Pampanunotem kadi a sumayaat pay ti situasiontayo? Ikarkarigatan ti adu a tattao ti agtalinaed a positibo uray nakaro dagiti problema a pakaipaspasanguantayo ita. Ngem talaga kadi a manamnamatayo a sumayaat pay ti situasion? Wen! Ibagbaga ti Biblia nga adda nasaysayaat a masakbayan.

•  Ania a namnama ti ikarkari ti Biblia?

•  Kasla kadi imposible ti namnama nga ibagbaga ti Biblia?

•  Kasano a matungpal daytoy a namnama?

•  Kaano a matungpal daytoy a namnama?

•  Kasano a matulongannaka ita ti namnama nga ibagbaga ti Biblia?

 Ibagbaga ti Biblia a maipasango dagiti tattao kadagiti nakaro a problema. Ngem ikarkarina nga agpatingganto dagitoy a problema a mangparparigat kadatayo. Kitaentayo ti dadduma a pagarigan.

•   Problema: Awan ti balay

   Ti kuna ti Biblia: “Mangbangondanto kadagiti balay ket agnaedda kadagita.”—Isaias 65:21.

   Ti kaitungpalanna iti masanguanan: Addanto bukod a balay dagiti tattao.

•   Problema: Awan ti trabaho ken kinarigat ti biag

   Ti kuna ti Biblia: “Naan-anayto a tagiragsaken dagiti pinilik ti aramid ti imada.”—Isaias 65:22.

   Ti kaitungpalanna iti masanguanan: Addanto makapnek, naragsak, ken makagunggona a trabaho ti amin a tao.

•   Problema: Awan ti hustisia

   Ti kuna ti Biblia: “Agturayto dagiti prinsipe para iti kinahustisia.”—Isaias 32:1.

   Ti kaitungpalanna iti masanguanan: Awanton ti maidumduma gapu iti puli ken kasasaad iti biag. Pataston ti pannakatrato ti amin.

•   Problema: Malnutrision ken Bisin

   Ti kuna ti Biblia: “Naruayto dagiti bukbukel ditoy daga; nagadunto ti maani iti rabaw dagiti bantay.”—Salmo 72:16.

   Ti kaitungpalanna iti masanguanan: Nakaad-adunto ti nasustansia a makan para iti amin. Awanton ti agbisin ken makapasar iti malnutrision.

•   Problema: Krimen ken kinaranggas

   Ti kuna ti Biblia: “Agtugawto ti tunggal maysa iti sirok ti ubasna ken iti sirok ti kayona a higos, ken awanto ti pagbutnganda.”—Mikias 4:4.

   Ti kaitungpalanna iti masanguanan: Natalnanton ti rikna dagiti tattao ken awan ti pagbutnganda ta awanton dagiti dakes a tattao, ket “dagiti nalinteg kukuadanto ti daga.”—Salmo 37:10, 29.

•   Problema: Gubat

   Ti kuna ti Biblia: “Saanto a mangilayat ti nasion iti espada maibusor iti sabali a nasion, ken saandanto metten a sursuruen ti makigubat.”—Isaias 2:4.

   Ti kaitungpalanna iti masanguanan: Addanto talna iti intero a daga. (Salmo 72:7) Awanton ti agladingit ta natay ti ay-ayatenna gapu iti gubat wenno awanton ti pumanaw iti lugarda gapu iti gubat.

•   Problema: Sakit

   Ti kuna ti Biblia: “Awanto ti residente a mangibaga: ‘Masakitak.’”—Isaias 33:24.

   Ti kaitungpalanna iti masanguanan: Awanton ti agsakit wenno addaan iti pisikal a depekto. (Isaias 35:5, 6) Ikarkari ti Biblia nga “awanton ni patay.”—Apocalipsis 21:4.

•   Problema: Pannakaperdi ti aglawlaw

   Ti kuna ti Biblia: “Agragsakto ti let-ang ken ti natikag a daga, ket agrag-onto ti desierto ken agsabongto a kas iti safron.”—Isaias 35:1.

   Ti kaitungpalanna iti masanguanan: Agbalinto a paraiso ti intero a daga a pagyanan ti tao. Dayta ti talaga a panggep ti Dios.—Genesis 2:15; Isaias 45:18.

 Normal laeng a mariknam dayta. Ngem awisendaka nga ammuem ti ad-adu pay maipapan iti masanguanan nga ibagbaga ti Biblia. Apay? Ngamin, naiduma dagiti ikarkari ti Biblia kadagiti ikarkari ken ibagbaga dagiti tattao a mapasamak. Naggapu iti Dios dagiti ikarkari ti Biblia. Dagitoy ti nagdakkel a nakaidumaanna:

•   Makapagtalekka iti Dios. Ibagbaga ti Biblia a “saan a mabalin nga agulbod” ti Dios. (Tito 1:2) Ken ti laeng Dios ti makaibaga iti mapasamak iti masanguanan. (Isaias 46:10) Adu ti mabasatayo a pagarigan iti Biblia a mangpaneknek a kanayon a matungpal ti ibaga ti Dios. Para iti ad-adu pay nga impormasion, buyaem ti video a Kasanotayo a Masigurado a Pudno ti Biblia?

•   Adda pannakabalin ti Dios a mangsolbar iti amin a problematayo. Ibagbaga ti Biblia nga adda pannakabalin ti Dios a mangaramid iti “amin a pagragsakanna.” (Salmo 135:5, 6) Kayatna a sawen, awan ti makalapped iti Dios a mangtungpal kadagiti karina. Ken kayatnatayo a tulongan ti Dios gapu ta ay-ayatennatayo.—Juan 3:16.

 Baka pampanunotem, ‘No kayatnatayo a tulongan ti Dios ken adda pannakabalinna a mangaramid iti dayta, apay ngarud nga adu latta ti problematayo?’ Tapno masungbatan dayta a saludsod, buyaem ti video nga Apay nga Ipalpalubos ti Dios ti Panagsagaba?

 Usaren ti Dios ti Pagarianna, maysa a gobierno idiay langit, a mangtungpal kadagiti karina. Inapointaranna ni Jesu-Kristo kas Agturay iti dayta a Pagarian, ken inikkanna iti autoridad a mangasikaso iti daga ken kadagiti tattao. Idi adda ni Jesus ditoy daga, pinaimbagna dagiti masakit, pinakanna dagiti mabisbisin, kinontrolna ti paniempo, ken pinagungarna pay dagiti natay. (Marcos 4:39; 6:41-44; Lucas 4:40; Juan 11:43, 44) Isu nga impakitana dagiti aramidennanto kas Ari ti Pagarian ti Dios.

 Buyaem ti video nga Ania ti Pagarian ti Dios? tapno maammuam ti ad-adu pay no ania ti aramiden ti Pagarian ti Dios para kenka.

 Dandanin! Apay a sigurado dayta? Impakpakauna ti Biblia dagiti pasamak a mangipakita a dandanin agturay ti Pagarian ti Dios iti intero a daga. (Lucas 21:10, 11) Dagiti mapaspasamak iti lubong ita ket eksakto nga impakpakauna ti Biblia.

 Tapno maammuam ti ad-adu pay, basaem ti artikulo a “Kaano nga Iturayan ti Pagarian ti Dios ti Daga?”

 Inkompara ti maysa a mannurat iti Biblia ti namnama nga ibagbaga ti Biblia kas ‘angkla ti kararua.’ (Hebreo 6:19) No kasano a makatulong ti angkla tapno saan a mayanud ti barko no adda bagyo, makatulong met ti nalawag a namnamatayo iti masanguanan tapno makayatayo a sanguen dagiti problematayo ita. Makatulong ti namnamatayo tapno agbalintayo a kalmado, naragsak, makapanunottayo a naimbag, ken nasalun-attayo.—1 Tesalonica 5:8.