Iti intero a lubong, adu ti interesado iti veganism.

•   “Ti veganism ket maysa a pilosopia ken pamay-an ti panagbiag nga aramiden dagiti tattao ti amin a kabaelanda tapno saan a madangran dagiti animal wenno mausar kas pagtaraon, pagbado, wenno dadduma pay.”—The Vegan Society.

 Dadduma a tattao ti nagbalin a vegan saan la a gapu ta maseknanda kadagiti animal, no di pay ket gapu ta kayatda a pasayaaten ti aglawlaw, ti salun-atda, wenno gapu iti relihionda.

•   “Naiduma ti veganism iti kaaduan a dieta gapu ta masansan nga ibilang dayta dagiti tattao kas patpatien, moral a desision, ken pamay-an ti tunggal tao a mangpasayaat iti lubong.”—Britannica Academic.

 Ti kadi veganism ti solusion kadagiti problema iti planetatayo? Ania ti ibaga ti Biblia?

 Ipakita ti Biblia a ti Namarsua kadatayo a ni Jehova a Dios a ibilangna dagiti tattao a nangatngato ngem kadagiti animal ken inikkanna dagiti tattao iti autoridad a mangaywan kadakuada. (Genesis 1:27, 28) Idi agangay, dagiti animal ket impalubosen ti Dios a pagtaraon dagiti tattao. (Genesis 9:3) Ngem saanna a kayat a mamaltrato dagiti animal.—Proverbio 12:10.

 Sigun iti Biblia, personal a desisiontayo no mangantayo iti karne wenno saan. b Saannatayo a pagbalinen dayta a nasaysayaat a tao iti imatang ti Dios. (1 Corinto 8:8) Saantayo ngarud koma a kritikaren ti sabali no ania ti pilienna a kanen.—Roma 14:3.

 Ipakita ti Biblia a saan a ti pinilitayo nga estilo ti panagbiag ti mangsolbar kadagiti problema iti lubong. Adu a problema ita ti maigapu iti sistema ti politika, kagimongan, ken ekonomia iti lubong, nga awanen ti makapasayaat. Ibaga ti Biblia:

•   “Saanen a mailinteg ti killo.”—Eclesiastes 1:15.

 Solbarento ti Namarsua kadatayo dagiti problematayo ita. Nagusar ti Biblia iti simboliko a sasao tapno ipakitana no anianto ti aramiden ti Dios.

•   “Nakakitaak iti baro a langit ken baro a daga; ta naglabasen ti immuna a langit ken ti immuna a daga, ken awanen ti baybay.”—Apocalipsis 21:1.

 Suktanto ti Dios ti gobierno ti tao, wenno ti “immuna a langit,” iti “baro a langit,” ti nailangitan a Pagarianna. Ikkatento ti Pagarian ti Dios ti “immuna a daga,” dagiti managdakdakes, ken iturayannanto ti “baro a daga,” wenno dagidiay mayat nga agpasakup iti autoridadna.

 Iti laeng panangituray ti Pagarian ti Dios a masursuronto dagiti tattao ti agbiag a sitatalna a kadua dagiti animal ken aywananda a naimbag ti aglawlaw.—Isaias 11:6-9.