Kas nakitatayo iti gubat idiay Ukraine, parparegtaen dagiti Kristiano a lider ti relihion dagiti tattao a suportaranda ti gubat. Kitaentayo no kasano a sinuportaran dagiti lider ti relihion ti agsinnumbangir a dasig:

•   “Padayawantayo ken pagyamanantayo ti amin a nakigubat tapno idepensada ti Ukraine, ti nakayanakanda a pagilian, manipud kadagiti kalaban . . . Ay-ayatendakayo, ikarkararagandakayo, ken kanayon nga addakami a mangsuporta kadakayo.”—Metropolitan Epiphanius I ti Kyiv, iti report ti The Jerusalem Post, idi Marso 16, 2022.

•   “Nangmisa ti lider ti Russian Orthodox Church para kadagiti soldado a Russian idi Domingo ket pinaregtana ida nga idepensada ti pagilianda ‘ta dagiti Russian laeng ti makaaramid iti dayta’ bayat nga itultuloy ti Moscow ti pannakigubatna iti Ukraine.”—Reuters, Abril 3, 2022.

 Mabalin kadi a makiraman dagiti Kristiano iti gubat? Ania ti ibaga ti Biblia?

 Ipakita ti Biblia a dagiti pudno a pasurot ni Jesu-Kristo saanda a makiraman iti gubat.

•   “Isublim ta espadam iti kalubanna, ta ti mangusar iti espada matayto iti espada.”—Mateo 26:52.

   Talaga kadi a sursuroten ti maysa ti bilin ni Jesus no pabpaboranna ti gubat wenno makigubat?

•   “Mangtedak iti baro a bilin, nga ayatenyo ti maysa ken maysa; no kasano ti panangayatko kadakayo, kasta met ti panagiinnayatyo. Maammuanto ti amin a dakayo dagiti adalak—no agiinnayatkayo.”—Juan 13:34, 35.

   Ipakpakita kadi ti maysa a mangsupsuporta iti gubat ti klase ti ayat nga imbaga ni Jesus a pakabigbigan dagiti adalan, wenno pasurotna?

 Para iti ad-adu pay nga impormasion, basaem ti artikulo a “Maiparbeng Kadi a Makigubat Dagiti Kristiano?”

 Rasonable kadi nga ekspektaren a saan a makiraman dagiti Kristiano iti gubat ita? Wen. Impakpakauna ti Biblia nga iti panawentayo, a maawagan iti “maudi nga aldaw,” addanto dagiti tattao manipud iti amin a nasion a ‘saan nga agsursuro a makigubat,’ kas panangsurotda kadagiti insuro ni Jesus.—Isaias 2:2, 4, footnote.

•   Tapno maammuam ti ad-adu pay, basaem dagiti serye ti artikulo ti Pagwanawan a napauluan “Ania ti Kuna ti Dios Maipapan iti Gubat?”

 Dandanin usaren ni Jehova, a “ti Dios ti talna,” ti nailangitan a gobiernona a mangisalakan kadagiti tattao a biktima ti ‘panangirurumen ken kinaranggas.’—Filipos 4:9; Salmo 72:14.

•   Tapno maammuam no kasano, buyaem ti video nga Ania ti Pagarian ti Dios?