suplay ti danum

Ibaga ti Biblia nga aglaplapusananton ti nadalus a danum iti masanguanan.

“Pumsuakto ti danum iti let-ang, ken agayusto ti danum iti desierto. Agbalinto a nadanum ti natikag a daga, ken addanto dagiti ubbog iti nakamagmaga a daga.”—Isaias 35:6, 7.

Apay a makapagtalektayo iti dayta a kari? Makatulong no kitaentayo ti ibaga ti Biblia maipapan iti pannakadisenio ti daga.

Ti ibagbaga ti Biblia maipapan iti daga ken iti water cycle

‘Saan a pinarsua ti Dios ti daga nga awan serserbina, no di ket pinormana a pagnaedan.’—Isaias 45:18.

Dinisenio ti Dios ti daga nga addaan kadagiti natural a sistema a mangpataud iti aglaplapusanan a nadalus a danum tapno posible nga agtultuloy ti biag.

“[Ti Dios] ipangatona dagiti tedted ti danum; maurnong dagiti angepna sa agbalin a tudo; kalpasanna, ibuyat dayta dagiti ulep; agtinnagda a kas arbis kadagiti tattao.”—Job 36:27, 28.

Ipakita dayta a nangdisenio ti Dios iti natural ken mapagpannurayan a proseso a mangdalus iti danum tapno agtultuloy a mausar dayta. Ag-evaporate wenno agalingasaw ti danum manipud iti daga ken baybay, agbalin nga ulep, sa agtinnag kas tudo. Gapu iti dayta, adda agtultuloy a suplay ti nadalus a danum para iti tattao ken animal.—Eclesiastes 1:7; Amos 5:8.

“Pagtuduekto iti umiso a tiempo, ket agapitkayto ken agbunganto dagiti mulayo a kayo.”—Levitico 26:4.

Agmulmula idi dagiti nagkauna nga Israelita. Inkari ti Dios kadakuada nga ikkanna ida iti agtultuloy a suplay ti danum tapno adu ti apitda. Ammona ngamin a kasapulan dagiti mula ti tudo iti umiso a tiempo tapno dumakkelda.

Aramidento met ti Dios iti intero a daga dayta nga inaramidna iti nagkauna nga Israel. (Isaias 30:23) Ngem iti adu a lugar iti intero a lubong, kumarkaro ti problema iti suplay ti nadalus a danum. Ti maysa a makagapu ket saan a kanayon nga agtudo. Ania pay ti ibaga ti Biblia a solusion iti problema iti danum ita?

No kasano a masolusionan ti problema iti danum

Ibaga ti Biblia a solbaren ti Pagarian ti Dios ti amin a problema a mangap-apektar iti planetatayo, a pakairamanan ti agkurkurang a nadalus a danum ita. (Mateo 6:9, 10) Ti Pagarian ti Dios ket maysa a gobierno idiay langit a mangiturayto iti intero a daga. (Daniel 2:44; Apocalipsis 11:15) Aramidento ti Pagarian ti Dios ti saan a kaya nga aramiden dagiti gobierno ti tao—pagpatinggaennanto dagiti makagapu iti problema iti danum.

Problema: Saanen a normal ti water cycle gapu iti panagbalbaliw ti klima (climate change). Adda nakaro a tikag ken nakaro a layus gapu kadagiti napigsa a tudo wenno ingangato ti lebel ti danum iti baybay.

Solusion: Isublinto ti Pagarian ti Dios ti dati a kasasaad ti aglawlaw tapno makaungar ti planetatayo. Inkari ti Dios: “Kitaem! Pabpabaruek ti amin a bambanag.” (Apocalipsis 21:5) Aglaplapusananto ti nadalus a danum kadagiti natikag a lugar isu nga addanto agbiag uray kadagiti saan a mapagnanaedan ita. (Isaias 41:17-20) Kontrolen pay ti Pagarian ti Dios dagiti puersa ti nakaparsuaan iti panangituray ni Jesu-Kristo.

Idi adda ni Jesus ditoy daga, pinasardengna ti maysa a nakabutbuteng a bagyo. Ipakita dayta nga adda pannakabalin nga inted ti Dios kenkuana. (Marcos 4:39, 41) Iti panangiturayna kas Ari ti Pagarian ti Dios, awanton dagiti natural a kalamidad. Natalgedton ti rikna dagiti tattao ta maawanton ti aniaman a kalamidad a pagbutnganda.

Problema: Gapu kadagiti tattao a saan a mangpampanunot iti ibunga ti ar-aramidenda ken kadagiti kompania a ganansia laeng ti napateg kadakuada, marugrugitan dagiti karayan, lake, ken ubbog. Dayta pay ti rason nga agkurkurangtayo iti nadalus a danum.

Solusion: Dalusanto ti Dios ti planetatayo ken isublina ti dati a kasasaad dagiti karayan, lake, baybay, ken daga. Agbalinto a paraiso ti daga. Nangusar ti Biblia kadagiti sasao a maus-usar iti daniw a mangiladawan iti dayta. Kunana: “Agragsakto ti let-ang ken ti natikag a daga, ket agrag-onto ti desierto ken agsabongto a kas iti safron.”—Isaias 35:1.

Anianto ti mapasamak kadagiti tattao nga awan bibiangda iti aglawlaw wenno iti padada a tao? Ikarkari ti Dios a ‘dadaelenna dagidiay mangdaddadael iti daga.’—Apocalipsis 11:18; Proverbio 2:21, 22.

Problema: Ad-adu a danum ti maus-usar ken masaysayang dagiti tattao ngem iti danum a kaya a patauden ti daga.

Solusion: Babaen ti Pagarian, maaramidto ditoy daga ti pagayatan ti Dios, saan ket a ti pagayatan dagiti agimbubukodan a tattao. (Mateo 6:9, 10) Sursuruanto ti Pagarian ti Dios dagiti iturayanna. Kuna ti Isaias 11:9 a “sigurado a mapnonto ti daga iti pannakaammo maipapan ken Jehova.” a Gapu iti dayta a pannakaammo dagiti tattao ken gapu ta ay-ayatendanto unay ti Dios ken ti amin a parsuana, aywanandanto a naimbag ti nagpintas a planetatayo ken dagiti kinabaknang nga adda iti dayta.

Tapno maammuam ti ad-adu pay maipapan iti aramiden ti Pagarian ti Dios, kitaem ti artikulo nga “Ania ti Aramiden ti Pagarian ti Dios?”
Tapno maammuam no kasano nga agbalin a paraiso ti daga, basaem iti Biblia ti libro nga Isaias iti kapitulo 35.
Tapno ad-adu pay ti maammuam maipapan iti panggep ti Dios para iti daga ken kadagiti tattao, buyaem ti video nga Apay a Pinarsua ti Dios ti Daga?