Iti nabiit pay, nagkomento dagiti lider ti lubong, sientista, ken technologist maipapan kadagiti kabaelan nga aramiden ti artificial intelligence (AI). Inadmitirda nga adu ti pagsayaatanna, ngem madanaganda met ta mabalin a mausar dayta iti saan a nasayaat a pamay-an.

•   “Ti AI ti maysa kadagiti kabilgan a produkto ti teknolohia ita, ta kayana a pasayaaten ti biag dagiti tattao . . . Ngem ti AI ket dakkel met a peggad iti kinatalged ken seguridad, ikkatenna ti kalintegan ken privacy dagiti tattao, ken pukawenna ti panagtalek dagiti tattao iti demokrasia.”—Kamala Harris, bise-presidente ti United States, Mayo 4, 2023.

•   “Uray no adu ti maipaay ti artificial intelligence (AI) a solusion kadagiti problema iti salun-at, adu met ti maipaayna a pagdaksan iti pisikal ken emosional a salun-at dagiti tattao,” insurat ti maysa nga internasional a grupo dagiti doktor ken eksperto iti salun-at nga indauluan ni Dr. Frederik Federspiel, iti maysa nga artikulo a naipablaak idi Mayo 9, 2023, iti BMJ Global Health. a

•   “Mabalinen a mausar ti AI a mangiwaras kadagiti di umiso nga impormasion. Din agbayag, mabalin a maawananto dagiti tattao iti trabaho gapu iti AI. Ti kadakkelan a pagdandanagan ita dagiti technologist ket baka inton agangay, mausaren dayta a mangdangran kadagiti tattao.”—The New York Times, Mayo 1, 2023.

 Iti panaglabas ti panawen, makitanto no kasano kadakkel ti pagimbagan wenno pagdaksan a maipaay ti AI kadagiti tattao. Ania ti ibaga ti Biblia?

 Ipakita ti Biblia no apay a saan a maipasigurado ti tao a dagiti ar-aramidenda a pagrang-ayan iti teknolohia ket mausar laeng iti pagsayaatan.

1.  1. Uray no nasayaat ti intension dagiti tattao, saanda a makita a nasaksakbay dagiti negatibo nga epekto ti ar-aramidenda.

   •   “Adda dalan a kasla umiso iti maysa a tao, ngem patay ti pagtungpalanna.”—Proverbio 14:12.

2.  2. Saan a kontrolado ti maysa a tao no nasayaat wenno saan ti pangusaran ti dadduma iti inaramidna.

   •   “Masapul nga ibatik [ti trabahok] iti tao a sumaruno kaniak. Asino ti makaammo no agbalinto a masirib wenno maag? Ngem isunto ti makaammo iti amin a ginun-odko iti baba ti init babaen ti pigsa ken siribko.”—Eclesiastes 2:18, 19.

 Dagita a pakadanagan ipakitana no apay a kasapulantayo ti panangiwanwan ti Namarsua kadatayo.

 Ikarkari ti Namarsua kadatayo a dina pulos ipalubos nga adda asinoman a tao wenno aniaman a teknolohia nga inaramid ti tao a mangdadael iti daga wenno iti sangatauan.

•   “Ti daga [ket] agtalinaed iti agnanayon.”—Eclesiastes 1:4.

•   “Dagiti nalinteg kukuadanto ti daga, ket agyandanto iti dayta iti agnanayon.”—Salmo 37:29.

 Babaen ti Biblia, idaldalannatayo ti Namarsua kadatayo tapno maaddaantayo iti natalna ken natalged a masakbayan. Tapno maammuam ti ad-adu pay maipapan iti ibagbaga ti Biblia, basaem dagiti artikulo nga “Ania ti Makatulong Kenka Tapno Nasayaat ti Masakbayam?” ken “Adda Nasaysayaat a Masakbayan.”