MILES NORTHOVER | PAKASARITAAN TI BIAG
Binendisionan ni Jehova ti Aramid Dagiti Imak
Kanayon a sinuportaran dagiti nagannakko ti organisasion ni Jehova. Kas pagarigan, idi kayat dagiti kakabsat iti London Bethel ti maaddaan iti pangalaanda iti suplay ti gatas, indonar ni tatangko ti kakaisuna nga urbon ti Jersey a bakami. Kanayon a pagaangawanmi idi a dayta nga urbon a baka ti kaunaan a Bethelite iti “pamiliami.” Ti nagsayaat nga ulidan dagiti nagannakko ti nangtignay kaniak a mangipaay iti amin a kabaelak para ken Jehova, ken pulos a diak ‘paginanaen ti imak.’ (Eclesiastes 11:6) Kinapudnona, inikkannak ni Jehova kadagiti gundaway a mangusar iti imak iti pamay-an ti panagserbi kenkuana a diak pulos ninamnama. Ket binendisionanna dagiti panagreggetko. Palubosandak a mangyestoria iti biagko.
Dimmakkelak a kadua da manang ken manongko iti probinsia nga asideg iti ili ti Bicester iti United Kingdom. Iti dayta a lugar, nagabang dagiti nagannakko iti maysa a balay iti farm. Idi agtawenakon iti 19, nagpayunirak met a kas kadagiti kakabsatko. Kalpasanna, naapointaranak kas special pioneer idiay Scotland. Sa idi 1970, naawisak nga agserbi iti London Bethel. Agtawenak idi iti 23. Idi laengen addaakon iti Bethel a naammuak ti maipapan iti sign language. Dayta ti nangbalbaliw iti direksion ti biagko, ket nakaragragsakak ken kontentoak.
Nagsursuroak iti Sign Language
Idi addaakon iti Bethel, nai-assign-ak iti Mill Hill a kongregasion dagiti Saksi ni Jehova. Naam-ammok sadiay ti sumagmamano nga umel a Saksi. Uray no dida makasao, kayatko latta ti makigayyem kadakuada isu a makikatkatugawak kadakuada iti gimong.
Iti daydi a tiempo, awan pay ti sign language a kongregasion ditoy Britain. Makigimgimong dagiti umel kadagiti Ingles a kongregasion. Dagiti makangngeg ken makasao a kakabsat ti mang-interpret kadagiti paset ti gimong ngem sursurotenda ti dandani amin a sao ken grammar ti Ingles. Ngem bayat a siaanus a sursuruandak dagiti umel a kakabsat nga agsenias, naammuak a sabali gayam ti grammar ken urnos dagiti sasao iti sign language. Adayo a naiduma dayta iti Ingles! Idi naammuak dayta, lallalo nga inapresiar ken impategko ida gapu ta kanayonda latta a makigimong. Gapu iti dayta, inggaggagetko met ti agsursuro iti sign language.
Iti Britain, ti opisial a lengguahe dagiti umel ket ti British Sign Language, wenno BSL. Idi bumaybayag, nasursuro dagiti ag-interpret kadagiti gimong nga usaren daytoy a lengguahe imbes a ti maaw-awagan iti Sign Supported English. Isu nga ad-adda a nagunggonaan dagiti umel kadagiti gimong. Mas simmingedda pay kadagiti saan nga umel a kakabsat. No lagipek ti napalabas a nasurok a 50 a tawen, nakitak a talaga a binendisionan ni Jehova dagiti adda iti sign language. Kayatko nga iyestoria ti dadduma kadagiti nagpateg a pasamak nga impalubos ni Jehova a pakiramanak.
Rimmang-ay ti Trabaho iti Sign Language
Idi 1973, agarup makatawen kalpasan a naapointaranak kas panglakayen, imbaga ti umel a kabsat a ni Michael Eagers a baka mabalin a mangangaykami kadagiti gimong iti BSL. Idi inaprobaran dayta ti sangay, kaduak ti maysa pay a panglakayen a nangyurnos iti gimong iti sign language maminsan iti kada bulan idiay Deptford, iti abagatan a daya a paset ti London.
Nagsayaat dagiti resultana! Immatender iti umuna a gimong ti BSL dagiti umel a Saksi iti London ken dadduma pay a paset ti abagatan a daya ti England. Masursuro met laengen dagiti umel a kakabsat ken dagiti interesado ti maipapan ken Jehova iti bukodda a lengguahe. Kalpasan dayta a gimong, nagiinnestoriakami kadagiti kapadasanmi ken nagpapangankami. Naaddaanak met iti gundaway a nang-shepherding iti sumagmamano nga umel a kakabsat ta kasapulanda unay dayta.
Idi agangay, maang-angay metten dagiti gimong iti sign language iti siudad ti Birmingham ken Sheffield. Adu a saan nga umel a kakabsat a mayat nga agsursuro iti BSL ti immatender kadagiti gimong. Timmulong ti dadduma idi agangay a mangorganisar iti panangasaba iti sign language iti dadduma pay a paset ti pagilian.
Nabirokak ti Tungpal-Biag a Kaparehak
Iti aldaw ti kasarmi
Idi 1974, naam-ammok ti napintas a sister a ni Stella Barker. Special pioneer idi isuna iti maysa a kongregasion iti asideg ti Bethel. Natnag ti riknami iti maysa ken maysa ket nagkasarkami idi 1976. Kalpasanna, nagkaduakami ken Stella a nagserbi kas special pioneer. Ti kongregasionmi ket adda iti Hackney, North London. Kinaduanak ni Stella a mangsuporta iti sign language. No subliak ti napalabas, maibagak a ti panagpayunirmi kas agassawa ket nagsayaat a pangrugian ti panagasawami.
Di nagbayag, naawiskami ken Stella nga agserbi iti Bethel kas commuter. Nakabis-busy-kami! Nagserbiak pay kas substitute circuit overseer, nagisuroak iti Kingdom Ministry School para kadagiti panglakayen, sa timmulongak a nangorganisar iti pannaka-interpret dagiti Ingles a rehional a kombension iti sign language. Mabambannogkami idi ngem nakaragragsakkami ken mabangbang-arankami.—Mateo 11:28-30.
Idi 1979 ken 1982, nayanak ti dua nga annakmi a lallaki a da Simon ken Mark. Nakaragragsakkami, ngem nanayonan dagiti responsabilidadmi ta nagannakkamin. Kasanomi a napaggigiddan dagiti responsabilidadmi? Nagdesisionkami ken Stella a no adayo ti asaynmentko, mapankami amin kas pamilia ken gundawayanminto metten ti agpasiar. Kayatmi a makita dagiti annakmi a makaparagsak ti agserbi ken Jehova. Ania ti resultana? Bayat a dumakdakkel dagiti annakmi, saanda laeng a nasursuro ti sign language no di ket nagpayunirda met. Ket agarup 40 a tawen kalpasan nga innala ti Bethel ti urbon a baka dagiti nagannakmi, naawis met da Simon ken Mark nga agserbi iti Bethel. Naragsakankami unay!
Kaduak ni Stella ken ti dua nga annakmi idi 1995
Panangtulong Kadagiti Umel
Uray idi rugrugi ti 1990’s, awan pay ti umel a nagbalin a panglakayen iti Britain, ngem adda sumagmamano a ministerial nga adipen. Gapu iti dayta, masapul nga ikeddeng dagiti saan nga umel a panglakayen a saan a makapag-sign no adda asinoman nga umel a brother a “kualipikado a mangisuro” ken agserbi a panglakayen. (1 Timoteo 3:2) Ni Bernard Austin ti maysa kadagiti umel a ministerial nga adipen nga adda iti Ingles a kongregasion. Raraemen unay isuna dagiti kakabsat ken ipatpategna dagiti karnero ni Jehova. Naragsakanak unay idi naammuak a naapointaran ni Bernard a panglakayen! Kinapudnona, isuna ti kaunaan nga umel a panglakayen iti Britain.
Idi 1996, adda nagpateg a napasamak. Inaprobaran ti sangay ti pannakabukel ti umuna a sign language a kongregasion iti Britain. Masarakan dayta iti Ealing, West London. Kalpasanna, ad-adu pay a panagrang-ay ti napasamak.
Nagunggonaankami iti Amin a Panagtataripnong
Idi 1980’s ken 1990’s, nakipagtrabahoak iti Service Department iti Bethel, ngem addaak laeng iti balaymi. Sungbatak dagiti saludsod maipapan iti aniaman a trabaho a konektado iti sign language. No dadduma, agsurat dagiti kakabsat iti sangay no kasanoda a matulongan dagiti umel tapno maawatanda dagiti palawag kadagiti gimong, asamblea, ken kombension nga Ingles ti maus-usar a lengguahe. Saan pay idi a main-interpret dagiti palawag iti sign language kadagiti gimong ken asamblea, ken awan met dagiti publikasion para kadagiti umel. Isu a masansan a paregtaek dagiti kakabsat, umel man wenno saan, nga agan-anusda ken urayenda ti umiso a tiempo ni Jehova.
Nabendisionan ti panagan-anusmi! Di nagbayag, inorganisar ti sangay ti pannaka-interpret dagiti gimong ken asamblea nga Ingles iti sign language. Saan la a dayta. Agtugawen dagiti umel iti sango tapno makitada a naimbag ti agpalawag ken ti ag-interpret. Gapu iti dayta, mariknan dagiti umel a kakabsat a talaga nga ay-ayaten ida ni Jehova ken maipatpategda a paset ti naespirituan a pamiliana.
Idi Abril 1, 1995, napasamak ti umuna a sign language nga espesial nga asamblea. Naangay dayta iti Assembly Hall iti Dudley idiay West Midlands. Tinulongak ni Brother David Merry a dati a manangaywan iti sirkito a mangorganisar iti asamblea. Tapno makaatender ti dadduma nga umel a Saksi, nagbiaheda iti ginasut a kilometro manipud iti Scotland iti amianan ken iti Cornwall iti abagatan a laud. Malaglagipko pay laeng no kasano idi ti karagsakmi ta nasurok a 1,000 ti immatender iti daytoy a nakallalagip nga asamblea.
Kaduak ni Brother David Merry iti umuna a BSL nga asambleami idi 1995
Idi 2001, dakami ken ni Brother Merry ket inapointaran ti sangay a mangorganisar iti BSL a rehional a kombension iti sumaganad a tawen. Adu a trabaho ti kasapulan iti dayta! Ngem binendisionan ni Jehova ti kinagaget ti adu a boluntario, ket nagballigi dayta a nakallalagip a kombension! Kalpasan dayta, naaddaanak iti pribilehio a tumulong a mangorganisar kadagiti asamblea ken kombension iti sign language iti adu a tawen agingga a nangipaay ni Jehova kadagiti mas ub-ubing a brother a kualipikado a mangibaklay iti daytoy a trabaho.
Dagiti Video a Para Kadagiti Umel
Idi 1998, naragsakankami idi inruar ti organisasion ni Jehova ti kaunaan a sign language a publikasion iti BSL—ti broshur a What Does God Require of Us?—On Videocassette. Adu ti nayadalanmi iti Biblia gapu iti dayta.
Iti kombension idi 2002, damo a na-interpret dagiti Kingdom song iti BSL. “Makanta” met laengen dagiti umel a kakabsat dagiti nagpipintas a liriko a kadua ti signer ken mariknadan ti uni ti musika. Malaglagipko pay laeng ti maysa nga umel a panglakayen a nakasangit gapu iti ragsak bayat a “nakipagkanta” iti umuna a gundaway!
Adda pay nakallalagip a pasamak iti kombension idi 2002. Naipabuya idi ti maysa a drama a na-interpret iti sign language. Ti London Sign-Language Congregation ti napili a mangaramid iti dayta. Kasanomi nga aramiden dayta ket awan ti kapadasanmi? Tinulongannakami manen ni Jehova nga agbirok kadagiti kakabsat a makaammo nga agaramid ken agedit kadagiti pelikula. Nagpintas ti naaramid a drama! Kasta met, nakatulong unay dayta a kapadasanmi bayat ti 2003 agingga iti 2008. Ngamin, naaddaanak iti pribilehio a mangidaulo iti panagaramid kadagiti video drama iti Bethel para kadagiti kombension iti BSL.
Kaykayatmi ken Stella ti agserbi iti Bethel a kadua dagiti annakmi. Ngem narigat ti trabaho! Kalpasan ti sumagmamano a lawas a rehearsal ken shooting, nabambannogen dagiti aktor ken ti production team. Ngem sulit dayta! Maragragsakankami idi a makakita nga adu nga umel a kakabsat ti makasangit iti ragsak ta nagbalinen a napaypayso kadakuada dagiti salaysay iti Biblia.
Adu pay a naespirituan a regalo ti agtultuloy nga inted ni Jehova. Idi 2015, naaddaankami iti pagadalan nga edision Ti Pagwanawanan a BSL iti video format. Idi 2019, nairuar met ti libro ti Biblia a Mateo iti kasta met la a format. Ita, kompleton ti Kristiano a Griego a Kasuratan ken ur-urayenmi metten a malpas ti Hebreo a Kasuratan. Agyamyaman unay ken Jehova dagiti umel a kakabsat!
Kas ili ni Jehova, pasettayo ti naespirituan a pamiliana ket tultuladentayo ti saan a mangidumduma nga ayatna. (Aramid 10:34, 35) Agingga ita, masmasdaawak pay laeng ken ti pamiliak iti tiempo, pigsa, ken kuarta nga us-usaren ti organisasiontayo tapno matulongan ti amin a kita ti tattao, agraman dagiti umel ken bulsek. a
Talaga a saan a sayang dagita a panagregget ta adda itan pito a kongregasion a BSL iti Britain. Kasta unay ti ragsak ken pannakapnekko ta nakitak a rimmang-ay ti ‘bassit a nangrugian’ ti trabaho iti sign language. (Zacarias 4:10) Siempre, saan a mapasamak dayta no awan ti tulong ni Jehova. Idaldalanna ti organisasionna. Ipapaayna ti kasapulan dagiti adipenna tapno maipakaammoda ti naimbag a damag iti amin a kita ti tattao. Ken padpadakkelenna ti bin-i ti Pagarian iti puso dagiti maikari.
Kaduak ni Stella idi 2023
