Agtultuloy ti krisis iti makan iti intero a lubong gapu iti gubat idiay Ukraine ken gapu kadagiti epekto ti climate change. Nangnangruna a kasta kadagiti saan a narang-ay a pagilian nga adu ti umilina nga agkurkurang iti makan.

•   “Maap-apektaran ti panangpataud ken suplay ti makan gapu kadagiti gubat, climate change, ingingina ti gasolina ken koriente, ken dadduma pay.”—António Guterres, UN secretary-general, Hulio 17, 2023.

•   “Pampanunoten dagiti eksperto a ti panagikkat ti Russia manipud iti grain export agreement pakaruenna ti krisis iti makan iti intero a lubong ken ad-adda a ngumina dagiti makan kadagiti saan a nabaknang a pagilian, nangnangruna iti North Africa ken Middle East.”—Atalayar.com, Hulio 23, 2023.

 Kitaem ti ibagbaga ti Biblia maipapan iti krisis iti makan ken iti masanguanan.

•   Impadto ni Jesus: “Bumusorto ti nasion iti sabali a nasion ken ti pagarian iti sabali a pagarian, ket addanto met bisin.”—Mateo 24:7.

•   Deskribiren ti libro ti Biblia nga Apocalipsis ti uppat a simboliko a kumakabalio. Irepresentar ti maysa kadagita a kumakabalio ti gubat. Sarunuen dayta ti sabali pay a mangirepresentar iti bisin, iti tiempo a limitado ti makan ken nakanginngina ti presiona. “Maysa a nangisit a kabalio ti nakitak. Adda pagtimbangan nga iggem ti nagsakay. Nangngegko ti maysa a timek . . . ‘Sangkasukat a trigo ti pakaigatangan ti maysa a denario, ken tallo kasukat a sebada ti pakaigatangan ti maysa a denario.’”—Paltiing 6:5, 6, Ti Baro a Naimbag a Damag Biblia.

 Dagitoy a padto ti Biblia maipapan iti krisis iti makan ket matungtungpalen ita, ti tiempo nga aw-awagan ti Biblia iti “maudi nga al-aldaw.” (2 Timoteo 3:1) Tapno maammuam ti ad-adu pay maipapan iti “maudi nga al-aldaw” ken iti panagpataray ti uppat a kumakabalio a nailadawan iti Apocalipsis, buyaem ti video a Nagbalbaliw ti Lubong Sipud 1914 ken basaem ti artikulo a “Ti Uppat a Kumakabalio—Siasinoda?”

•   Ti Biblia ket naglaon kadagiti praktikal a balakad a makatulong kadatayo a mangsango kadagiti narigat a situasion, a pakairamanan ti ingingina wenno uray ti krisis iti makan. Kitaem ti dadduma a pagarigan iti artikulo a “No Kasano a Mayan-anay ti Bassit a Kuarta.”

•   Kasta met, ti Biblia ket mangted kadatayo iti namnama a sumayaatto dagiti bambanag. Ikarkarina ti tiempo a “naruayto dagiti bukbukel ditoy daga” ken adunto ti makan ti amin. (Salmo 72:16) Tapno maammuam ti ad-adu pay maipapan iti daytoy a namnama iti masanguanan ken no apay a makapagtalekka iti dayta, basaem ti artikulo nga “Adda Nasaysayaat a Masakbayan.”