Iti intero a lubong, adu a tattao a mangibagbaga a pasurot ida ni Jesu-Kristo ti makiramraman iti politika. Tapno maitandudo ti dadduma ti narelihiosuan a patpatien ken prinsipioda, suportaranda ti maysa a kandidato wenno partido iti politika. Isu nga usaren dagiti politiko ti agdama nga isyu tapno maalada ti suporta dagiti relihioso a tattao. Gagangay laengen kadagiti lider ti relihion ti agkandidato. Iti dadduma a nasion, maibilang payen ti maysa a “Kristiano” a relihion kas relihion ti estado wenno nasion.

 Panagkunam, masapul kadi a makiraman iti politika dagiti pasurot ni Jesu-Kristo? Maammuam ti sungbat no ammuem ti ulidan ni Jesus. Imbagana: “Inikkankayo iti pagtuladan tapno aramidenyo met ti inaramidko.” (Juan 13:15) No maipapan iti politika, ania ti inyulidan ni Jesus?

 Saan a nakiraman ni Jesus iti politika daytoy a lubong.

 Saan man laeng a pinadas ni Jesus ti maaddaan iti posision iti politika. Dina inawat ti tukon ni Satanas a Diablo nga isuna ti agturay iti “amin a pagarian ti lubong.” (Mateo 4:8-10) a Naminsan, pinilit dagiti tattao ni Jesus a makiraman iti politika gapu ta nakitada ti abilidadna a mangituray. Ibaga ti Biblia: “Gapu ta ammo ni Jesus a pilitenda nga agbalin nga ari, napan manen iti bantay nga is-isuna.” (Juan 6:15) Saanna nga impalubos a mapasamak ti kayat dagiti tattao. Imbes ketdi, saan a nakibiang iti politika.

 Awan ti sinuportaran ni Jesus nga isyu iti politika. Kas pagarigan, idi panawen ni Jesus kasuron dagiti Judio ti agbayad iti buis iti gobierno ti Roma ken imbilangda dayta a saan a nainkalintegan. Idi padpadasenda nga ammuen no ania ti makunana kadagita nga isyu, awan ti komentona no nainkalintegan wenno saan dagita a buis. Kinunana kadakuada: “Itedyo ken Cesar dagiti kukua ni Cesar, ngem itedyo iti Dios dagiti kukua ti Dios.” (Marcos 12:13-17) Nagtalinaed a neutral kadagiti politikal nga isyu ngem impakitana a dagiti buis a kalkalikaguman ti gobierno ti Roma, a mangireprepresentar ken Cesar, ket masapul a bayadan. Ken impakitana nga adda limitasion ti panagtulnog kadagiti agtuturay. Saan a mabalin nga ipaay ti maysa a tao iti gobierno ti banag a para laeng iti Dios, kas koma iti debosion ken panagdayaw.—Mateo 4:10; 22:37, 38.

 Sinuportaran ken insuro ni Jesus ti nailangitan a gobierno, nga isu ti Pagarian ti Dios. (Lucas 4:43) Saan a nakibiang iti politika gapu ta ammona a ti Pagarian ti Dios, saan a ti gobierno ti tao, ti makaaramid iti pagayatan ti Dios para iti daga. (Mateo 6:10) Ammona a saan nga usaren ti Pagarian ti Dios ti gobierno ti tao, no di ket suktannanto dagita.—Daniel 2:44.

 Saan. Sinurot dagiti pasurot ni Jesus ti bilinna a ‘saanda a paset ti lubong.’ (Juan 15:19) Sinurotda ti ulidanna ken intultuloyda ti saan a makipaset iti politika. (Juan 17:16; 18:36) Imbes a makibiangda iti politika, inaramidda ketdi ti trabaho nga imbilin ni Jesus—ti panangikasaba ken panangisuro maipapan iti Pagarian ti Dios.—Mateo 28:18-20; Aramid 10:42.

 Ti kapatgan kadagiti Kristiano idi umuna a siglo ket ti panagtulnog iti Dios, ngem ammoda a masapul met a respetuenda dagiti agtuturay. (Aramid 5:29; 1 Pedro 2:13, 17) Sinurotda dagiti linteg ken nagbayadda iti buis. (Roma 13:1, 7) Uray saanda a makibibiang iti politika, aw-awatenda ti legal a proteksion ken serbisio nga ipapaay ti gobierno.—Aramid 25:10, 11; Filipos 1:7.

 Nalawag nga ipakita ti Biblia a saan a nakiraman ni Jesus ken dagiti nagkauna a pasurotna iti politika. Gapu iti dayta, kas Kristiano, dagiti Saksi ni Jehova iti intero a lubong naan-anay nga agtaltalinaedda a neutral. Kas kadagiti Kristiano idi umuna a siglo, ar-aramidenda ti trabaho nga imbilin ni Jesus—ikaskasabada “ti naimbag a damag maipapan iti Pagarian.”—Mateo 24:14.