Ni Manong Cecil ket napakumbaba ken talaga nga ipatpategna dagiti kakabsat. Ti ulidanna, kasta met ti ulidan ni Nanang ken ti dadduma pay a matalek a kakabsat iti kongregasion ti nakatulong tapno maaddaanak iti ‘tarigagay a mangaramid iti pakaragsakan’ ni Jehova wenno mangited kenkuana iti kasayaatak. (Filipos 2:13) Maragsakanak a mangyestoria kadakayo iti kapadasak.

 Nayanakak idi 1943. Aggigiankami iti asideg ti siudad ti Bundaberg iti kaunasan a rehion ti Queensland, Australia. Kada rabii ti Sabado, agpaili dagiti tattao iti lugarmi tapno aglalangen. Gapu iti dayta a nakaugalianda, iti maysa a rabii ti Sabado idi 1939, adda dua a payunir (wenno full-time a ministro dagiti Saksi ni Jehova) a nakisarita kadagiti nagannakko maipapan iti Biblia. Nagustuanda unay dagiti naammuanda ket idi agangay, nagbalinda a Saksi ni Jehova. Isu a napadakkelkami ken manangko a Jean iti Saksi a pamilia. Ngem permi ti ladingitmi idi natay ni Tatang gapu ta natnag iti agdan iti balaymi. Pito laeng idi ti tawenko ket nakasaksakit dayta a bigla nga ipapatayna. Ngem ti malaglagipko ken Tatang ket ti kinagagetna ken ti kinalaingna nga agpakatawa. Kailiwko unay a makita manen ni Tatang ken maam-ammo pay a naimbag inton agungar!—Aramid 24:15.

 Nasingpet ken nainkalintegan ni nanangko. Nawayakami ken manangko a mangibaga iti kayatmi ken saanmi a kayat. Ngem saan a nalukay ni Nanang no maipapan iti panangsurot kadagiti prinsipio ti Biblia ken panagdayaw ken Jehova. Regular a makigimgimongkami, ken palpalagipannakami ni Nanang a saankami unay a makikadkadua ken Manang Jean kadagiti saan a Saksi a kaeskuelaanmi no malpasen ti klase. (1 Corinto 15:33) No malaglagipko dagita, agyamyamanak unay ta kasta ti panangpadakkel kadakami ni Nanang.

 Naregta met ni Nanang a mangasaba. Masansan idi nga agaplay kas vacation pioneer (maaw-awagan itan kas auxiliary pioneer). Malagipko nga adda idi nasurok a 50 a balay a regular nga itultulodan ni Nanang iti magasin a Pagwanawanan ken Agriingkayo! Ket uray idi baketen ken nakapsuten, saan a pulos a bimmaaw ti regtana a tumulong kadagiti interesado. Gapu iti panagayatna iti dadduma, lalo kadakami nga annakna, ay-ayatenmi unay ni Nanang ken inkagumaanmi a tuladen. Idi 1958, indedikarko ti biagko ken Jehova ken nagpabautisarak iti edad a 14.

 Di nagbayag, nabautisaran met ni Manong Rudolf a kakongregasionmi. Nasurok a 20 ti tawenna ken naggapu idiay Germany. Masansan a kasabaanmi ken Manong Rudolf dagiti tattao nga adda iti luganda nga agur-uray kadagiti kapamiliada nga agshop-shopping.

 Naregta ni Manong Rudolf ket aw-awisennak no kua nga agpayunir no bakasion iti eskuelaan. Naminsan, innem a lawas a nagkaduakami iti siudad ti Gladstone, agarup 190 a kilometro (118 a milia) iti amianan ti Bundaberg. Kasla kabsatkon ni Manong Rudolf. Gapu iti panangtultulongna kaniak ken ti kinaragsak ti ag-vacation pioneer, kayatkon ti ag-regular pioneer. Idi 16 ti tawenkon, nag-regular payunirak ket determinadoak nga agtultuloy iti amin-tiempo a panagserbi.

 Ti damo a nagpayunirak ket idiay Mackay, maysa a siudad nga asideg iti baybay iti amianan ti Bundaberg ken asideg iti Great Barrier Reef. Kalpasan ti makatawen, naapointaranak kas special pioneer a iti edad a 17. Nagserbiak iti nasulinek a paset ti Australia a bassit laeng ti populasionna. Ti partnerko a payunir a ni Brother Bennett (Ben) Brickell ket maysa a dinutokan ti espiritu. Nasurok nga 30 a tawen nga in-inauna ngem siak. b Nabayagen a payunir ken ibilbilang ti adu a nakalalaing a payunir, isu nga ibilangko a pribilehio ti makipagtrabaho kenkuana!

 Ti teritoriami ket ti amianan a laud a paset ti Queensland nga adda iti Gulf Country—maysa a rehion nga abay ti Gulf of Carpentaria. Iti daydi a tiempo, dakami laeng ken Angkel Ben ti Saksi iti dayta a teritoria a bassit ti populasionna. No dadduma, agbiahekami iti adu nga oras a mapan iti sumaruno a balay. Bayat ti napaut a panagbiahemi kadagiti natapok a dalan, masansan nga iyestoria ni Angkel Ben dagiti kapadasanna iti ministerio, kas koma iti panagusarda iti sound car c no mangasabada idi panawen ti Gubat Sangalubongan II, idi maiparit pay laeng ti trabaho dagiti Saksi ni Jehova iti Australia.

 No malpasen ti agmalmalem a panangasabami, agbirokkami iti mayat a lugar iti igid ti kalsada a pagturoganmi. d Agalakami met kadagiti kayo nga usarenmi nga agluto iti pangrabiimi. Mangyaplagak iti waterproof a pagiddaak ken adda met ules ken punganko. Malaglagipko pay nga agam-amangaak unay ken Jehova bayat a makitkitak idi ti langit a napno kadagiti naraniag a bituen gapu ta awan ti silaw iti aglawlawmi.

 Gapu ta nasulinek ti teritoriami, delikado ti maperdian iti lugan. Naminsan, adda naperdi a paset ti luganmi. Nakapudpudot idi ken bassit ti danummi. Tapno makaala ni Angkel Ben iti kasukat ti naperdi a piesa, nakilugan kadagiti mapan iti ili ti Cloncurry. Tallo nga aldaw a binantayak ti lugan. Adda sumagmamano a lugan a lumablabas iti kada aldaw, ket nagsisingpet dagiti drayber ta ikkandak no kua iti danum. Adda pay lalaki a nangted kaniak iti daanen a libro sa imbagana, “Basaem daytoy. Baka makatulong.” Nasdaawak ta maipapan dayta kadagiti Saksi ni Jehova a naibalud idi panawen ti Nazi uray no saan nga impablaak dayta ti organisasiontayo.

 Dandani makatawen a nagkaduakami ken Angkel Ben a nagpayunir. Ti maudi nga imbagana kaniak sakbay a nagsinakami ket, “Dika sumuksuko, Terry.” Gapu iti kinamatalek ken kinaregta ni Angkel Ben, natignayak nga ad-adda pay nga agtultuloy iti amin-tiempo a ministerio.

 Kalpasan ti sumagmamano a tawen a panagpayunirko kadagiti nasulinek a lugar, naawisak nga agserbi kas manangaywan iti sirkito. Makalawas wenno napapaut pay a bisitaek ti tunggal kongregasion ken dagiti naiputputong a grupo. Uppat a sirkito amin ti nabisitak. Karaman kadagita dagiti kongregasion iti Queensland ken New South Wales. Kalpasanna, idi 1971, nasorpresaak idi naaddaanak iti pribilehio nga ageskuela iti maika-51 a klase ti Gilead, ti eskuelaan dagiti Saksi ni Jehova idiay New York para kadagiti misionero. Natagiragsakko ti lima a bulan a naanep a panagadal iti Biblia ken ti makaparegta a pannakikadua kadagiti padak nga estudiante ken dagiti instruktormi. Insagananak dayta para iti sumaruno nga asaynmentko—ti panagmisionero iti Taiwan.

 Siamkami nga agkakaklase a naibaon iti Taiwan, a pakairamanan ni Ian Brown a taga-New Zealand. Isu ti nagbalin a partnerko a misionero. Awan unay ti ammomi maipapan iti Taiwan. Sami la naammuan ti lokasionna idi kinitami ti mapa.

 Nagdakkel ti nagdumaan dagiti nasulinek a lugar iti Queensland ken ti Taiwan. Ti umuna a dakkel a nakarigatanmi ket ti lengguahe a Chinese. Medio nabayag nga awan ti maaw-awatak kadagiti gimong, a kangrunaan a paggapgapuan dagiti naespirituan a pammaregta. Diak met unay makasarsarita dagiti kakabsat. Gapu kadagita, ad-adda a nakitami ti pateg dagiti nasursuromi iti Gilead. Nakatulong met ti regular a panagadal iti Biblia ken napasnek a panagkararag tapno agtultuloy a natibker ti espiritualidadmi. Uray no marigatankami a makisarita kadagiti kakabsat, naparegtakami unay iti ayatda kadakami ken ni Jehova.

 Idi nakadanonkami ditoy Taiwan, nagadalkami amin a misionero iti lengguahe a Chinese. Ti nangisuro kadakami ket ni Sister Kathleen Logan e a taga-Australia. Nagturpos isuna iti maika-25 a klase ti Gilead. Impamaysami ti nagsursuro iti dayta a lengguahe, ken naiparegta kadakami nga usarenmi a dagus dagiti nasursuromi. Iti umuna nga aldawmi ken Ian iti ministerio, nangikabesakami iti ababa a presentasion. Bayat a mapmapankami iti teritoria, pagsarsaritaanmi no asino ti umuna a makisarita. Gapu ta in-inaunaak ngem ni Ian, inyangawko a siak ti masurot, ket isuna ti immuna a pinagsaok. Ti bumalay ket Chinese a desente ti itsurana. Naanus a dimngeg bayat nga inkarkarigatan ni Ian ti agsao iti Chinese nga adda laokna nga English. Idi kuan, nakigtotkami ta dirediretso nga English ti inusarna a nagdamag no ania ti masapulmi! Nabayag met bassit a nagsasaritakami ket idi nalpasen, pinaregtanakami nga itultuloymi ti agsursuro iti Chinese. Gapu iti imbagana, napabilegkami a “di sumuksuko” a kas iti ibagbaga idi ni Angkel Ben.

 Ti teritoriami ket ti dakkel a paset ti siudad ti Taipei, a kapital ti pagilian. Saan pay a nakaskasabaan ti kaaduan a tattao ta manmano pay laeng idi ti Saksi. Ngem saan a dayta ti nangupay kadakami ken Ian nga agtultuloy a naregta a mangasaba. Masansan a ginasut idi ti maipapaimami a magasin iti kada bulan. Adda dagiti mangala iti magasin tapno laeng maammuanda no asinokami ken no ania ti ibagbagami. Ngem intultuloymi latta nga inaramid ti amin a kabaelanmi a mangiwaras kadagiti bukel ti kinapudno maipapan iti Pagarian. Ngamin, mangnamnamakami nga agtubonto dagita kadagiti nasayaat ti panagpuspusona a tattao.

 Bayat ti panagmisionerok, nagbalin a gayyemko ti maysa a Taiwanese a sister a ni Wen-hwa. Ipatpategna ti kinapudno ken kayatna a matulongan dagiti tattao ditoy a magunggonaan iti mensahe ti Biblia a kas kenkuana. Isu nga adukami a misionero a tinulonganna tapno lumaingkami nga agsao iti lengguaheda. In-inut a natnag ti riknak iti daytoy managsakripisio a sister ket nagkasarkami idi 1974.

 Tinulongan ni Wen-hwa dagiti misionero tapno agbalinda a mas epektibo a mangasaba. Kas pagarigan, tinulongannakami nga ad-adda a mangtarus iti lengguahe babaen ti panangisurona kadagiti kaugalian ken panagpampanunot dagiti Taiwanese. Tinulongannakami pay a mangibagay kadagiti presentasionmi kadagiti tattao iti teritoria, a kaaduanna ket Buddhist ken Taoist. Gagangay ti panagdaydayaw kadagiti inapo ken kaaduan a tattao ti saan pay a pulos nakabasa wenno nakakita iti Biblia. Gapu iti dayta, nakapokus dagiti presentasionmi iti Namarsua a ni Jehova ken no apay a siguradotayo a talaga nga adda isuna. Kas pagarigan, no ibaga ti maysa a mannalon wenno mangngalap: “Agdepdependekami iti langit iti taraon,” damagenmi met no kua kenkuana: “Asino daydiay mangmangted iti amin a taraon? Saan kadi nga isu daydiay ti mannakabalin-amin a Dios, daydiay nangparsua iti amin a banag ken maikari a pagdayawantayo?”

 Iti panaglabas ti tiempo, nabendisionan ti panagreggetmi ta nagtubo dagiti bukel ti kinapudno iti puso dagiti nasingpet a tattao. Inkagumaan ti dadduma kadagita a mayad-adalan iti Biblia a paruten iti pusoda dagiti di umiso a sursuro ken kaugalian a saan a naibatay iti Biblia. Naaramidanda dayta ken simmayaat ti biagda iti tulong dagiti misionero ken dagiti kakabsat iti dayta a lugar. (Juan 8:32) Adu a brother ti naapointaran kas panglakayen ken ministerial nga adipen iti kongregasion ken adu a kakabsat ti simrek iti full-time, a pakairamanan ti panagserbi iti Bethel.

 Sipud idi 1976, nagserbiak a miembro ti Branch Committee iti Taiwan bayat a misioneroak iti ruar ti Bethel. Idi 1981, naawiskami ken Wen-hwa nga agserbi iti Bethel ket nagtultuloyak a miembro ti Branch Committee iti adu a tawen. Nasuroken nga 60 a tawen nga addaak iti full-time a panagserbi. Nasurok a 50 a tawen kadagita ti kaaddak ditoy Taiwan ken dandani metten 50 a tawen a kaduak nga agserserbi ti ipatpategko nga asawa. Ni Ian Brown a gayyemko ken dati a partnerko a misionero ket nagtalinaed iti full-time a panagserbi ditoy agingga iti ipapatayna idi 2013.

 Ikagkagumaanmi ken Wen-hwa ti makiraman kadagiti adu a trabaho iti Bethel, iti Chinese a kongregasionmi, ken iti ministerio. Agyamyamankami ken Jehova gapu kadagitoy a nagsayaat a pribilehio. Idi ubingak, inikkannak ni Jehova iti tarigagay ken bileg a naimpusuan nga agserbi kenkuana, ket agtultuloy latta nga ipapaayna dayta kadakami ken Wen-hwa uray ita a baket ken lakaykamin.