Ania ti Ibaga ti Biblia Maipapan iti Kinakurang ti Makan Ita?

I-PLAY

“Awan ti agbisin.” Ipakita dagita a sasao ti kayat nga aramiden dagiti lider ti lubong maipapan iti maysa kadagiti kadakkelan a problema ti tao—ti panangipaay iti makan para iti amin. a Ngem addanto kadi tiempo nga awanen ti agbisin? Ania ti ibaga ti Biblia?

Impakpakauna ti Biblia ti kinakurang ti makan

Impadto ti Biblia nga agkurangto ti makan iti tiempotayo, iti panawen nga aw-awagan ti Biblia iti “maudi nga al-aldaw.” (2 Timoteo 3:1) Saan a ti Dios ti makingapuanan kadagitoy a kinakurang ti makan, ngem pinakdaarannatayo maipapan kadagita. (Santiago 1:13) Kitaem ti dua a padto ti Biblia.

“Addanto . . . bisin . . . iti nadumaduma a lugar.” (Mateo 24:7) Ipakita daytoy a padto ti Biblia nga addanto bisin iti adu a lugar. Makapainteres ta ibaga ti nabiit pay a report manipud kadagiti agmonmonitor iti suplay ti makan: “Kumarkaro ti bisin, kinakurang ti makan, ken malnutrision iti lubong.” b Ginasut a milion a tattao iti adu a pagilian ti saan a makaal-ala iti taraon a kasapulanda. Makapaladingit ta kas resultana, adu ti matmatay.

“Adtoy! adda nangisit a kabalio, ken nakaiggem iti pagtimbangan daydiay nakasakay.” (Apocalipsis 6:5) Iti daytoy a padto, ti simboliko a kabalio ken ti nakasakay iti dayta irepresentarda ti bisin iti maudi nga al-aldaw. c Ti pagtimbangan nga ig-iggaman ti nakasakay ket maus-usar a pagtimbang iti limitado a suplay ti makan. Bayat nga agpatpataray daytoy a kumakabalio, adda timek a nangibaga a nakanginnginanto ti presio dagiti makan ken pakpakdaaranna dagiti tattao nga in-inutenda dagiti suplay ti makan. (Apocalipsis 6:6) Kasta a talaga ti mapaspasamak ita a krisis iti makan, ta binilion a tattao ti saan a makabirok wenno makagatang kadagiti nasustansia a taraon.

No kasano nga agpatingga ti kinakurang ti makan

Kuna dagiti eksperto a mangpatpataud ti planetatayo iti makan nga ad-adu pay ngem iti kasapulan tapno mapakan ti amin. Ania ngarud dagiti problema a pakaigapuan ti kinakurang ti makan? Ken ania ti ibaga ti Biblia nga aramiden ti Namarsua kadatayo a ni Jehova d tapno masolbar dagitoy a problema?

Problema: Saan a maikkat dagiti gobierno ti kinapanglaw ken saan a patas a panagbiag dagiti tattao a rason nga adu ti agbisbisin.

Solusion: Dagiti imperpekto a gobierno ti tao ket suktanto ti perpekto a gobierno—ti Pagarian ti Dios. (Daniel 2:44; Mateo 6:10) Adu a napanglaw ita ti saan a kanayon a makagatang iti makanda, ngem saanton a kasta iti panangituray ti Pagarian ti Dios. Ibaga ti Biblia maipapan ken Jesu-Kristo, ti Ari ti Pagarian ti Dios: “Ispalennanto dagiti napanglaw nga agpatpatulong, agraman dagiti marigrigat ken ti asinoman nga awan katulonganna. . . . Naruayto dagiti bukbukel ditoy daga; nagadunto ti maani iti rabaw dagiti bantay.”—Salmo 72:12, 16.

Problema: Gapu kadagiti gubat, adu ti madaddadael ken maap-apektaran ti ekonomia, isu a malimitaran wenno agsardeng ti pannakaiwaras ti suplay ti makan.

Solusion: “Pagsarsardengen [ni Jehova] dagiti gubat iti intero a daga. Tukkolenna dagiti pana ken putdenna dagiti pika; puoranna dagiti lugan ti militar.” (Salmo 46:9) Dadaelento ti Dios dagiti armas a pakigubat ken dagiti mangirugrugi iti gubat. Kas resultana, natalged ken nalakanton a makaala iti taraon ti amin. Ikarkari ti Biblia: “Umadunto dagiti nalinteg, ken agsaknapto ti talna.”—Salmo 72:7.

Problema: Gapu iti nakaro a paniempo ken natural a didigra, madaddadael dagiti mula ken matmatay dagiti taraken nga animal.

Solusion: Kontrolento ti Dios dagiti puersa ti nakaparsuaan tapno sumayaat ti kasasaad ket adu ti mapataud a taraon. Imbaga ti Biblia: “Pinagkalma [ni Jehova] ti nakapigpigsa nga angin; ket nagtalna dagiti dalluyon ti baybay. . . . Pinagbalinna a danaw dagiti desierto, ken pinagbalinna nga ubbog ti danum ti natikag a daga. Pinagyanna sadiay dagiti mabisin . . . Nagmulada kadagiti ubas ken minulaanda dagiti kataltalonan a nangpataud iti apit nga aglaplapusanan.”—Salmo 107:29, 35-37.

Problema: Mangpatpataud dagiti naagum ken korap a tattao iti saan a natalged a makan wenno laplapdanda a dumanon dagiti makan kadagiti agkasapulan iti dayta.

Solusion: Pukawento ti Pagarian ti Dios ti amin a nakusit ken korap a tattao. (Salmo 37:10, 11; Isaias 61:8) Deskribiren ti Biblia ni Jehova a Dios kas “Daydiay mangmangted iti hustisia kadagiti biktima ti panangloko, Daydiay mangmangted iti makan kadagiti mabisin.”—Salmo 146:7.

Problema: Kakatlo ti suplay a taraon iti lubong ti masaysayang wenno madaddadael iti kada tawen.

Solusion: Iti panagturay ti Pagarian ti Dios, nasayaatton ti pannakaasikaso ti suplay ti taraon. Idi adda ni Jesus ditoy daga, inkagumaanna nga awan ti masayang a makan. Kas pagarigan, iti maysa a gundaway, simimilagro a pinakanna ti nasurok a 5,000 a tattao. Idi agangay, imbilinna kadagiti adalanna: “Urnongenyo dagiti natedda, tapno awan ti masayang.”—Juan 6:5-13.

Gapu ta ikkatenton ti Pagarian ti Dios dagiti pakaigapuan ti bisin, tagiragsakenton ti amin a tao ti aglaplapusanan a nasayaat ken nasustansia a taraon. (Isaias 25:6) Tapno maammuam no kaano nga itungpal dayta ti Pagarian ti Dios, kitaem ti artikulo a “Kaano nga Iturayan ti Pagarian ti Dios ti Daga?”

a Ti 2030 Agenda for Sustainable Development, nga inanamongan ti amin a miembro ti United Nations idi 2015.

b Napagtitipon a report ti Food and Agriculture Organization of the United Nations, International Fund for Agricultural Development, United Nations Children’s Fund, United Nations World Food Programme, ken World Health Organization.

c Tapno maammuam ti ad-adu pay maipapan iti uppat a kumakabalio iti Apocalipsis, kitaem ti artikulo a “Ti Uppat a Kumakabalio—Siasinoda?”

d Jehova ti personal a nagan ti Dios. (Salmo 83:18) Kitaem ti artikulo nga “Asino ni Jehova?”