Inton Enero 27, 2023, selebraran ti adu a tattao ti International Holocaust Remembrance Day. Gapu iti nakaro a kinaranggas a napasamak bayat ti Holocaust nasurok a 75 a tawenen ti napalabas, mabalin a mapanunotmo no apay nga impalubos ti Dios dayta a nasaem a trahedia.

•   Tapno maammuam ti kuna ti Biblia, basaem ti artikulo nga “Apay a Napasamak ti Holocaust? Apay a Saan nga Inatipa Dayta ti Dios?”

 Nakarigrigat ti napasaran dagiti Judio a biktima ti Holocaust. Planado ti pannakapapatay ti minilion a tattao. Naidadanes ken napapatay met ti miembro ti dadduma a grupo bayat ti Holocaust. Karaman kadakuada dagiti Saksi ni Jehova, gapu iti naibatay-Biblia a patpatienda.

•   Tapno maammuam ti ad-adu pay, basaem ti artikulo nga “Ania ti Napasamak Kadagiti Saksi ni Jehova Idi Panawen ti Holocaust?”

 Madanagan ti adu a tattao a baka addanto manen mapasamak a kas iti Holocaust. Imbag laengen ta ikarkari ti Biblia nga awanton ti kasta a trahedia iti masanguanan.

•   “‘Ta sigurado nga ammok ti pampanunotek para kadakayo,’ kuna ni Jehova, ‘ikkankayo iti talna, saan a didigra, tapno maaddaankayo iti nasayaat a masakbayan ken namnama.’”—Jeremias 29:11. a

 Matungpalto daytoy a namnama inton ikkaten ni Jehova a Dios ti kinadakes ken ti amin nga epekto dayta. Asidegen a:

•   Dadaelenna dagidiay mangdangdangran iti dadduma.—Proverbio 2:22.

•   Pukawenna ti amin a panagrigrigat.—Apocalipsis 21:4.

•   Pagungarenna ditoy daga dagiti natay.—Juan 5:28, 29.

 Mapagtalkam ti makaliwliwa a namnama nga ibagbaga ti Biblia. Tapno maammuam no apay, padasem ti iyaw-awismi a libre a panagadal iti Biblia nga adda tumulong kenka.