Napno ti damag kadagiti krimen ken nasakit a sasao gapu iti panangidumduma, kinaranggas gapu iti puli, ken gubat.

•   “Nagkaro itan ti nasakit a panagsasao iti social media gapu iti gubat iti Israel ken Gaza ken kadagiti tattao a mangiparparegta iti kinaranggas ken panaggiginnura.”—The New York Times, Nobiembre 15, 2023.

•   “Manipud idi Oktubre 7, nakitatayo iti intero a lubong ti bigla ken makapaalarma nga iyaadu dagiti krimen, nasakit a panagsasao, ken panaggiginnura gapu iti panangidumduma.”—Dennis Francis, presidente ti United Nations General Assembly, Nobiembre 3, 2023.

 Saanen a baro dagita nga aramid. Ngamin, ibaga ti Biblia nga uray idi, addan dagiti tattao a ‘nangibiat kadagiti naulpit a sasaoda a kas iti pana,’ ken adda metten dagiti naranggas ken makigubgubat. (Salmo 64:3; 120:7; 140:1) Ngem ilawlawag ti Biblia nga adda naun-uneg a kaipapanan ti panaggiginnura a makitkitatayo ita.

 Ibaga ti Biblia ti dua a rason no apay a normalen ita ti panaggiginnura.

1.  1. Impakpakaunana ti tiempo a “lumamiisto ti ayat ti ad-adu.” (Mateo 24:12) Imbes nga agiinnayat dagiti tattao, ipakpakita ketdi ti kaaduan dagiti ugali a mangpakpakaro iti panaggiginnura.—2 Timoteo 3:1-5.

2.  2. Ti nakaro a panaggiginnura ita ket resulta ti dakes nga impluensia ni Satanas a Diablo. Ibaga ti Biblia a “ti intero a lubong ket adda iti pannakabalin daydiay managdakdakes.”—1 Juan 5:19; Apocalipsis 12:9, 12.

 Ngem ibaga met ti Biblia nga asidegen a pukawen ti Dios dagiti pakaigapuan ti panaggiginnura. Kasta met, ikkatennanto ti amin a panagrigrigat ken saem nga imbunga dayta. Ikarkari ti Biblia:

•   Ti Dios “punasennanto ti amin a lua kadagiti matada, ken awanton ni patay. Awanto metten ti panagladingit wenno panagsangit wenno ut-ot. Dagiti dati a bambanag ket limmabasen.”—Apocalipsis 21:4.