AGTULTULOYKAYO NGA AGBANTAY!
Panagngina Dagiti Gagatangen iti Intero a Lubong—Ania ti Ibaga ti Biblia?
“Delikado manen ti ekonomia ti intero a lubong,” impakdaar ti presidente ti World Bank Group iti report idi Hunio 2022. “Ita, saan la a nangina dagiti magatang ken serbisio, no di ket bassit pay ti kuarta dagiti tattao.”
“Nagpartak a ngimmina ti gasolina ken makan. Ti nakaro a naapektaran ket dagiti tattao kadagiti napanglaw a pagilian,” kuna ti International Monetary Fund.
Makatulong ti Biblia tapno maawatantayo no apay a maipaspasangotayo kadagiti kastoy a problema ti ekonomia, no kasanotayo a sanguen dagita, ken no ania ti permanente a solusion nga ikarkarina.
Nguminngina a gagatangen iti “maudi nga al-aldaw”
Awagan ti Biblia ti tiempo a pagbibiagantayo ita a “maudi nga al-aldaw.”—2 Timoteo 3:1.
Imbaga ni Jesus nga addanto “dagiti nakabutbuteng a buya,” wenno nakaam-amak a pasamak bayat daytoy a tiempo. (Lucas 21:11) Mabutbuteng dagiti tattao iti napartak a panagngina dagiti gagatangen. Madandanaganda iti masakbayanda ken no kabaelandanto pay nga ipaay ti kasapulan ti pamiliada.
Impakpakauna ti libro ti Biblia nga Apocalipsis ti ingangato ti presio ti makan bayat daytoy a tiempo. “Nangngegko ti maysa a timek . . . ‘Sangkasukat a trigo ti pakaigatangan ti sueldo iti maysa nga aldaw, ken tallo kasukat a sebada ti pakaigatangan ti sueldo iti maysa nga aldaw.’”—Paltiing (wenno, Apocalipsis) 6:6, Naimbag a Damag Biblia.
Tapno maammuam ti maipapan iti “maudi nga al-aldaw” ken ti padto iti libro ti Biblia nga Apocalipsis, buyaem ti video a Nagbalbaliw ti Lubong Sipud 1914 ken basaem ti artikulo a “Ti Uppat a Kumakabalio—Siasinoda?”
Ti solusion ti amin a problema ti ekonomia
“Mangbangondanto kadagiti balay ket agnaedda kadagita, ken agmuladanto kadagiti ubas ket kanenda ti bungada. Didanto mangbangon ket sabali ti agnaed, didanto agmula ket sabali ti mangan.”—Isaias 65:21, 22.
“Naruayto dagiti bukbukel ditoy daga; nagadunto ti maani iti rabaw dagiti bantay.”—Salmo 72:16.
“‘Gapu ta marigrigatan dagiti mairurrurumen, gapu ta umas-asug dagiti napanglaw, agtignayakto,’ kuna ni Jehova.”—Salmo 12:5. a
Asidegen a pagpatinggaen ti Dios ti saan a patas a kasasaad ti ekonomia, saan laeng nga iti maysa a pagilian no di ket iti intero a lubong. Tapno maammuam no kasano, basaem ti artikulo a “Posible Kadi a Pataston ti Biag ti Baknang ken Pobre?”
Ngem uray ita, matulongannatayo ti Biblia a mangsango iti nguminngina a presio dagiti gagatangen. Kasano? Mangted ti Biblia kadagiti praktikal a pammagbaga no kasanom nga usaren a naimbag ti kuarta. (Proverbio 23:4, 5; Eclesiastes 7:12) Tapno maammuam ti ad-adu pay, basaem dagiti artikulo a “Protektaram ti Pagsapulam” ken “No Kasano a Mayan-anay ti Bassit a Kuarta.”
a Jehova ti personal a nagan ti Dios.—Salmo 83:18.