Sumagmamano a tawen kalpasan nga immakar ti pamiliami iti ili ti Roodepoort, South Africa, natay ni Tatang. Idi 1947, iti edad a 16, agtrabtrabahoakon iti full-time iti telephone service ti gobierno tapno masuportarak ti pamiliami. Maysa nga aldaw idi addaak iti balay, adda immay a lakay ket intukonna nga ag-subscribe-kami iti Watchtower. Nag-subscribe-kami ta dimi kayat a mabainan.

 Ngem di nagbayag, nagbalinkami nga interesado iti talaga nga isursuro ti Biblia. Miembron ti Dutch Reformed Church ni Nanang sipud kinaubingna, ngem nakitana ti nagdumaan ti isursuro ti Biblia ken ti isursuro ti relihionna. Nakipagadalkami iti Biblia ken di nagbayag, umat-atenderkamin kadagiti gimong. Idi 1949, siak ti kaunaan a nagbautisar iti pamiliami. Intultuloyko ti nagtrabaho iti sumagmamano a tawen, ngem talaga a kayatko nga ad-adu pay ti maaramidak para ken Jehova.

 Idi 1954, nangrugiak nga ag-regular pioneer, ket dinamagko iti sanga nga opisina ti South Africa no sadino ti adda dakdakkel iti panagkasapulanna. Inrekomenda ti sanga nga opisina ti siudad ti Pretoria ken inyurnosda a makaduak ti sabali pay a payunir a sister. Komportable ti nagyananmi, ken malaglagipko pay ti naimas a koeksisters—kasla nasallapid ken naprito a doughnut a naisawsaw iti arnibal—a mailaklako idi iti asidegmi.

 Idi nagasawa ti kaduak a payunir, sinaludsod ti branch servant a ni Brother George Phillips, no kayatko ti ag-special pioneer, ket inawatko dayta.

 Nangrugiak kas special pioneer idi 1955, iti ili ti Harrismith. Narigatankami iti kaduak a payunir nga agbirok iti nasayaat a pagyanan. Kas pagarigan, idi naammuan ti simbaan sadiay ti maipapan kadakami, pinilitda ti landlady-mi a papanawennakami.

 Idi agangay, naibaonak iti Parkhurst, Johannesburg. Nakaduak sadiay ti dua a misionera. Idi kuan, nagasawa ti maysa kadakuada, ken naibaon met ti maysa iti sabali a lugar. Maysa a sister nga agnagan Eileen Porter ti nangawis kaniak nga agdagus iti balayda, uray no awanen ti bakante a kuarto para kaniak. Iti bassit a paset ti balayda a nakortinaan ti pagturturogak idi. Nasingpet ken makaparegta ni Eileen isu a nalag-an ti riknak kenkuana. Bilibak iti kinaregtana uray no nakaad-adu ti trabahona iti balayda.

 Idi kuan, naibaonak iti Aliwal North, maysa nga ili iti probinsia ti Eastern Cape, tapno makaduak ti sister nga agnagan Merlene (Merle) Laurens. Agpadakami a nasurok a 20 ti tawenna, ket naparegtakami iti ulidan ti natataengan a sister nga agnagan Dorothy, nga aw-awaganmi iti Anti Dot. Idi ub-ubing pay, napadasanna ti makagat kadagiti aso bayat a mangaskasaba ngem saan a dayta ti nangpabaaw iti regtana.

 Idi 1956, naawis ni Merle nga agatender iti maika-28 a klase ti Gilead. Kaykayatko met idi ti makikadua kenkuana nga ageskuela! Imbag laengen ta adda ni Anti Dot a nangaywan a naimbag kaniak, ket nagbalinkami a nadekket nga aggayyem uray no adayo nga in-inauna ngem siak.

 Imadyinem no kasano ti karagsakko idi naawisak, kas ken Merle, nga ag-Gilead! Sakbay a nageskuelaak, agarup walo pay a bulan nga addaak iti ili ti Nigel, ket nakaduak ni Kathy Cooke, a naggraduar iti Gilead. Lallaloak pay a nagbalin nga eksayted nga ageskuela iti Gilead gapu ken Kathy, ket idi Enero 1958, napanakon idiay New York.

 Iti Gilead, naka-roommate-ko ni Tia Aluni, a maysa a sister a Samoan, ken ni Ivy Kawhe, a maysa a sister a Maori. Idi addaak iti South Africa, gapu iti gobierno nga apartheid, nakasina dagiti puraw iti dadduma a puli, isu nga espesial kaniak a maka-roommate-ko dagitoy a sister. Dagus a nagbalinak a nasinged kadakuada, ken maragragsakanak nga agbalin a paset iti kasta nga internasional a klase.

 Ti maysa kadagiti instruktormi iti Gilead ket ni Brother Maxwell Friend. No dadduma, medio istrikto a mangisuro. Adda tallo a silaw iti classroom-na, nasuratan dagita iti “Pitch,” “Pace,” ken “Power.” Bayat nga agpalpalawag wenno agdemdemo ti maysa nga estudiante, pagsilawen ni Brother Friend ti maysa kadagiti silaw no ti panagriknana ket adda kurang iti presentasion ti estudiante. Gapu ta managbabainak, masansan a pagsilawenna dagita, ket no dadduma, urayak la makasangit! Ngem kaykayatko latta ni Brother Friend. No dadduma, no busy-ak iti asaynmentko nga agdalus bayat ti break-mi iti klase, umaynak ikkan iti sangatasa a kape.

 Bayat ti panaglabas dagiti bulan, pampanunotekon no sadino ti pakaibaonak. Ti dati a kaduak a payunir a ni Merle ket naggraduaren iti Gilead ken naibaon idiay Peru. Imbagana a mabalinko a saludsoden ken ni Brother Nathan Knorr, a mangidadaulo idi iti trabaho no mabalinko a suktan ti kaduana a misionera a dandanin agkasar. Gapu ta adda dagiti lawas a bumisita ni Brother Knorr iti pasilidad ti Gilead, nalakak laeng a nakasarita isuna. Idi naggraduarak, naibaonak idiay Peru!

 Maragragsakanak ta agkaduakami manen ken Merle iti Lima, Peru! Iti rugrugi pay laeng, addan dagiti narang-ay nga iyad-adalak iti Biblia uray no agsursuroak pay laeng nga ag-Spanish. Di nagbayag, naibaonkami ken Merle iti Ayacucho, nga adda iti kabambantayan. Aminek a saan a nalaka ti asaynmentmi. Nakasursuroak met nga ag-Spanish, ngem adu a tattao sadiay ket Quechua laeng ti ammoda a lengguahe, ken narigatankami a mangiruam iti bagimi iti nangato a lugar ta basbassit ti oxygen sadiay.

 Panagriknak awan unay ti maar-aramidak iti Ayacucho, ken pinampanunotko pay no adu met laeng a tattao ti umawat iti kinapudno iti dayta a rehion. Ngem ita, addan nasurok a 700 nga agibumbunannag iti siudad ti Ayacucho ken maysa a remote translation office para iti lengguahe a Quechua (Ayacucho).

 Idi kuan, nakiasawa ni Merle iti maysa a manangaywan iti sirkito nga agnagan iti Ramón Castillo, ket idi 1964, nageskuela ni Ramón iti Gilead iti 10 a bulan. Kaklasena ti dati a kaklasek iti Gilead a ni Fu-lone Liang, nga agserserbin idiay Hong Kong. Naawis manen nga ageskuela iti Gilead para iti kanayonan a pannakasanay para kadagiti responsabilidad iti sangay. a Dinamag ni Fu-lone ni Ramón no komustaak idiay Peru, di nagbayag, agsinsinnuratkamin ken Fu-lone.

 Idi damo pay laeng, imbagan ni Fu-lone no ania ti kayat a sawen ti panagsinsinnuratmi, agdedeytkamin. Idiay Hong Kong, gapu ta kanayon a mapmapan iti post office ni Harold King a padami met laeng a misionero, immanamong nga isun ti mangibuson kadagiti surat ni Fu-lone. Kadagiti sobre dagiti surat ni Fu-lone para kaniak, agdrowing ni Harold kadagiti babassit a piktiur wenno agsurat kadagiti ababa a note a kas iti, “Ibagakto a suratannaka a kanayon!”

 Kalpasan ti agarup 18 a bulan a panagsinsinnuratmi ken Fu-lone, nagdesisionkami nga agkasar. Pimmanawak iti Peru kalpasan ti panagserbik sadiay iti agarup pito a tawen.

 Nagkasarkami ken Fu-lone idi Nobiembre 17, 1965. Maragragsakanak iti baro a biagko idiay Hong Kong. Nagyankami ken lakayko iti sanga nga opisina a kaduami ti dua pay nga agassawa. Bayat nga agtrabtrabaho ni Fu-lone iti translation iti sangay, rummuarak met a mangasaba. Narigat ti agsursuro iti Cantonese, ngem nakaan-anus nga insurodak dagiti misionera ken ni lakayko. Nakatulong ti panangikonduktak iti panagadal iti Biblia kadagiti ubbing bayat nga agsursuroak iti lengguahe ta mas relaksak.

 Kalpasan ti sumagmamano a tawen, immakarkami ken Fu-lone iti missionary home idiay Kwun Tong, Hong Kong tapno mangisuro ni Fu-lone iti Cantonese kadagiti kasangsangpet a misionero. b Maragragsakanak a mangasaba iti dayta a lugar isu nga adda idi dagiti aldaw a diak payen kayat ti agawid!

 Idi 1968, permi ti ragsakko a nakaawat iti baro a publikasion a pangyadal iti Biblia a Ti Kinapudno a Mangiturong iti Biag nga Awan Inggana. Nasimsimple daytoy ngem iti dati a pangyadal iti Biblia a “Mapapati Coma Ti Dios,” lalo kadagiti mayad-adalan a saan a pamiliar iti Biblia wenno iti Kristianismo.

 Ngem nagkamaliak ta impagarupko a no masungbatan dagiti iyad-adalak iti Biblia dagiti nayimprenta a saludsod ti publikasion ket awatendan ti kinapudno. Kas pagarigan, diak man laeng nadlaw nga uray nalpasen ti maysa kadagiti iyad-adalak iti Biblia ti libro a Kinapudno ket saan latta a mamati iti Dios! Nasursurok a masapul nga ammuek ti rikna dagiti iyad-adalak iti Biblia maipapan kadagiti nasursuroda.

 Kalpasan ti sumagmamano a tawenmi idiay Kwun Tong, nagsublikami iti sangay, ket nangrugi nga agserbi ni Fu-lone kas miembro ti Komite ti Sangay iti Hong Kong. Kadagita a tawtawen, nagtrabahoak iti housekeeping ken iti reception desk. Adda dagiti tiempo a masapul nga agbiahe ni Fu-lone para kadagiti kompidensial a nateokratikuan nga asaynmentna isu a saanko a mabalin ti sumurot, ngem maysa a pribilehio para kaniak a suportaran ni lakayko bayat nga as-asikasuenna dagiti responsabilidadna.

 Makapaladingit ta idi 2008, nagbaliw ti biagko iti maysa laeng a rabii. Bigla a natay ti ipatpategko a ni Fu-lone bayat nga adda iti biahe, idi dandanin ti Memorial ti ipapatay ni Jesus. Permi ti ladingitko. Dagus nga immay dagiti kakabsat tapno liwliwaendak. Bayat ti palawag ti Memorial, tinulongak ti maysa nga interesado a mangbirok kadagiti maibasbasa a teksto tapno mateppelak ti agsangit. Napabilegak iti maysa kadagiti paborito a teksto ni Fu-lone, kunana: “Siak, ni Jehova a Diosmo, ig-iggamak ti kannawan nga imam . . . ‘Tulongankanto.’”—Isaias 41:13.

 Pito a tawen kalpasan a natay ni Fu-lone, inrekomenda dagiti kakabsat iti Hong Kong nga umakarak iti dakdakkel a sangay tapno mas maasikaso ti salun-atko. Isu nga idi 2015, immakarak iti sangay ti South Africa, nga asideg iti lugar a damo a nakaammuak iti kinapudno idi 1947.

 Nakaad-adu dagiti naragsak a tawen a panagserbik ken Jehova, ken nariknak a binendisionanna ti kinatulokko. Adda latta komunikasionko kadagiti dati nga inyadalak iti Biblia a matalek itan nga agserserbi ken Jehova, ken nakitak a binendisionan ni Jehova ti ipagaruptayo a bassit a maar-aramidantayo iti trabaho a panangasaba. Kas pagarigan, immadu dagiti agibumbunannag iti Peru manipud iti agarup 760 idi 1958, immabuten dayta iti agarup 133,000 idi 2021, ken dagiti agibumbunannag iti Hong Kong manipud iti agarup 230 idi 1965, nagbalinen dayta a 5,565 idi 2021.

 Gapu iti edadko, diakon maaramidan ti dati a maar-aramidak. Ngem situtulokak latta nga agpausar, ken padpadaanak ti tiempo a maipakitak dayta a kababalin iti baro a lubong ni Jehova, ta adunto ti trabaho ket magagaranakto a mangibaga: Situtulokak a mapan.