No maawananka iti trabaho, saanka laeng nga agproblema iti kuarta, mabalin a maapektaran met ti pamiliam, ti emosionmo, ken mabalin a malidayan ken madanaganka. Makatulong kenka dagiti sumaruno a suhestion a naibase kadagiti saan nga agkupas a prinsipio ti Biblia.

•   Ibagam iti dadduma ti marikriknam.

   Ti kuna ti Biblia: “Ti pudno a gayyem agayat iti amin a tiempo.”—Proverbio 17:17.

   Baka maladingitanka, makapungtot, wenno dimo ammo ti aramidem, wenno mariknam nga awan serserbim no maawananka iti trabaho. No ibagam ti marikriknam kadagiti kapamiliam ken nadekket a gagayyemmo, mabalin a lumag-an ti riknam. Mabalin met a maipaayandaka iti praktikal a pammagbaga tapno makabirokka iti baro a trabahom.

•   Liklikam ti sobra a panagdanag.

   Ti kuna ti Biblia: “Diyo pakadanagan ti problema iti sumaganad nga aldaw, ta adda bukod a problema ti tunggal aldaw.”—Mateo 6:34.

   Iparparegta kadatayo ti Biblia nga agplanotayo a nasaksakbay. (Proverbio 21:5) Ngem ibagana met a liklikantayo ti nakaro a panagdanag maipapan iti mapasamak iti masanguanan. Masansan a saan met a mapasamak dagiti pagdandanagantayo, isu a nasaysayaat no agpokustayo laeng iti maaramidantayo iti kada aldaw.

   Ibaga pay ti Biblia dagiti makatulong a balakad tapno makayam a sanguen ti stress a posible a marikriknam ita. Tapno maammuam ti ad-adu pay, basaem ti artikulo a “Dagiti Aramidem Tapno Malabanam ti Stress.”

•   Usarem a naimbag ti kuartam.

   Ti kuna ti Biblia: “Ammok no kasano ti agbiag . . . aduanak man wenno agkurkurang ti kasapulak.”—Filipos 4:12.

   Makibagayka iti agdama a situasionmo. Ramanen dayta ti panangbalbaliwmo iti panangusarmo iti kuartam tapno saan a dakdakkel ti gastom ngem iti adda a kuartam. Saanka koma nga umutang no saan a kasapulan.—Proverbio 22:7.

   Para iti ad-adu pay a suhestion no kasanoka nga ag-adjust no bassit ti kuartam, kitaem ti artikulo a “No Kasano a Mayan-anay ti Bassit a Kuarta.”

•   Usarem a naimbag ti tiempom.

   Ti kuna ti Biblia: “Itultuloyyo ti agbalin a masirib . . . , nga usarenyo ti tiempoyo iti kasayaatan a pamay-an.”—Colosas 4:5.

   Uray no awan ti eskediulmo a mapan iti trabaho, mantenerem ti nasayaat a rutina a panangusarmo iti tiempom. Makatulong dayta tapno organisado latta ti biagmo ken agtalinaed ti kompiansam iti bagim.

•   Agbalin a mannakibagay.

   Ti kuna ti Biblia: “Makagunggona ti tunggal kita ti napinget a panagtrabaho.”—Proverbio 14:23.

   Nakasaganaka koma a mangaramid iti trabaho a saanmo a nakairuaman. Baka masapul nga ikabilangam dagiti trabaho a maibilang a nababa wenno basbassit ti sueldona ngem iti dati a trabahom.

•   Agbalin a determinado.

   Ti kuna ti Biblia: “Imulam ti bin-im iti bigat ket dimo paginanaen ti imam agingga iti rabii; ta dimo ammo no ania kadagita ti agballigi, no daytoy wenno daydiay, wenno agpadadanto a naimbag.”—Eclesiastes 11:6.

   Itultuloymo ti agbirok iti trabaho. Ibagam iti dadduma nga agbirbirokka iti trabaho. Kasaritam dagiti kabagiam, am-ammom, dati a katrabahuam, ken kaarrubam. Itsek dagiti employment agency, adbertismen, ken website dagiti kompania nga agbirbirok kadagiti empleado. Nakasaganaka koma iti adu nga interbiu ken agipasa iti adu a résumé wenno application form tapno makabirokka iti trabahom.