Ania ti mapanunotmo no mangngegmo ti sao nga “apocalipsis”? Baka mapanunotmo ti sangalubongan a didigra a mangpapatay iti amin a biag ditoy daga. Kasta ti pampanunoten ti dadduma a dandanin mapasamak iti lubong, aglalo no makabasada kadagiti news a kas kadagitoy:

•   “Posible a mapasamak ti nuklear a gubat, mabalin nga implano dayta ti tao, aksidente, wenno gapu iti di panagkikinnaawatan.”—Bulletin of the Atomic Scientists.

•   “Iti napalabas a dekada, dita pay laeng a napasamak ti kaaduan a napipigsa a bagyo, puor iti kabakiran, tikag, pannakatay dagiti korales, heat wave, ken layus iti intero a lubong.”—National Geographic.

•   “Nakarkaro itan ti panangdadael dagiti pangen ti dudon iti Africa ngem kadagiti naglabas a dekada.”—The Associated Press.

 Madadaelto kadi ti daga iti panungpalan? Ania ti ibaga ti Biblia?

 Saan. Ipasigurado kadatayo ti Sao ti Dios, ti Biblia, nga agtalinaed nga agnanayon ti daga. (Eclesiastes 1:4) Imbes a dadaelen ti Dios ti inaramidna a daga, ‘dadaelennanto dagidiay mangdaddadael iti daga.’—Apocalipsis 11:18.

 Sigun iti Biblia, ti matuktukoy a “lubong” a dandanin madadael ket dagiti tattao a mangar-aramid laeng iti kaykayatda ken saanda nga agtultulnog iti Dios. Kas iti inaramidna idi panawen ni Noe, pagpatinggaento ti Dios “ti lubong a napno iti dakes a tattao.”—2 Pedro 2:5; 3:7.

 Ibaga ti 1 Juan 2:17, “ti lubong ket aglabas agraman ti tarigagayna.” Ipakita daytoy a bersikulo a saan a ti mismo a planeta a daga ti dadaelen ti Dios no di ket dagiti tattao a saan a nangisardeng kadagiti dakes nga ar-aramidda.

 Awan ti eksakto nga ibaga ti Biblia no kaano a mapasamak ti panungpalan. (Mateo 24:36) Ngem ibagana a nakaas-asidegen dayta. Dagitoy ti impakpakauna ti Biblia a mapasamak:

•   Addanto dagiti gubgubat, bisin, epidemia, ken napipigsa a ginggined “iti nadumaduma a lugar.”—Mateo 24:3, 7, 14; Lucas 21:10, 11; Apocalipsis 6:1-8.

•   Kaaduan a tattao ket bagbagida laeng ti pampanunotenda. Kas pagarigan, ‘managayatda iti kuarta,’ “saan a managyaman,” ken “awanan panagteppel.”—2 Timoteo 3:1-5.

 Umanamong ti adu a tattao a manipud idi 1914, mapaspasamaken dagiti impakpakauna ti Biblia ket dandanin ti panungpalan. Tapno ad-adu pay ti maammuam, kitaem ti artikulo nga “Ania ti Ipakita ti Kronolohia ti Biblia Maipapan iti Tawen 1914?” ken “Ania ti Pagilasinan Dagiti ‘Maudi nga Aldaw,’ Wenno ‘Tiempo ti Panungpalan’?”

 Ti orihinal a sao iti lengguahe a Griego a naipatarus iti Biblia kas “apocalipsis” kaipapananna ti “panangipalgak” wenno “panangibutaktak.” Masansan a tumukoy dayta a sao iti pannakaipakaammo dagiti nakalemmeng nga impormasion. Ibaga met ti Biblia a “maipalgak [wenno, apocalipsis] ni Jesus,” a mapasamak inton maipakaammo a ni Jesus daydiay addaan iti pannakabalin a mangikkat iti amin a kinadakes ditoy daga ken isu ti manggunggona kadagidiay agdaydayaw iti Dios.—2 Tesalonica 1:6, 7; 1 Pedro 1:7, 13.

 A·po·kaʹly·psis ti nagan ti maudi a libro ti Biblia gapu ta ipakaammona dagiti mapasamak iti masanguanan. (Apocalipsis 1:1) Naglaon dayta a libro kadagiti naimbag a damag ken namnama. (Apocalipsis 1:3) Ipakitana a pagpatinggaento ti Dios ti amin a di kinahustisia ken pagbalinenna a paraiso ti daga. Isu a saanton a makarikna dagiti tattao iti ut-ot, saandanton nga agrigat, wenno matay.—Apocalipsis 21:3, 4.

 Kayatmo kadi nga ad-adu pay ti maammuam maipapan kadagitoy a nagsasayaat a kari ti Biblia? Mangyop-opreser dagiti Saksi ni Jehova iti libre a panagadal iti Biblia a makatulong kenka. Padasem ida a kontaken ita.