Adu a kinaranggas gapu iti politika ti mapaspasamak, isu a madandanagan dagiti tattao iti intero a lubong.

•   Gimmulo ti 2023-2024 nga eleksion idiay Mexico gapu ta napapatay ti 39 a kandidato—ti kaaduan pay laeng a naireport a napapatay gapu iti politika. Malaksid iti dayta, adda pay dadduma a kinaranggas a napasamak.

•   Iti nabiit pay idiay Europe, adu a kinaranggas ti napasamak gapu iti politika, a pakairamanan ti gandat a panangpapatay iti prime minister ti Slovakia idi Mayo 15, 2024.

•   Nariribuk ti United States gapu iti maikadua a gandat a panangpapatay iti dati a presidente a ni Donald Trump idi Septiembre 15, 2024.

 Apay a nakaad-adu ti kinaranggas gapu iti politika? Agpatingganto pay ngata dayta? Ania ti ibaga ti Biblia?

 Nabayagen nga imbaga ti Biblia nga iti tiempotayo a maaw-awagan iti “maudi nga al-aldaw,” adu a tattao ti addaanto kadagiti ugali a mangpakpakaro iti kinaranggas ken di panagkikinnaawatan.

•   “Iti maudi nga al-aldaw, dumtengto dagiti delikado ken narigat a tiempo. Ta . . . dagiti tattao [ket] . . . saan a managyaman, saan a matalek, . . . saanda a kayat ti makitulag, . . . nauyong, . . . traidor, natangken ti uloda, napannakkel.”—2 Timoteo 3:1-4.

 Nabayag metten a naibaga iti Biblia nga iti maudi nga al-aldaw, normalto laengen dagiti riribuk kas iti panagrebelde iti gobierno ken gulo iti politika. (Lucas 21:9, footnote) Ngem agpatingganto ti kinaranggas gapu iti politika ken pannakabingaybingay.

 Ibaga ti Biblia a ti amin a gobierno ti tao ket suktanto ti Dios iti gobiernona idiay langit.

•   “Mangipasdekto ti Dios ti langit iti maysa a pagarian. . . . Rumeken ken pagpatinggaennanto amin dagitoy [a dadduma pay] a pagarian, ket daytanto laeng ti agtalinaed iti agnanayon.”—Daniel 2:44.

 Iti panangituray ti Pagarian ti Dios, agkaykaysanton dagiti tattao ken natalnanton ti intero a lubong.

•   Ti Agturay a ni Jesu-Kristo ket maawagan iti “Prinsipe ti Kappia,” ken siguraduenna a “saanto nga agpatingga ti kappia.”—Isaias 9:6, 7.

•   Uray ita, sursuruenen dagiti iturturayan dayta a Pagarian no kasano ti agbalin a mannakikappia. Gapu iti dayta, ibaga ti Biblia: “Pitpitendanto ti espadada a pagbalinen a subsob ti arado ken dagiti pikada a pagbalinen a kumpay. Saanto a mangilayat ti nasion iti espada maibusor iti sabali a nasion, ken saandanto metten a sursuruen ti makigubat.”—Isaias 2:3, 4.

 Tapno maammuam ti ad-adu pay, basaem ti artikulo nga “Anianto ti Aramiden ti Pagarian ti Dios?” ken buyaem ti video nga Ania ti Pagarian ti Dios?