Sipud kinaubingko, ipatpategkon ti kinapudno. Kayatko nga idedikar ti biagko ken Jehova ken agpabautisar. Maragsakanak ta idi 13 ti tawenko, naragpatko dayta a kalat. Idi 14 ti tawenko, dinamag ni Brother Helge Linck a no napampanunotkon ti agpayunir. Malaglagipko pay laeng dayta a kanito. Uray no nagserbi idi dagiti nagannakko kas temporario a payunir (pagaammo itan kas auxiliary pioneer), awan ti ammok maipapan iti panag-regular pioneer. Gapu iti saludsod ni Brother Linck, naimula iti pusok ti tarigagay nga agaramid iti ad-adu pay iti panagserbik ken Jehova.

 Idi 1974, adu ti maar-aresto, matmatay, ken nakaro ti gulo idiay Ethiopia gapu iti problema iti politika. Idi agangay, saankamin a makapangasaba iti binalaybalay ken aggigimongkami laeng iti babassit a grupo. Insaganadakami dagiti nagannakmi a mangsango iti ad-adu pay nga ibubusor. Gapu kadagiti prinsipio ti Biblia, naawatanmi no ania ti kaipapanan ti panagbalin a neutral ti maysa a Kristiano. Nasursuromi a tulongannakami ni Jehova tapno ammomi no ania ti ibagami no adda mangkuestion kadakami, ken nasursuromi met nga adda dagiti tiempo a masapul nga agulimekkami.—Mateo 10:19; 27:12, 14.

 Idi nakagraduarakon, nagtrabahoak iti Ethiopian Airlines. Maysa nga agsapa, idi nakasangpetak iti trabahok, inabrasadak dagiti katrabahuak ta napiliak a mangidaulo iti parada a mangselebrar iti anibersario ti gobierno. Dagus nga imbagak iti superbisorko a saanak a makiraman iti selebrasion gapu iti neutral a takderko kas Kristiano.

 Kabigatanna, bayat nga agtrabtrabahoak iti airport, nakitak dagiti armado a lallaki a mapmapan iti pagalaan iti tiket. Impagarupko no arestuenda ti maysa a mangpadpadas a rummuar iti pagilian tapno aglibas. Ngem idi kuan, intudodak! Ania ti kasapulanda kaniak? Bigla a nagbaliw ti aldawko.

 Impandak dagiti soldado iti maysa nga opisina a nakaimbestigarak iti sumagmamano nga oras. “Asino ti mangsuelsueldo kadagiti Saksi ni Jehova?” dinamagda. “Agtrabtrabahoka kadi para iti Eritrean Liberation Front? Agtrabtrabahoka kadi wenno ni tatangmo para iti gobierno ti United States?” Uray no makapa-stress unay idi dayta, kalmadoak laeng gapu iti tulong ni Jehova.—Filipos 4:6, 7.

 Kalpasan ti imbestigasion, impandak dagiti soldado iti maysa a balay a napagbalin a pagbaludan, sa impandak iti 28 a metro a kuadrado (300-sq-ft) a kuarto a napno iti agarup 15 nga agtutubo a babbai a naibalud gapu iti politika.

 Iti dayta a rabii, bayat a nakaiddaak iti natangken a suelo a suotko ti unipormek iti trabaho, madandanaganak ta pampanunotek ti marikrikna dagiti nagannakko ken dagiti kakabsatko. Ammoda a naarestoak, ngem dida ammo no ayanko. Inkararagko a tulongan ni Jehova ti pamiliak tapno mabirokandak.

 Idi makariingak kabigatanna, nairupaak ti maysa nga agtutubo a guardia. Nakigtot idi nakitanak ket imbagana, “Ania ti ar-aramidem ditoy, Aster?” Impakaasik a mapan iti balaymi tapno ibagana kadagiti nagannakko no sadino ti ayanko. Kamalmanna, adda naawatko a makan ken bado nga impatulod dagiti nagannakko. Imbaga ti guardia kadakuada no sadino ti ayanko. Sinungbatan ni Jehova ti kararagko! Gapu iti dayta a kapadasan, napaneknekak a saanak nga agmaymaysa.

 Saanak a napalubosan a maaddaan iti Biblia wenno aniaman a publikasion, ken saan a mabalin a bumisita ti pamiliak ken dagiti gagayyemko. Ngem pinaregtanak latta ni Jehova babaen kadagiti padak a balud. Inaldaw a kaskasabaak ida, ket magusgustuanda ti kinapudno maipapan iti Pagarian ti Dios. Masansan nga ibagada kaniak: “Dakami, gobierno ti tao ti ilablabanmi, ngem sika, gobierno ti Dios. Isu a dika agkompromiso uray ibagada a patayendaka!”

 No dadduma, palutpoten dagiti guardia dagiti balud ken kabilenda ida. Naminsan, iti agalas onse ti rabii, immaydak innala ken impandak iti kuarto a pagimbestigaran. Nagadu ti pammabasolda kaniak. Imbagada a saanko a supsuportaran ti gobierno. Ket idi saanko a kayat nga ibaga ti maysa nga slogan iti politika, kinabildak ti dua a lallaki a guardia. Maulit-ulit dagiti kasta a panangpalutpot kaniak dagiti guardia. Kada aramidenda dayta, sipapasnek nga agkararagak ken Jehova, ket mariknak a tultulongannak.

 Kalpasan ti tallo a bulan, imbaga ti maysa a guardia a mawayawayaanakon. Nasorpresa ken naragsakanak, ngem medio nalidayak ta kaykayatko nga isarsarita kadagiti agtutubo a babbai iti pagbaludan ti namnama nga ipaay ti Pagarian.

 Sumagmamano a bulan kalpasan a nawayawayaanak, bayat nga addaak iti ruar, inaresto dagiti soldado ti amin a tin-edyer iti pamiliami! Inarestoda ti dua a kakabsatko a babbai ken maysa a kabsatko a lalaki. Iti dayta a gundaway, ammok a masapul a panawak ti pagilianmi. Uray no kasla diak kaya ti mayadayo manen iti pamiliak, pinaregtanak ni Nanang a papigsaek ti pakinakemko ken agtalekak ken Jehova, isu a dagus a nagluganak iti eroplano nga agpa-United States. Iti dayta met la a rabii, nagsubli dagiti soldado iti balaymi tapno arestuendak manen. Ngem gapu ta saandak a naabutan, nagdardarasda a napan iti airport. Ngem idi nakasangpetda iti airport, nakapanawkamin.

 Idi nakasangpetak iti Maryland, pinasangbaydak da Haywood ken Joan Ward, dagiti misionero a nangyadal iti nagannakko. Kalpasan ti lima a bulan, nagaw-atko ti kalatko nga agpayunir. Ti balasang ti agassawa a Ward a ni Cyndi ti nagbalin a partnerko iti panagpayunir ket adu ti nararagsak a kapadasanmi iti ministerio.

 Iti summer ti 1979, bimmisitaak iti New York Bethel ket naam-ammok ni Wesley Parker. Naapresiarko dagiti nagsasayaat a kualidadna ken dagiti naespirituan a kalatna. Idi 1981, nagkasarkami ken immakarak iti Wallkill, New York tapno agserbiak iti Bethel a kadua ni Wesley. Nagtrabahoak kadagiti departamento ti Housekeeping ken Dry Cleaning, ken idi agangay, iti MEPS team iti Computer Department. Gapu ta nagserbiak iti Bethel, ad-adda a nausarko ti biagko iti panagserbi ken Jehova ken naam-ammok dagiti kakabsat a nagbalin a gagayyemko agingga ita.

 Ngem idiay Ethiopia, marigrigatan ti pamiliak gapu iti nakaro a pannakaidadanes isu a madandanaganak. Nakabalud pay latta ti tallo a kakabsatko. b Inaldaw a balonan ida ni Nanang ta awan ti rasion a makan iti pagbaludan.

 Bayat dayta a makapa-stress a situasion, ni Jehova ti nagkamangak, ken liniwliwa ken sinuportarannak ti pamilia ti Bethel. (Marcos 10:29, 30) Maysa nga aldaw, imbaga kaniak ni Brother John Booth: “Maragsakankami ta agserserbika ditoy Bethel. Saan koma a posible dayta no saannaka a bembendisionan ni Jehova.” c Dagita a makaparegta a sasao ti nangipasigurado kaniak a binendisionan ni Jehova ti desisionko a pumanaw iti Ethiopia ken aywananna ti pamiliak.

 Idi Enero 1989, naammuanmi a masikogak. Idi damo, nakigtotkami! Ngem kalpasan ti sumagmamano nga aldaw, nasuktan iti ragsak ti danagmi. Ngem pinampanunotmi latta no ania a klase a nagannak ti pagbalinanmi, no sadino ti pagyananmi, ken no pangalaanmi iti pagbiagmi inton awankamin iti Bethel.

 Idi Abril 15, 1989, inluganmi ti amin a gamitmi sakami napan iti Oregon, a planomi a pangituloyan iti amin-tiempo a panagserbimi kas payunir. Ngem idi nakasangpetkami sadiay, adda dagiti gagayyemmi a nasayaat met ti intensionda a nangibaga a saan a praktikal nga agpayunirkami. Bassit laeng ngamin ti kuartami ken dandaniakon aganak. Ania itan ti aramidenmi? Eksakto met a binisitanakami ti manangaywan iti sirkitomi a ni Guy Pierce ken ni baketna a Penny. d Pinaregtadakami nga ituloymi ti planomi. Isu a nagpayunirkami ken nagtalekkami a tulongannakami ni Jehova. (Malakias 3:10) Nagtultuloykami latta kas payunir kalpasan a nayanak ti umuna nga anakmi a ni Lemuel ken uray idi nayanak ti maikadua nga anakmi a ni Jadon.

 Ti panangikuykuyogmi kadagiti babassit pay nga annakmi bayat nga agpaypayunirkami ket maysa a kapadasan nga impatpategmi unay. Gapu iti panagpayunirmi, adu ti gundaway a mailawlawagmi dagiti kinapudno iti Biblia saan laeng a kadagiti kaarrubami no di ket uray kadagiti annakmi. (Deuteronomio 11:19) Ngem idi nayanak ti maikatlo nga anakmi a ni Japheth, masapul nga agsardengkami pay laeng kas payunir.—Mikias 6:8.

 Nabigbigmi a ti kapatgan a responsabilidadmi kas nagannak ket pagbalinenmi a napaypayso ni Jehova kadagiti annakmi ken tulonganmi ida a maaddaan iti personal a relasion kenkuana. Isu nga inkagumaanmi a pagbalinen a naragsak ti panagdaydayaw ti pamiliami tapno padaananda. Idi babassitda pay, agkakaduakami nga agbasa iti libro a Panagimdeng iti Naindaklan a Mannursuro ken Ti Librok Dagiti Estoria ti Biblia. Iyaktomi pay ketdi ti dadduma nga estoria. Siak laeng ti babai iti balaymi isu nga idi inyaktomi ti estoria maipapan ken Jezebel, siak ti nagakem kas Jezebel. Kaykayat dagiti annakmi a sinsinan idurondak iti tugaw ken agaktoda kas aso! Malaksid iti panagdaydayaw ti pamiliami, saggaysa met nga iyad-adalan ni Wesley dagiti ubbing.

 Inayat ken inaywananmi dagiti annakmi, ken inkararagmi nga agbalinkami a nasinged nga agkakapamilia. Bayat a dumakdakkelda, sinuruanmi ida kadagiti trabaho kas iti panaginnaw, panagdalus iti kuartoda, ken panaglaba. Nasursuroda met ti agluto.

 Saan laeng a dagiti annakmi ti nakasursuro no di ket uray dakami a nagannakda. Adda dagiti tiempo a makapungtotkami a dagus ket makaibagakami kadagiti makapasakit a sasao iti maysa ken maysa ken kadagiti annakmi. Kadagita a situasion, agpakumbaba ken agpadispensarkami.

 Regular nga awisenmi iti balaymi dagiti kakongregasionmi, kasta met dagiti bumisita a Bethelite, misionero, agdaldaliasat a manangaywan, ken dagiti agserserbi kadagiti lugar a dakkel ti panagkasapulanna. (Roma 12:13) No sangailienmi dagiti bisitami, saanmi a papanawen dagiti annakmi tapno agay-ayam. Kaduami ida a naragsak a makisarsarita ken dumdumngeg kadagiti kapadasan. Masansan nga ad-adu pay ti malagip dagiti annakmi kadagita a saritaan ngem kadakami ken Wesley.

 Inkagumaanmi ken Wesley a pagbalinen a naragsak ti panagserbimi ken Jehova. Kas pagarigan, agplanokami a nasaksakbay ken agurnongkami iti kuarta ken bakasion tapno makapasiarkami iti nagduduma a pagilian. Kadagita a panagpasiarmi, bumisitakami iti sanga nga opisina, makigimong, ken makiramankami iti ministerio. Gapu iti dayta, ad-adda a naapresiarmi ti sangalubongan nga organisasion ni Jehova ken nagbalinkami a nadekdekket kas pamilia.

 Nakitami nga adu ti agsasao iti Spanish iti lugarmi ngem saanda a regular a makaskasabaan. Isu nga uray babassit pay dagiti annakmi, dinamagmi ken Brother Pierce no ania ti makunana no umakar ti pamiliami iti kongregasion nga agsasao iti Spanish. Dakkel ti isemna a simmungbat, “No maysaka a mangngalap, agkalapka iti ayan dagiti ikan.” Gapu iti dayta a pammaregta, immakarkami iti Spanish a kongregasion iti Woodburn, Oregon. Maragsakankami ta naaddaankami kadagiti iyad-adalan iti Biblia a rimmang-ay ket dadduma kadakuada ti nagpabautisar, ken nakitami a nagbalin a kongregasion ti dati a bassit a grupo ti Spanish.

 Adda idi tiempo a naawanan ni Wesley iti trabaho isu a masapul nga umakarkami iti California para iti baro a trabahona. Kalpasan ti dua a tawen, nagpayunirkami kada Lemuel ken Jadon. Naragsakak ta kaduak ida a nageskuela iti Pioneer Service School idi 2007. Kalpasan unay ti panageskuelami, nakitami nga adu ti agsasao iti Arabic iti teritoriami. Isu a kalpasan ti 13 a tawen a kaaddami iti Spanish a kongregasion, nagdesision ti pamiliami nga umakar iti kongregasion nga Arabic ti lengguahena. Maragragsakankami a mangipakaammo iti kinapudno iti adu nga imigrante nga Arabic ti pagsasaona ditoy lugarmi, kasta met iti sabali a pagilian no makiramankami iti espesial a kampania ti panangasaba. Agserserbikami latta ita kas payunir iti Arabic a kongregasion iti San Diego, California.

 Ni Wesley ket nagsayaat nga asawa ken ulo ti pamilia. Nauneg ti panagraemna iti organisasion ni Jehova. Awan a pulos ti negatibo nga imbagbagana maipapan kadagiti urnos iti Bethel wenno iti kongregasion. Imbes ketdi, kanayon a mangbirbirok iti positibo nga ibagana. Agkaduakami nga agkararag, ken ikarkararagannak. Ken no maipasangokami kadagiti makapa-stress a situasion, makatulong dagiti kararagna tapno maliwliwaak ken agtalinaedak a kalmado.

 No sublianmi ti napalabas, mapanunotmi ti ragsakmi a nagserbi iti amin-tiempo, nangpadakkel kadagiti annakmi, ken nagserbi kadagiti kongregasion a dakdakkel ti panagkasapulanna. Napaneknekanmi a bendisionan ni Jehova dagidiay mangyun-una kenkuana, ken saankami a pulos nagkurang iti aniaman. (Salmo 37:25) Kombinsidoak a ti panangusarko iti biagko nga agserbi ken Jehova ti kasayaatan a desision nga inaramidko.—Salmo 84:10.