Sigun iti Biblia, nagbiag ni Ari David ti Israel idi maika-11 a siglo B.C.E. ken nagturay dagiti kaputotanna iti ginasut a tawen. Ngem ibaga ti dadduma a kritiko a sarsarita laeng ni David, ken inim-imbento dagiti tattao ti maipapan kenkuana idi agangay. Ngem talaga kadi a nagbiag ni Ari David?

 Idi 1993, nakakali ti arkeologo a ni Avraham Biran ken dagiti kakaduana iti maysa a tipping ti bato idiay Tel Dan, iti makin-amianan nga Israel, a nakaisuratan ti sasao a “Balay ni David.” Naisurat dayta iti nagkauna a Semitiko (Semitic script) idi maikasiam a siglo B.C.E. Nabatad a paset daytoy ti monumento nga impatakder dagiti Arameano, a mangipannakkel iti panangabakda kadagiti Israelita.

 Kuna ti maysa nga artikulo iti Bible History Daily: “Adu ti nangkuestion iti naisurat a ‘Balay ni David’ . . . Nupay kasta, mamati ti kaaduan nga eskolar iti Biblia ken arkeologo a dayta a tipping ti bato idiay Tel Dan ket umuna a natibker a pammaneknek a talaga a nagbiag ni Ari David a nadakamat iti Biblia. Sigun iti BAR [Biblical Archaeology Review], daytoy ti kapatgan a natakuatan dagiti arkeologo maipapan iti Biblia.”