Agarup 70 a milion ti umel iti intero a lubong ket adu kadakuada ti agus-usar iti sign language tapno makisarita. Addan nasurok a 200 a sign language iti intero a lubong. Makapaladingit ta kaaduanna a saan a nasayaat ti pannakatrato dagiti umel, kas ipakita dagitoy a report:

•   “Iti intero a lubong, kaaduanna a saan a maikabkabilangan ti kalintegan dagiti umel ken dagiti nakapuy ti panagdengngegna.”—National Association of the Deaf (U.S.).

•   “Kadagiti marigrigat a pagilian, dagiti umel ket karaman kadagiti kapanglawan, ken marigatanda a makaala iti nasayaat nga edukasion, trabaho, ken umiso nga impormasion.”—World Federation of the Deaf.

 Ania ti marikrikna ti Dios kadagiti umel? Ania ti ibagbaga ti Biblia maipapan kadakuada? Ken kasano a tultulongan ida dagiti Saksi ni Jehova ita?

Ti Marikrikna ti Dios Kadagiti Umel

 Ibaga ti Biblia nga ipatpateg ni Jehova a a Dios dagiti umel. Kayatna a nasayaat ti pannakatratoda ken magunggonaanda iti edukasion nga ipapaayna.

 Teksto: “Diyo ilunod ti tuleng.”—Levitico 19:14.

 Teksto: “Saan a mangidumduma ti Dios.”—Aramid 10:34.

 Teksto: “Napan ni Jesus iti amin a siudad ken purok, . . . ken inkaskasabana ti naimbag a damag maipapan iti Pagarian.”—Mateo 9:35.

 Teksto: ‘Pinaimbag pay ni Jesus dagiti tuleng ken umel.’—Marcos 7:37.

 Teksto: “Makangngegto ti lapayag dagiti tuleng.”—Isaias 35:5.

 Kaipapananna: Impakpakauna ni Jehova a makangngegton dagiti tuleng.—Isaias 29:18.

No Kasano a Tultulongan Ita Dagiti Saksi ni Jehova Dagiti Umel

 Iti intero a lubong, ikaskasaba dagiti Saksi ni Jehova kadagiti umel ti mensahe ti Dios a mangted iti namnama. Kasanomi nga ar-aramiden daytoy? Agipatpataruskami iti Biblia ken agar-aramidkami kadagiti video a mausar iti panagadal iti Biblia iti nasurok a 100 a sign language. Us-usarenmi met ti sign language iti programami a panangisuro iti Biblia ken kadagiti gimongmi. Awan bayadna amin dagitoy. Apay? Gapu ta imbaga ni Jesus: “Inawatyo nga awan bayadna, itedyo nga awan bayadna.”—Mateo 10:8.

 Ma-access-mo dagita online wenno mai-download-mo iti gadyetmo manipud kadagitoy:

 JW.ORG. I-click-mo ti icon a pagpilian iti lengguahe iti ngato a paset ti website tapno makitam dagiti impormasion iti sign language a kayatmo.

 JW Library Sign Language app. Mabalinmo nga i-install daytoy a libre nga app iti gadyetmo tapno maka-download wenno makabuyaka kadagiti video iti sign language.

Ania Dagiti Ipapaaymi a Material a Makatulong iti Programami a Panangisuro iti Biblia?

 Ti sign language a Biblia. Ti American Sign Language a New World Translation of the Holy Scriptures ti kaunaan a kompleto a sign language a Biblia. Addan ti kompleto wenno ti dadduma a paset ti New World Translation iti adu a sign language ken ad-adu pay a lengguahe ti mainaynayon iti kada tawen. (Tapno makitam ti listaan dagiti lengguahe wenno mabuyam ti Biblia online, kitaem ti kahon a “ Ti Baro a Lubong a Patarus a Biblia iti Sign Language.”)

•   Buyaem ti video a The Complete New World Translation Is Available in ASL tapno maammuam no kasano a maar-aramid ti sign language a Biblia.

•   Tapno nasaysayaat ti panagbasam iti Biblia, i-install-mo ti JW Library Sign Language app. Mapilim ditoy dagiti kayatmo a bersikulo iti sign language a Biblia.

•   Ti agassawa a da Dmytro ken Vita ket umel, ngem saan nga umel dagiti annakda. Kitaem no kasano a makatultulong iti pamiliada ti inaldaw a panagbuyada iti Biblia a sign language.

 Dagiti video a mangisuro iti Biblia. Adda dagiti sign language a video nga inaramid dagiti Saksi ni Jehova tapno maawatan ken mayaplikar dagiti tattao dagiti makatulong a balakad ti Biblia para iti . . .

•   Panagasawa ken pamilia

•   Tin-edyer ken agtutubo

•   Ubbing

 Panagadal iti Biblia nga adda mangisuro kenka. Iti daytoy a panagadal iti Biblia iti sign language, nawayaka a mangyebkas iti kapanunotam ken nakadepende kenka ti kapautna. Mabalinmo ti agkiddaw nga adda mangipakita kenka iti daytoy a libre a programa ti panagadal iti Biblia.

 Ni Jeson Senajonon ket taga-Pilipinas. Kitaem no kasano a natulongan isuna ti panagadalna iti Biblia a maaddaan iti nadekket a pannakigayyem iti Dios.

 Ni Mario Antúnez ket dati a pastor ti maysa a relihion idiay Honduras. Ammuem no kasano a nasungbatan ti Biblia dagiti saludsodna iti pakasaritaanna a napauluan, “Nakaad-adu ti Saludsodko.”

 Dagiti gimong ken taripnong. Adda dagiti sign language a kongregasion ken grupomi iti intero a lubong. Ket kada lawas, agkakadua ditoy dagiti umel tapno agsursuro ken agdaydayaw. Iti kada tawen, adda met dagiti or-organisarenmi a daddadakkel a taripnong iti sign language a nairanta a mangisuro maipapan iti Biblia. Kadagiti gimong ken taripnongmi, adda maar-aramid a tactile interpreting. Maysa a pamay-an daytoy ti panagsenias nga arikapen ti maysa nga agpada a bulsek ken umel dagiti ima ti parasenias tapno maawatanna ti maisensenias. Agar-aramidkami met kadagiti braille a publikasion, ken libre dagita.

•   Birokem ti kongregasion nga asideg iti lugarmo.

•   Ammuem ti maipapan kadagiti tinawen a kombension ken asambleami.

•   Atenderam ti Memorial ti ipapatay ni Jesus, ti kapatgan nga okasionmi iti kada tawen.

 Ni José Luis Ayala ket taga-Mexico. Nayanak nga umel, sa idi kuan, nagbalin a bulsek. Ammuem no kasano a natulongan nga agbalin nga epektibo a mannursuro iti Biblia.