Idi Mayo 19, 2022, kastoy ti naammuan ti United Nations Security Council manipud iti nasurok a 75 a nangato nga opisial: “Ti sangalubongan a krisis iti makan, a pinakaro ti COVID-19 pandemic ken panagbalbaliw ti klima (climate change), ket kimmaro pay gapu iti gubat idiay Ukraine isu a mabalin nga adda panagbisin iti agduduma a paset ti lubong.” Di agbayag, imbaga ti The Economist, “gapu iti gubat, lalo a kumaro ti problema ti lubong ta umad-adu pay ti tattao nga agbisin.” Impakpakauna ti Biblia a mapasamak dagiti kastoy a krisis iti makan iti tiempotayo, ngem mangipaay met iti tulong tapno kabaelantayo a sanguen dagita.

•    Impakpakauna ni Jesus: “Bumusorto ti nasion iti sabali a nasion ken ti pagarian iti sabali a pagarian, ket addanto met bisin.”—Mateo 24:7.

•    Nailadawan ti uppat a simboliko a kumakabalio iti libro ti Biblia nga Apocalipsis. Irepresentar ti maysa kadagiti kumakabalio ti gubat. Sarunuen dayta ti sabali pay a kumakabalio a mangirepresentar iti bisin, isu a nakarigrigatto ti makaala iti makan ken nakanginngina dayta. “Kimmitaak, ket adda nangisit a kabalio. Nakaiggem ti nakasakay iti maysa a pagtimbangan. Nangngegko ti maysa a timek . . . ‘Sangkasukat a trigo ti pakaigatangan ti sueldo iti maysa nga aldaw, ken tallo kasukat a sebada ti pakaigatangan ti sueldo iti maysa nga aldaw.’”—Paltiing (wenno, Apocalipsis) 6:5, 6. Naimbag a Damag Biblia.

 Dagita a padto ti Biblia maipapan iti krisis iti makan ket matungtungpal itan, ti tiempo nga aw-awagan ti Biblia a “maudi nga al-aldaw.” (2 Timoteo 3:1) Tapno maammuam ti maipapan iti “maudi nga al-aldaw” ken ti panagpataray ti uppat a kumakabalio iti Apocalipsis, buyaem ti video a Nagbalbaliw ti Lubong Sipud 1914 ken basaem ti artikulo a “Ti Uppat a Kumakabalio—Siasinoda?”

•    Adda dagiti praktikal a balakad iti Biblia a makatulong kadatayo a mangsango kadagiti narigat a situasion, a pakairamanan ti nangina a makan ken uray ti panagbisin. Mabasam ti dadduma kadagita iti artikulo a “No Kasano a Mayan-anay ti Bassit a Kuarta.”

•    Mangted met kadatayo ti Biblia iti namnama a sumayaatto ti kasasaad. Ikarkarina a “naruayto dagiti bukbukel ditoy daga” ken adunto ti makan para iti amin. (Salmo 72:16) Tapno maammuam ti ad-adu pay maipapan iti ibagbaga ti Biblia a namnama iti masanguanan ken no apay a mapagtalkam dayta, basaem ti artikulo nga “Adda Nasaysayaat a Masakbayan.”