Naammuan da lolo ken lolak ti maipapan kadagiti kari ti Pagarian ni Jehova idi 1906 kalpasan a natay ti maysa nga anakda iti diphtheria. Ti doktorda ket maysa nga Estudiante ti Biblia, nga awag idi kadagiti Saksi ni Jehova. Imbagana kadakuada ti makaliwliwa a kari ti Biblia, a pakairamanan ti namnama a panagungar. Gapu iti dayta, nagbalin met nga Estudiante ti Biblia da lolo ken lolak, ni nanangko, ken ti kabsat a babai ni Nanang.

 Adu a tawen a naregta dagitoy a kabagiak. Nagserbi pay ketdi nga usherette dagiti kabagiak a babbai idi naipabuya ti “Photo-Drama of Creation” idiay Chicago, Illinois, United States. Ngem makapaladingit ta ni nanangko laeng ti nagtultuloy a nagserbi ken Jehova. Saan a nalaka daytoy para kenkuana ta nadekketda nga agkakapamilia ken nagkakaduada a nagserbi ken Jehova agingga idi 1930’s. Nagdakkel ti epekto kaniak ti kinamatalek ken kinatulnog ni Nanang ken Jehova, kasta met ti ulidan ni Tatang, a maysa met a matalek nga Estudiante ti Biblia.

 Nayanakak idi 1927, siak ti inauna iti innem nga agkakabsat. Nagtalinaedkami amin iti kinapudno. Karpintero ni Tatang, ken aggigiankami iti komportable a balay iti adayo a paset ti Chicago. Adda nalawa a pagmulaanmi iti natnateng ken agtartarakenkami kadagiti manok ken pato.

 Kaykayatko ti agtrabaho. Maysa idi kadagiti trabahok ket agdait kadagiti mediasmi. Awan unayen ti mangar-aramid iti kasta ita; ngem idi, saanmi a basta ibelleng no adda abut ti medias. Madait dagiti abut wenno matakupan babaen ti dagum ken sinulid. Imbag la ketdin ta nasursurok dayta ta adunto gayam ti daitek inton agangay.

 Sinigurado ni tatangko a kas pamilia, saanmi a mabaybay-an dagiti naespirituan a bambanag. Isu nga inatendaranmi ti amin a gimong, regular a makipasetkami iti ministerio, ken inaldaw a mangusigkami iti maysa a teksto iti Biblia. Kada rabii ti Sabado, agadalkami a sangapamiliaan iti Biblia babaen ti Pagwanawanan.

 Tapno makasabaanmi dagiti kaarrubami, nangikabil ni Tatang iti plakard nga adda silawna iti tawa ti salasmi. Inaramid dayta dagiti kakabsat. Mabasa iti dayta ti tema ti palawag publiko wenno ti maysa kadagiti publikasiontayo. Aggilapgilap ti silawna isu a maalana ti atension dagiti aglabas. Nangikabil met ni Tatang iti dua a plakard iti luganmi.

 Iti sao ken aramid, insuro ni Tatang kadakami nga agkakabsat ti kinapateg ti panagtulnog ken Jehova. Sinuportaran isuna ni Nanang iti amin a banag. Nagserbi met ni Nanang ken Jehova iti amin-tiempo kas payunir sipud idi lima ti tawen ti buridekmi, ken nagtultuloy a payunir iti unos ti atiddog a biagna. Para kaniak, isuda ti kasayaatan a nagannak.

 Sabali ti biag idi no ikompara iti biag ita. Awan idi ti telebisionmi, isu nga agdengngegkami kadagiti makapagagar a drama iti radio bayat a nakadalupisakkami nga agkakabsat. Kangrunaanna, maragragsakan ti pamiliami a dumngeg kadagiti naespirituan a programa iti radio nga insagana ti organisasion ni Jehova.

 Magusgustuanmi ti umatender kadagiti kombension dagiti Saksi ni Jehova. Iti kombension idi 1935, naammuanmi a ti “dakkel a bunggoy” a makalasat iti “dakkel a rigat” a nadakamat iti Apocalipsis 7:9, 14, ket addaan iti namnama nga agbiag nga agnanayon iti Paraiso a daga. Sakbay ti 1935, agpada dagiti nagannakko a mangmangan ken umin-inum kadagiti emblema ti Memorial. Ngem kalpasan dayta a kombension, ni laengen Tatang ti makipaspaset. Ammo idi ni Nanang a ti namnamana ket saan nga agturay idiay langit a kadua ni Kristo, no di ket agbiag nga agnanayon ditoy daga.

 Idi 1941, iti kombension iti St. Louis, Missouri, inruar ni Joseph Rutherford, a mangidadaulo idi iti trabaho, ti libro a Children. Nagpigsa ken nagpaut ti panagpapalakpakmi! Katorse ti tawenko idi ken makatawenen a nabautisaranak. Malaglagipko pay a nagpipilakami nga ubbing sa nagnakami a mapan iti entablado tapno maalami ti kopiami.

 Ti ministerio idi a tawtawen ket naiduma iti panawentayo ita. Idi 1930’s, nagusarkami kadagiti ponograpo tapno maipangngegmi kadagiti bumalay dagiti nairekord a naibatay-Biblia a palawag. Sakbay nga agtuktokkami iti ridaw, siguraduenmi a nakapueston a naimbag ti plaka ken dagum ti ponograpo. No rummuaren ti bumalay, adda ababa nga ibagami sa ipatokarmi ti uppat ket kagudua a minuto a palawag. Kalpasanna, mangitukonkami iti literatura. Dimngeg a naimbag dagiti tattao iti lugarmi. Awan ti siasinoman a malagipko a madi ti impakitana kadakami. Nangrugiak nga agpayunir idi 16 ti tawenko, ket inikkannak ni Tatang iti bukodko a ponograpo, a kanayonko nga us-usaren iti ministerio. Nakasaysayaat ti kaduak a payunir a ni Lorraine.

 Panagmartsa ti sabali pay a pamay-an ti panangasabami. Aw-awaganmi idi dayta iti sandwich-sign parade, ta mangisuotkami iti dua a plakard, maysa iti sango ken maysa iti likudan. Nasuratan dagita iti “Religion Is a Snare and a Racket” (“Ti Relihion ket Silo ken Pananggundaway”) ken “Serve God and Christ the King” (“Agserbikayo iti Dios ken ni Kristo nga Ari”).

 Gapu kadagiti gimong, nasaganaanmi ti ibubusor ken nasursuromi nga idepensa ti kinapudno. Di nagbayag, naipasangokamin iti ibubusor. Kas pagarigan, idi damomi ti agitukon kadagiti magasintayo iti natao a pagtagilakuan, tiniliwdakami dagiti polis, inlugandakami iti van, sa impandakami iti estasion ti polis. Kalpasan ti sumagmamano nga oras, nawayawayaankami ket nakaragragsakkami ta naidadaneskami gapu iti panagtulnogmi ken Jehova.

 Idi agangay, inyam-ammonak ni Lorraine iti brother nga agnagan Eugene Rosam, a naam-ammona iti maysa nga asamblea idiay Minneapolis, Minnesota. Dimmakkel ni Eugene idiay Key West, Florida. Idi adda iti grade 10, naikkat iti eskuelaan gapu ta dina kayat ti makipartisipar iti nasionalistiko a seremonia. Dagus a nagpayunir. Maysa nga aldaw, nakasaritana ti dati a kaklasena. Gapu ta nalaing nga estudiante ni Eugene, nasdaaw ti kaklasena no apay a naikkat iti eskuelaan. Inusar ni Eugene ti Biblia a mangsungbat kadagiti saludsodna isu a nangrugi a makipagadal iti Biblia. Impapusona ti kinapudno ket nagbalin a matalek a sister.

 Nagkasarkami ken Eugene idi 1948. Nangrugi ti biagmi kas agassawa babaen ti panagpayunirmi idiay Key West. Idi agangay, naimbitarankami nga umatender iti maika-18 a klase ti Gilead, ket naggraduarkami iti nasapa a paset ti 1952. Naisuro ti Spanish iti maysa kadagiti klase, isu a ninamnamami a maibaonkami kas misionero iti maysa a pagilian nga Spanish ti lengguahena. Ngem saan a kasta ti napasamak. Bayat nga addakami iti Gilead, madama idi ti Korean War, ket naayaban ni Eugene nga agsoldado. Nasdaawkami ta exempted met isuna idi Gubat Sangalubongan II gapu ta maysa a ministro. Gapu iti dayta, naibaga kadakami nga agtalinaedkami iti United States. Insangsangitko ti pannakapaayko. Dua a tawen kalpasanna, naawat met laeng ni Eugene ti aprobasion ti kiddawna a saan nga agsoldado. Ngem adda napateg a nasursuromi iti dayta a pannakapaay—no agrikep ti maysa a ruangan, luktan ni Jehova ti sabali, ket kasta ti inaramidna. Basta agan-anustayo laeng.

 Idi 1953, kalpasan ti panagpayunirmi iti maysa a kongregasion nga Spanish ti lengguahena idiay Tucson, Arizona, naibaonkami nga agserbi iti sirkito. Idi agangay, nagserbikami kadagiti sirkito idiay Ohio, California, ken New York City. Idi 1958, nangrugikami iti trabaho iti distrito a idiay California ken Oregon. Nagdaguskami iti balay dagiti kakabsat. Sa idi 1960, naibaonkami idiay Canada. Nagserbi sadiay ni Eugene kas instruktor ti Kingdom Ministry School para kadagiti manangaywan iti kongregasion. Nagyankami idiay Canada agingga idi 1988.

 Ti maysa kadagiti diak malipatan bayat ti kaaddami idiay Canada ket maipapan iti maysa a pamilia a naam-ammomi iti panagbalaybalaymi a kaduak ti maysa a sister. Umuna a naam-ammomi ti ina a ni Gail, a nangibaga kadakami a maup-upay dagiti annakna gapu ta natay ti loloda. “Apay a natay?” insaludsodda kenkuana. “Sadino ti napanna?” Awan ti maisungbat ni Gail. Isu nga imbasami kenkuana ti sungbat ti Biblia babaen ti panangibagami kadagiti makaliwliwa a teksto.

 Agserserbi idi ni Eugene iti dayta a kongregasion kas manangaywan iti sirkito, isu a makalawasmi laeng sadiay. Ngem ti sister a kaduak ti simmarungkar ken Gail. Kas resultana, inakseptar ni Gail ti kinapudno, kasta met ni lakayna a Bill, ken ti tallo nga annakda—a da Christopher, Steve, ken Patrick. Panglakayen ni Chris idiay Canada. Instruktor met ni Steve iti Bible school facility idiay Palm Coast, Florida. Ken miembro ni Patrick iti Komite ti Sangay idiay Thailand. Iti panaglabas ti tawtawen, nagtalinaedkami ken Eugene a nasinged iti dayta a pamilia. Nakaragragsakak ta adda bassit a pasetko iti panangtulong kadakuada a mangammo ken Jehova!

 Bayat nga addakami idiay Canada, linuktan ni Jehova ti naragsak ken nabunga a baro a ruangan para ken Eugene. Palubosandak a mangyestoria iti dayta.

 Adu a tawen a saan a matarusan dagiti tattao no apay a ditay agpayalison iti dara. Kas resultana, negatibo ti panangmatmat kadatayo ti adu a tattao. Adu a diario idiay Canada ti nangipadamag a baybay-an kano dagiti Saksi a nagannak a matay dagiti annakda ta saanda nga agpayalison iti dara. Naaddaan ni lakayko iti pribilehio a mangpaneknek a saan nga agpayso dagitoy nga estoria.

 Sakbay unay ti international assembly idi 1969 idiay Buffalo, New York, napan ni Eugene ken ti dadduma a brother kadagiti dadakkel nga ospital iti dayta a lugar tapno ilawlawagda nga umatender iti kombension ti agarup 50,000 a Saksi manipud Canada ken United States. No adda tumaud a serioso a medikal nga isyu, makatulong no matarusan dagiti doktor ti takdertayo maipapan iti dara ken makitada no apay a nainkalintegan dayta. Inikkan dagiti brother dagiti doktor kadagiti artikulo manipud kadagiti respetado a publikasion maipapan iti panangagas a di agusar iti dara. Ti positibo a reaksion dagiti doktor ti nangparegta ken Eugene ken ti dadduma a brother a mangrugi a regular a bumisita kadagiti ospital idiay Canada. Tinulonganda met dagiti lokal a panglakayen no kasano a mas epektibo nga asikasuen dagiti medikal nga emerhensia.

 In-inut a nakita ti nasayaat a resulta dagita a panagbisita. Kinapudnona, nagbunga dagita iti banag a dimi ninamnama! Kasano?

 Idi katengngaan ti 1980’s, ni Eugene ket tinawagan ni Milton Henschel manipud iti sangalubongan a hedkuarter idiay Brooklyn, New York. Kayat ti Bagi a Manarawidwid a mapalawa ti agdama a programa iti United States tapno ad-adu pay a doktor ti mapakaammuan. Isu nga immakarkami ken Eugene iti sangalubongan a hedkuarter idiay Brooklyn. Idi Enero 1988, binukel ti Bagi a Manarawidwid ti maysa a departamento a maawagan Hospital Information Services. Ket idi agangay, naapointaran ni lakayko ken ti dua pay a brother a mangikondukta kadagiti seminar, umuna iti United States sa iti dadduma pay a pagilian. Di nagbayag, addan dagiti Hospital Information Department a nabukel kadagiti sangay, ken nabukel metten dagiti Hospital Liaison Committee iti nadumaduma a siudad. Nagunggonaan ti nakaad-adu a Saksi ken dagiti annakda iti kasta a naayat a probision ni Jehova. Bayat a mangikonkondukta ni Eugene kadagiti seminar ken bumisbisita kadagiti ospital, agtrabahoak met iti Bethel iti pagilian nga ayanmi, masansan nga iti pagdaitan wenno iti kosina.

 Idi 2006, dimteng ti karigatan a pannubok iti biagko—natay ti patpatgek a ni Eugene. Kailiwko unay ti pammategna ken ti panagkadkaduami! Ania ti nakatulong kaniak nga agibtur? Adu. Kas pagarigan, kanayonak nga umasideg ken Jehova babaen ti kararag ken regular a panagbasa iti Biblia. Dumdumngegak iti panangusig ti pamilia ti Bethel iti inaldaw a teksto. Basaek ti intero a kapitulo ti Biblia a nakaalaan ti teksto. Okupadoak met iti asaynmentko iti Bethel iti Sewing Department, nga ibilbilangko kas maysa a pribilehio. Idi ub-ubingak pay, timmulongak pay ketdi iti panagaramid kadagiti kortina para iti Assembly Hall idiay New Jersey ken New York. Agserserbiak itan ditoy Fishkill Bethel, ket agrep-repair-ak kadagiti bado ken dadduma pay a babassit a trabaho. b

 Ti kapatgan a banag kaniak ket ti panangayat ken Jehova ken ti panagtulnog kenkuana ken iti organisasionna. (Hebreo 13:17; 1 Juan 5:3) Maragsakanak ta dagita ti imprioridadmi ken Eugene. Kas resultana, naan-anay nga agtalekak ken Jehova a gunggonaannakami iti agnanayon a biag iti paraiso a daga, ket maragsakanak a makakitanto manen ken lakayko.—Juan 5:28, 29.