Kada tawen, rinibu a ginggined ti mapaspasamak. Nupay nakapsut ti kaaduan kadagita, adda dagiti napipigsa a ginggined nga isu ti makagapu iti adu a perhuisio, panagrigat, ken ipapatay. No dadduma, agresulta pay dagita iti tsunami, a mangdadael kadagiti lugar nga asideg iti baybay, a pakatayan ti adu a tattao. Impadto wenno impakpakauna kadi ti Biblia dagita a napipigsa a ginggined?

Iti daytoy nga artikulo

•  Impakpakauna kadi ti Biblia dagiti mapaspasamak a ginggined?

•  Kaitungpalan kadi ti padto ti Biblia dagiti ginggined a mapaspasamak ita?

•  Apay a pagsayaatantayo no ammotayo ti padto ti Biblia maipapan iti ginggined?

•  Dagiti di umiso a kapanunotan maipapan iti padto ti Biblia ken dagiti ginggined

 Mabasa iti Biblia dagiti impadto ni Jesus maipapan kadagiti ginggined. Mabasatayo dagita kadagitoy a tallo a libro ti Biblia:

 “Bumusorto ti nasion iti sabali a nasion ken ti pagarian iti sabali a pagarian, ket addanto met bisin ken ginggined iti nadumaduma a lugar.”—Mateo 24:7.

 “Bumusorto ti nasion iti sabali a nasion ken ti pagarian iti sabali a pagarian; aggingginedto iti nadumaduma a lugar; addanto met bisin.”—Marcos 13:8.

 “Addanto napipigsa a ginggined, ken bisin ken makapapatay a saksakit iti nadumaduma a lugar.”—Lucas 21:11.

 Impakpakauna ni Jesus nga addanto dagiti “napipigsa a ginggined” “iti nadumaduma a lugar,” kasta met dagiti gubat, bisin, ken ipapatay. No aggigiddanen a mapasamak dagita, nalawag nga ipakitana nga addatayon iti panawen ti “panungpalan daytoy a sistema ti bambanag,” wenno “maudi nga al-aldaw.” (Mateo 24:3; 2 Timoteo 3:1) No adalentayo ti kronolohia wenno ti panagsasaruno ti pasamak iti Biblia, makitatayo a nangrugi ti “maudi nga al-aldaw” idi 1914 ken saan pay a nagpatingga dayta.

 Wen. Dagiti impadto ni Jesus a pakairamanan dagiti ginggined ket eksakto nga isu ti mapaspasamak ita. Manipud 1914, addan nasurok a 1,950 a napipigsa a ginggined, a nakatayan ti nasurok a dua a milion a tattao. a Dagitoy ti dadduma a napasamak a ginggined iti maika-21 a siglo (21st century):

 2004—Indian Ocean. Gapu iti 9.1 a magnitude a ginggined, adda napasamak a tsunami. Naapektaran ti adu a nasion ken dandani 225,000 a tattao ti natay.

 2008—China. Gapu iti 7.9 a magnitude a ginggined, adu a lugar ti nadadael. Natantia nga adda 90,000 a tattao a natay, adda met 375,000 a nadangran wenno nasugatan, ken minilion ti naawanan iti pagyanan.

 2010—Haiti. Adda napasamak a 7.0 a magnitude a ginggined a sinaruno ti napipigsa nga aftershock a nakatayan ti nasurok a 300,000 a tattao ken minilion ti naperdi ti balayna.

 2011—Japan. Gapu iti 9.0 a magnitude a ginggined ken ti tsunami a resulta dayta, natantia nga adda natay nga 18,500 a tattao ken rinibu ti naawanan iti pagyanan. Bimtak ti Fukushima power plant isu a nagwaras ti makapapatay a radiation. Sangapulo a tawen kalpasanna, saan pay laeng a nakasubli ti sumurok-kumurang a 40,000 a tattao kadagiti balbalayda nga asideg iti power plant gapu ta nangato pay laeng ti level ti radiation.

 No ammotayo ti padto ti Biblia maipapan kadagiti ginggined, maammuantayo no ania ti asidegen a mapasamak. Imbaga ni Jesus: “Inton makitayo a mapaspasamaken dagitoy a banag, masiguradoyo nga asidegen ti Pagarian ti Dios.”—Lucas 21:31.

 Ilawlawag ti Biblia a ti Pagarian ti Dios ket agpaypayso a gobierno idiay langit a ni Jesu-Kristo ti Arina. Dayta a Pagarian ti insuro ni Jesus nga ikararag dagiti pasurotna.—Mateo 6:10.

 Inton iturayan ti Pagarian ti Dios ti intero a daga, ikkatenton ti Dios dagiti kalamidad, a pakairamanan dagiti ginggined, a mangparparigat kadagiti tattao. (Isaias 32:18) Ikkatennanto met dagiti epekto dagiti ginggined iti bagi ken emosion dagiti tattao. (Isaias 65:17; Apocalipsis 21:3, 4) Tapno maammuam ti ad-adu pay, basaem ti artikulo nga “Anianto ti Aramiden ti Pagarian ti Dios?”