Nagkaro ti kinaranggas nga ar-aramiden dagiti gang idiay Haiti. Nakaad-adu dagiti naranggas a krimen idiay South Africa ken Mexico, kasta met iti dadduma a pagilian iti Latin America. Uray kadagiti lugar a bimmaban ti mapaspasamak a kinaranggas, madandanagan latta ken saan a natalged ti rikna dagiti tattao gapu kadagiti mairepreport a krimen a kas iti panagtakaw, panagperdi, ken panagpuor.

 Ania ti ibaga ti Biblia maipapan iti kinadakes a mapaspasamak iti intero a lubong?

 Impakpakauna ti Biblia a ti kinadakes a mapaspasamak ita ket paset ti pagilasinan “ti panungpalan daytoy a sistema ti bambanag.” (Mateo 24:3) Daytoy ti imbaga ni Jesu-Kristo idi inladawanna dagiti pasamak a karaman iti dayta a pagilasinan:

•   “Gapu iti ikakaro ti kinadakes, lumamiisto ti ayat ti ad-adu.”—Mateo 24:12.

 Impakpakauna met ti Biblia nga “iti maudi nga al-aldaw,” dagiti tattao ket “awanan panagteppel, nauyong, kagurada ti kinaimbag.” (2 Timoteo 3:1-5) Gapu kadagita a managimbubukodan nga ugali dagiti tattao, kumarkaro ti kinadakes a makitkitatayo ita.

 Ngem adda namnamatayo. Ikarkari ti Biblia a dandanin mapukaw ti kinadakes.

•   “Iti saanen a mabayag, awanton dagiti managdakdakes; kitaemto ti dati nga ayanda, ket awandanton. Ngem dagiti naemma kukuadanto ti daga, ken maragragsakandanto unay iti naruay a talna.”—Salmo 37:10, 11.

 Ammuem ti ad-adu pay maipapan iti namnama nga ibagbaga ti Biblia ken no apay a masiguradom a dagiti pasamak a makitkitatayo ita ket kaitungpalan dagiti padto ti Biblia. Kitaem dagitoy nga artikulo.

 “Adda Nasaysayaat a Masakbayan”

 “Ania ti Pagilasinan ti ‘Maudi nga Al-aldaw,’ Wenno ‘Tiempo ti Panungpalan’?”

 “Impakpakauna Kadi ti Biblia ti Kababalin ken Ar-aramid Dagiti Tattao Ita?”