Idi Oktubre 9, 2024, adda makapadanag a report ti World Wildlife Fund iti epekto dagiti aktibidad dagiti tattao kadagiti animal. Sigun iti dayta a report, “bimmaba iti 73% ti bilang dagiti animal iti napalabas a 50 a tawen (1970-2020).” Impakdaar ti report: “Saan a kamali no ibagatayo a nakadepende kadagiti mapasamak iti sumaruno a lima a tawen ti masakbayan ti biag ditoy Daga.”

 Talaga a makigtot ti adu a tattao iti kasta a report. Ipatpategtayo ti nagpintas a planetatayo ken saantayo a kayat a madangran dagiti animal. Mariknatayo dayta gapu ta pinanggep ti Dios nga aywanantayo dagiti animal.—Genesis 1:27, 28; Proverbio 12:10.

 Isu a baka mapampanunotmo, ‘Kayatayo ngata a protektaran dagiti animal ditoy daga? Ania ti ibaga ti Biblia?’

 Uray kasano ti panangikagumaantayo a mangprotektar kadagiti animal, nakadepende iti Dios ti masakbayanda, saan a kadatayo. Impakpakauna ti Biblia iti Apocalipsis 11:18 a ‘dadaelento ti Dios dagidiay mangdaddadael iti daga.’ Adda dua a masursurotayo iti dayta a bersikulo:

1.  1. Pasardengento ti Dios dagiti tattao a mangdaddadael iti daga tapno saan nga interamente a madadael wenno maperdi dayta.

2.  2. Dandanin agtignay ti Dios. Apay? Nakarkaro ngamin itan ti ar-aramiden dagiti tattao a mangdangran kadagiti animal.

 Kasanonto a solbaren ti Dios daytoy a problema? Usarennanto ti gobiernona idiay langit, wenno ti Pagarian, a mangituray iti intero a daga. (Mateo 6:10) Isuro ken sanayento dayta a gobierno dagiti natulnog a tattao tapno maaywanan ken maprotektaranda dagiti animal ditoy daga.—Isaias 11:9.