Idi 2022, immabuten iti 2.24 trillion dollars (U.S.) ti nagastos ti lubong para iti militar, a kaaduanna ket gapu iti panangsakup ti Russia iti Ukraine. Sigun iti Stockholm International Peace Research Institute (SIPRI) idi Abril 2023, dagitoy ti report bayat ti 2022:

•   Ti magasgastos dagiti gobierno ti Europe para iti militar ket “ngimmato iti 13 a porsiento bayat ti tawen. Dayta ti kadakkelan pay laeng a panagngato ti tinawen a magasgastos ti Europe sipud nagpatingga ti cold war.”

•   “Ti Russia . . . ket ngimmato ti magasgastosna iti agarup 9.2 a porsiento, isu a manipud iti dati a maikalima, nagbalindan a maikatlo a kadakkelan ti gasgastosenda para iti militar iti intero a lubong.”

•   Ti United States ti nagtalinaed a kadakkelan ti magasgastosna iti militar gapu ta “39 a porsiento iti gasgastosen ti lubong para iti militar ti gasgastosenda.”

 “Ti agtultuloy a panagngato ti magasgastos ti intero a lubong para iti militar kadagiti nabiit pay a tawen ket pagilasinan nga agbibiagtayon iti lubong a kumarkaro ti kinapeggadna,” imbaga ni Dr. Nan Tian, coauthor ti SIPRI report.

 Impakpakauna ti Biblia a kumaro ti panagririri dagiti nabileg a gobierno iti lubong ita ken ipakitana ti kakaisuna a makaipaay iti talna.

•   Aw-awagan ti Biblia ti tiempo a pagbibiagantayo iti “tiempo ti panungpalan.”—Daniel 8:19.

•   Impakpakauna ti libro a Daniel nga iti dayta a tiempo, addanto dagiti gobierno iti lubong nga agkinnompetensia. ‘Agdinnuron,’ wenno aglinnaban, dagitoy a gobierno ta kayatda ti agbalin a kabilgan. Gapu iti dayta a panaglaban, agusarda iti adu a “kinabaknang.”—Daniel 11:40, 42, 43.

 Tapno maammuam ti ad-adu pay maipapan iti daytoy a makapainteres a padto ti Biblia, buyaem ti video a Natungpal a Padto—Daniel Kapitulo 11.

•   Ibaga ti Biblia a sukatanto ti Dios dagiti gobierno ti tao. “Mangipasdekto . . . iti maysa a pagarian a saanto pulos a madadael. Daytoy a pagarian ket saanto a mayawat iti aniaman a sabali nga ili. Rumeken ken pagpatinggaennanto amin dagitoy a pagarian, ket daytanto laeng ti agtalinaed iti agnanayon.”—Daniel 2:44.

•   Asidegen nga aramiden ni Jehova a a Dios ti saan a kaya nga aramiden dagiti tattao—ipaayna ti pudno ken manayon a talna. Kasano? Dadaelento ti nailangitan a gobiernona ti amin nga armas ken pagpatinggaenna ti amin a kinaranggas.—Salmo 46:8, 9.

 Tapno maammuam ti ad-adu pay maipapan iti aramidento ti Pagarian ti Dios, basaem ti artikulo nga “‘Agsaknapto ti Talna’ Babaen iti Pagarian ti Dios.”