Idi Domingo, Nobiembre 20, 2022, nalpas ti COP27 United Nations Climate Change Conference. Napagdesisionan dagiti nasion a tulonganda iti pinansial dagiti marigrigat a pagilian tapno makabangonda kadagiti kalamidad gapu iti climate change wenno panagbalbaliw ti klima. Ngem bigbigen ti adu a saan a dayta ti solusion iti ramut ti problema.

•   “Maragsakanak iti desision nga adda mailasin nga espesial a pondo para kadagiti naapektaran iti climate change,” imbaga ni António Guterres, secretary-general ti United Nations, idi Nobiembre 19, 2022. “Ngem ammotayo a saan nga umanay dayta . . . Agngangabit latta ti planetatayo.”

•   “Agpelpeligro latta ti lubongtayo iti grabe nga epekto ti climate change.”—Mary Robinson, dati a presidente ti Ireland ken dati a UN High Commissioner for Human Rights, Nobiembre 20, 2022.

 Dagiti agtutubo ti mas madanagan iti masakbayan ti planetatayo. Ngem makapagtitinnulong kadi dagiti nasion a mangtungpal iti karida a mangsolbar iti climate change? Ania ti ibaga ti Biblia?

 Ibaga ti Biblia nga uray no agporporsegi dagiti nasion a mangsolbar kadagiti epekto ti problema ti klima, limitado ti maaramidanda. Kitaentayo ti dua a rason:

•   “Saanen a mailinteg ti killo.”—Eclesiastes 1:15.

   Kayatna a sawen: Limitado ti maaramidan dagiti gobierno gapu ta saan a nairanta nga iturayan dagiti tattao ti bagbagida. (Jeremias 10:23) Uray no agkaykaysa dagiti nasion ken aramidenda ti amin a kabaelanda, saanda a kaya a solbaren dagiti problema ti lubong.

•   “Ta ay-ayatento laeng dagiti tattao ti bagbagida, managayat iti kuarta, . . . saanda a kayat ti makitulag.”—2 Timoteo 3:2, 3.

   Kayatna a sawen: Impakpakauna ti Biblia nga adu a tattao ti agbalin a managimbubukodan wenno bagbagida laeng ti ay-ayatenda. Saanda a kayat ti makitinnulong iti sabsabali para iti pagsayaatan ti amin.

 Saan a nakadepende ti masakbayan ti planetatayo kadagiti kari ti gobierno ti tao. Nangipaay ti Dios iti makabael a Mangituray iti lubong, ni Jesu-Kristo. Kuna ti Biblia maipapan kenkuana:

•   “Maiparabawto iti abagana ti gobierno. Mapanagananto iti Masirib a Mamalbalakad, Mannakabalin a Dios, Agnanayon nga Ama, Prinsipe ti Kappia.”—Isaias 9:6, footnote.

 Ni Jesus ti Ari ti Pagarian ti Dios, wenno nailangitan a gobierno. (Mateo 6:10) Addaan isuna iti pannakabalin, sirib, ken tarigagay a mangaywan iti planetatayo ken kadagiti agnanaed iti dayta. (Salmo 72:12, 16) Iti panangiturayna, pagsardengento ti gobierno ti Dios dagiti “mangperperdi iti daga” ken tarimaanenna ti planeta a daga.—Apocalipsis 11:18, footnote; Isaias 35:1, 7.

 Tapno maammuam ti ad-adu pay maipapan iti kasayaatan a solusion para iti makadadael nga epekto ti climate change, basaem ti artikulo a “Ti Panagbaliw ti Klima ken ti Masakbayantayo—Ti Ibaga ti Biblia.”