Maawanto Kadin ti Terorismo?
Kalpasan ti terorismo, normal laeng a maisaludsodmo: ‘Ay-ayatennakami kadi ti Dios? Apay a mapaspasamak dagitoy? Maawanto kadin ti terorismo? a Kasano a malabanak ti buteng a marikriknak?’ Adda nagsayaat a sungbat ti Biblia kadagita a saludsod.
Ania ti rikna ti Dios iti terorismo?
Kagura ti Dios ti kinaranggas ken terorismo. (Salmo 11:5; Proverbio 6:16, 17) Ni Jesus, a pannakabagi ti Dios, inlintegna dagiti adalanna idi nangipakitada iti kinaranggas. (Mateo 26:50-52) Uray no ibagbaga ti dadduma a para iti Dios ti ar-aramidenda a kinaranggas ken panangatake, saan nga aprobaran dayta ti Dios. Ti agpayso, saanna pay ketdi a denggen dagiti kararagda.—Isaias 1:15.
Ipatpateg ti Dios dagiti agrigrigat, agraman dagiti biktima ti terorismo. (Salmo 31:7; 1 Pedro 5:7) Ipakita met ti Biblia nga addanto aramiden ti Dios a mangpasardeng iti kinaranggas.—Isaias 60:18.
Ti ramut ti terorismo
Ipakita ti Biblia ti agpaypayso a ramut ti terorismo: “Iturturayan ti tao ti padana a tao iti pakadangranna.” (Eclesiastes 8:9) Iti intero a pakasaritaan ti tao, us-usaren dagiti tattao nga adda autoridadna ti terorismo a mangparigat kadagiti biktimaenda. Gapu iti dayta, bumales met dagiti biktima babaen ti terorismo.—Eclesiastes 7:7.
Ti makapasardeng iti terorismo
Ikarkari ti Dios a pukawennanto ti kinaranggas ken dagiti pagbutbutngan dagiti tattao ken pagbalinennanto a natalna ti daga. (Isaias 32:18; Mikias 4:3, 4) Dagitoyto ti aramidenna:
Ikkatennanto ti ramut ti terorismo. Suktanto ti Dios dagiti gobierno ti tao iti gobiernona a mangituray iti intero a daga. Ni Jesu-Kristo ti Agturay iti daytoy a gobierno. Patasto ti panangtratona iti amin ken awanton ti kinaranggas ken saanton a maparigat dagiti tattao. (Salmo 72:2, 14) Awanton ti agaramid iti terorismo. ‘Maragsakanto unay [dagiti tattao] iti naruay a talna.’—Salmo 37:10, 11.
Ikkatennanto dagiti epekto ti terorismo. Paimbagento ti Dios dagiti naapektaran iti pisikal wenno emosional gapu iti terorismo. (Isaias 65:17; Apocalipsis 21:3, 4) Ikarkarina pay ketdi a pagbiagennanto manen dagiti natay iti natalna a situasion ditoy daga.—Juan 5:28, 29.
Adda dagiti mabasatayo iti Biblia a nasayaat a rason tapno patientayo a dandanin agtignay ti Dios. Ngem mabalin a maisaludsodmo, ‘Apay a saan pay laeng a pinagpatingga ti Dios ti terorismo ita?’ Tapno maammuam ti sungbat, buyaem ti video nga Apay nga Ipalpalubos ti Dios ti Panagsagaba?
a Ti “terorismo” ket kaaduanna a tumukoy iti panangusar iti kinaranggas—nangnangruna maikontra kadagiti sibilian—tapno butbutngenda dagiti tattao ket maaramidda ti ilablabanda a panagbalbaliw iti politika, relihion, wenno kagimongan. Ngem agduduma ti kapanunotan dagiti tattao no ania ti maibilang a terorismo.
Baka Kayatmo Met ti
KANAYONAN A TOPIKO
No Kasano a Makontrol ti Panagdanag
Ania dagiti tip ken bersikulo ti Biblia a makatulong tapno maksayan ti sobra a panagdanagmo?
KANAYONAN A TOPIKO
Adda Nasaysayaat a Masakbayan
Apay a naiduma dagiti ikarkari ti Biblia kadagiti ikarkari ken ibagbaga dagiti tattao a mapasamak?
SUNGBAT DAGITI SALUDSOD MAIPAPAN ITI BIBLIA
Ania ti Pagarian ti Dios?
Ammuem no apay a nasaysayaat ti gobierno ti Dios ngem iti amin a gobierno.
TI PAGWANAWANAN
Ania ti Aramiden ti Pagarian ti Dios?
Ammo ni Jesus a ti laeng Pagarian ti Dios ti makasolbar kadagiti problema ditoy daga. Ania ti naaramidanen dayta a Pagarian tapno agtalektayo iti dayta?
KANAYONAN A TOPIKO
Addanto Pay Ngata Kinahustisia?
Ibaga ti Biblia a ti Dios, nga agpapada ti panangipategna iti biag ti tunggal tao, iyegnanto ti pudpudno a hustisia.
NAGPAPATEG A PANNURSURO TI BIBLIA
Apay nga Ipalpalubos ti Dios ti Panagsagaba?
Adu ti agsalsaludsod no apay a napno ti lubong iti gura ken panagsagaba, wenno panagrigrigat. Naglaon ti Biblia iti makapnek ken makaliwliwa a sungbat.
