Iti adu a pagilian, nguminngina dagiti magatang isu a rumigrigat met ti biag dagiti tattao, a pakairamanan dagiti Saksi ni Jehova. Ngem saanda unay a madanagan gapu ta ammoda a ‘saan a pulos baybay-an’ ni Jehova dagiti adipenna. (Hebreo 13:5) Kanayon a tungtungpalen ni Jehova dayta a karina. Kasta ti inaramidna iti Pilipinas, nga adu a tattao ti marigrigat agingga ita. Ngem narigrigat pay ti biag idi 1970’s ken 1980’s.

 “Idi, agsangitak no dadduma ta awan unay ti makanmi,” imbaga ti sister a ni Vicky a. “Adda pay tiempo a bagas, asin, ken danum lang ti adda kadakami.” Awan met ti trabaho a mabirokan ti brother a ni Florencio. Imbagana: “Taltallo ti badok ken taltallo met ti pantalonko, ket dagita ti pagsisinnublatek a pakigimong ken pakiasamblea.” Kasano a sinango dagiti Saksi ni Jehova dagita a pakarigatan? Ania ti nakatulong kadakuada tapno makapagtultuloyda a matalek nga agserbi ken Jehova? Kasano a makatulong dagiti kapadasanda no bigla nga agbaliw ti kasasaad ti biagtayo?

 Bayat dayta a narigat a tiempo, nagtalek dagiti Saksi iti Pilipinas nga ipaay ni Jehova dagiti kasapulanda. (Hebreo 13:6) Ket kasta ti inaramid ni Jehova, ken kaaduanna nga iti pamay-an a dida ninamnama. Kas pagarigan, imbaga ti sister a ni Cecille: “Naminsan, kalpasan a naisaangmi ti nabati a bagas a pammigatmi, awanen ti makanmi, ket uppatkami pay met ngarud iti pamiliami. Isu nga inkararagmi ken Jehova nga itedna koma dagiti kasapulanmi iti dayta nga aldaw. Ngem bayat a mangmangankami pay laeng, adda simmangpet a brother nga adda awitna a lima a kilo a bagas. Uraykami la nakalua gapu iti ragsak ken panagyamanmi ken Jehova gapu iti daytoy a bendisionna. Maysa laeng daytoy kadagiti adu a gundaway a tinulongannakami ni Jehova.”

 Kasta met, inaramid dagiti Saksi ti ibagbaga ti Biblia. (Proverbio 2:6, 7) Kas pagarigan, kababautisar idi ti balasang a sister a ni Arcelita. Marigrigatan nga agbirok iti pagbiagna isu nga inkararagna ken Jehova ti problemana. Kalpasanna, pinampanunotna a naimbag ti kuna ti Proverbio 10:4: “Ti nasadut nga ima ti mangpapanglaw, ngem ti nagaget nga ima ti mangpabaknang.” Inyaplikarna daytoy a teksto, isu a nagmula kadagiti natnateng. “Talaga a binendisionan ni Jehova ti panagbannogko,” kunana. “Ti agpayso, addan umanay a makanko, ken adda pay ti mailakok a pagpletek.”

 Awan met umanay a kuarta dagiti kakabsat a panggatang iti daga ken pangipatakder kadagiti Kingdom Hall. Ngem saan a dayta ti nanglapped kadakuada nga agtulnog iti bilin nga aggigimongda tapno agpipinnaregta. (Hebreo 10:24, 25) Nagaramidda ketdi kadagiti pamay-an. Kas pagarigan, malagip ti sister a ni Deborah: “Innemkami idi nga aggigimong iti bassit a kalkalapaw nga impatakdermi iti partnerko a payunir. Bulong ti nipa ti pinangatepmi, bulong met ti niog ti pinangdidingmi, ken inaramidmi ti kayona a pagtugawan.”

 Ngem kaaduanna a balay ti kakabsat ti paggigimonganda. “Naaramid iti pan-aw ken kawayan ti bassit a balaymi,” kuna ti sister a ni Virginia. “Kada Sabado, iyakarmi no kua dagiti tugaw ken lamisaanmi tapno nalawlawa ti paggigimonganmi iti Domingo.” Agtedted met iti sabali a balay a paggigimongan dagiti kakabsat. “No agtudo,” kuna ti brother a ni Noel, “timba ti usarenmi a pagtaya. Ngem saanmi unayen a madmadlaw dagitoy a makaistorbo gapu ta kaduami dagiti kakabsat nga agdaydayaw.”

 Saan a bimmaaw ti regta dagiti Saksi iti ministerio uray no awan unay makukuartada. Malagip ni Lindina a taga-Negros: “Dakkel ti pamiliami, ket ni Tatang laeng ti adda trabahona. Isu a kaaduanna nga awan ti pagpletemi. Magmagnakami no kua a mapan iti teritoria. Ngem nakaragragsakkami met ta adukami, ken ammomi a maragragsakan ni Apo Jehova kadagiti panagsakripisiomi.”

 Ti maysa kadagiti karirigatan a situasion dagiti kakabsat idi ket no mapanda mangasaba kadagiti adayo a teritoriada iti kabambantayan, ta manmano wenno awan pay ketdi ti agpaspasada. Imbaga ni Esther a taga-Luzon: “Innem agingga iti dosekami, ket nasapakami nga agrubbuat ta adu a kilometro ti pagnaenmi. Agmalmalemkami a mangasaba. Agbalonkami met kadagiti naluto a makan, sa mangankami kadagiti sirok ti kayo. Awan balon ti dadduma a kakabsat ngem umayda latta. Isu nga ibagami no kua, ‘Inlak-amdakayo. Adu ti balonmi.’”

 Talaga a binendisionan ni Jehova ti kinamanagsakripisioda. Kas pagarigan, idi 1970, ti bilang dagiti agibumbunannag iti Pilipinas ket 54,789. Idi 1989, dandani nadoble ti bilangda nga immabut iti 102,487. Idi 2023, ti bilang dagiti manangaskasaba iti Pilipinas ket immabuten iti 253,876.

 Uray nakarigrigat ti biag dagiti Saksi, naragsak ken adu latta ti maar-aramidanda iti panagserbida ken Jehova. “Saan a lapped ti kinarigat ti biag tapno maayatmi ni Jehova,” kuna ti brother a ni Antonio. Imbaga ti sister a ni Fe Abad: “Idi nagproblemakami ken lakayko iti pinansial, nagtalinaedkami a nasinged ken Jehova ken nariknami a naragragsak ti agbiag a simple. Gapu iti dayta, nasursuro met dagiti annakmi ti agtalek ken Jehova.”

 “Saan a problema ti kinarigat ti biag no agserserbika ken Jehova,” nabigbig ni Lucila a taga-Samar. Imbagana pay a “no iyun-unatayo ti Dios, kontento ken positibotayo. Makaparagsak ta naam-ammo dagiti iyad-adalak iti Biblia ni Jehova ken idi agangay, nagpayunirda metten a kas kaniak.”

 Gapu ta ammotayo a rumigat pay ti biag iti masanguanan, laglagipentayo ti imbaga ti panglakayen a ni Rodolfo. Insuratna: “Napadasak ti rigat ti biag idi 1970’s ken 1980’s. Ngem nariknak ti tulong ken ayat ni Jehova. Uray bassit ti maig-iggamak a kuarta idi, saanko a narikna a kakaasiak. Dinak pulos binaybay-an ni Jehova. Talaga a nakasaysayaat ti biagko ita, ken padpadaanak ti ‘pudpudno a biag’ idiay Paraiso.”—1 Timoteo 6:19.