MILTIADIS STAVROU | PAKASARITAAN TI BIAG
“Nariknami nga Ay-aywanan ken Idaldalannakami ni Jehova”
Idi agtawenak iti 13, kas iti kaaduan a padak nga agtutubo, kaykayatko ti agbuya kadagiti aglabas a lugan iti lugarmi iti Tripoli, Lebanon. Adda maysa a nakaala iti atensionko—ti nagpintas a nalabaga nga American car a bagi ti maysa a Siriano. Isu a talaga a nakigtotak idi imbaga ti padi ti relihionmi nga Orthodox Church a batuenmi kano daydiay a lugan ta bagi ti maysa a Saksi ni Jehova!
Imbagami iti padi a baka matamaanmi ti drayber. Insungbatna: “Patayenyo ketdi. Usarenyo ti sutanak a mangpunas iti darana iti imayo!” Uray ipagpampannakkelko idi ti Orthodox, gapu kadagita a di nasayaat nga imbagana, nagikkatak iti relihionko. No sublianak dayta a pasamak, maibagak a dayta ti timmulong kaniak tapno maammuak ti kinapudno maipapan ken Jehova.
Naammuak ti Kinapudno Maipapan ken Jehova
Nagduduma idi ti kultura, lengguahe, ken relihion dagiti tattao iti sangladan a siudad ti Tripoli. Ipagpampannakkel ti tunggal pamilia ti bukodna a puli, ket kasta met ti pamiliami. Nakimiembrokami kada manongko iti maysa a grupo a maaw-awagan iti Soldiers of the Faith, a a bumusbusor kadagiti Saksi ni Jehova. Awan pay idi ti naam-ammomi a Saksi ni Jehova, ngem imbaga ti padimi a maysada kano a gang a bumusbusor iti Greek Orthodox Church a ni Jehova ti liderda. Sangkaibaga ti padimi a kabilenmi dagiti maam-ammomi a Saksi.
Saanko nga ammo nga adda gayam am-ammo dagiti kakabsatko a Saksi ni Jehova. Ngem imbes a kabilenda ida, nakipagadalda ketdi iti Biblia kadagiti Saksi tapno iparupada kadakuada a kamalida. Maysa a rabii, nagawidak ket nasangpetak dagiti Saksi nga adda iti salasmi a mangyad-adal iti Biblia kadagiti kapamiliak ken iti dadduma a kaarrubami. Permi ti rurodko! Kasano koma a kaya dagiti kakabsatko a traidoren ti Orthodox? Pumanawak koman ngem inayabannak ti maysa a kaarrubami, a pagaammo a dentista ken maysa met laeng a Saksi. Pinatugawnak ken imbagana a dumngegak. Basbasaen iti napigsa ti maysa a gayyemmi ti Salmo 83:18 iti mismo a Bibliak. Ditak a naammuan nga agul-ulbod ti padimi. Saan a lider ti gang ni Jehova—isuna ti maymaysa a pudno a Dios!
Di nagbayag kalpasan ti bautismok
Kayatko pay a mas maam-ammo ni Jehova, isu a nakipagadalak met iti Biblia iti balaymi. Ni Brother Michel Aboud ti nangyad-adal kadakami. Maysa nga aldaw, adda insaludsod ti gayyemmi. Ubingak pay laeng, isalsaludsodko met daytan. Insaludsodna, “Sino ti nangaramid iti Dios?” Intudo ni Brother Aboud ti maysa a pusa nga adda iti tugaw. Inlawlawagna nga awan ti abilidad dagiti pusa a mangawat kadagiti ibagbaga ken pampanunoten dagiti tattao. Kasta met, saantayo a maawatan ti amin a banag maipapan iti Dios. Tinulongannak dayta a simple nga ilustrasion tapno maawatko nga adda dagiti banag maipapan ken Jehova a saanko a talaga a naan-anay a maawatan. Di nagbayag, indedikarko ti biagko ken Jehova a Dios ket nagpabautisarak idi 1946. Kinse anyosak idi.
Naaddaan iti Direksion ti Biagko Idi Nagpayunirak
Idi 1948, nakikaduaak ken manongko a Hanna iti negosiona a photography. Kaabay ti shop-na ti paint shop a kukua ti kabsat a ni Najib Salem. b Nakaturtured a mangasaba ni Najib, agingga a natay idi agtawen iti 100. Idi kinaduak a mangasaba kadagiti purok, nakitak a nakaturtured isuna uray nabusbusor. Ken kasla kayana a kasabaan amin aniaman ti relihionda. Nagdakkel ti naaramidanna kaniak ti nakitak a kinaregtana.
Dakkel ti impluensia kaniak ni Najib Salem (makinlikud, kannawan)
Maysa nga aldaw, binisitanakami iti pagtrabtrabahuanmi ti maysa a Lebanese a sister a ni Mary Shaayah, a naggapu iti United States. Nag-busy isuna kas maysa nga ina, ngem nakaregregta a payunir. Gapu iti dayta a panagbisitana, dakkel ti nagbalbaliwan ti biagko. Nasurok a dua nga oras nga inyes-estoria ni Mary dagiti kapadasanna iti panangasaba. Sakbay a pimmanaw, kimmita kaniak ni Mary ket imbagana: “Milto, baroka pay laeng, ania ngata no padasem ti agpayunir?” Imbagak a diak kaya ta masapul nga agtrabahoak. Idi kuan, insaludsodna: “Kasano kabayagko a nakisarsarita kenka ita a bigat?” Insungbatko: “Agdua met a nga oras.” Imbaga ni Mary: “No mapanka mangasaba iti kasta a kapaut kada aldaw, total kasla awan met unay ti trabahom no kastoy nga oras, makapagpayunirka. Padasem ngata uray makatawen laeng, sakanto agdesision no ituloymo wenno saan.”
Uray no saan a normal iti kulturami a denggen ti balakad ti maysa a babai, para kaniak, nagmayat ti suhestionna. Dua a bulan kalpasanna, idi Enero 1952, rinugiak ti agpayunir. Dandani 18 a bulan kalpasanna, nakaawatak iti imbitasion nga ageskuela iti maika-22 a klase ti Gilead.
Idi agpipinnakadakami kadagiti kapamilia ken gagayyemko sakbay a mapanak ageskuela iti Gilead idi 1953
Kalpasan a naggraduarkami, naibaonak idiay Middle East. Awan pay makatawen, inkasarko ni Doris Wood, maysa a naragsak a padak a misionero manipud England nga agserserbi met idi idiay Middle East.
Panangipakaammo iti Kinapudno Idiay Syria
Di nagbayag kalpasan ti kasarmi, naibaonkami ken Doris idiay Aleppo, Syria. Gapu ta maiparit ti trabahotayo sadiay, kaaduan nga inyad-adalanmi iti Biblia ket inyam-ammo dagiti kakabsat.
Maysa nga aldaw, sinarungkaranmi ti maysa a babai a nangipakita iti interes iti Biblia. Agpigpigerger a mabutbuteng idi linukatanna ti ridaw ket imbagana: “Agannadkayo! Kagapgapu dagiti polis ditoy. Kayatda a maammuan ti paggigiananyo.” Nalawag nga ammo dagiti polis no sadino ti pangyad-adalanmi iti Biblia. Tinawaganmi dagiti kakabsat a mangiwanwanwan iti trabaho iti Middle East, ket imbagada kadakami a pumanawkamin a dagus iti pagilian no posible. Uray no naladingitankami a nangpanaw kadagiti iyad-adalanmi iti Biblia, nariknami nga ay-ayatennakami ni Jehova gapu ta protprotektarannakami.
Inwanwannakami ni Jehova Idiay Iraq
Idi 1955, nayakar ti asaynmentmi idiay Baghdad, Iraq. Uray mabalinmi met a kasabaan ti amin a tattao idiay Iraq, nagpokuskami a mangasaba kadagiti mangibilbilang iti bagida a Kristiano.
Dagiti kakaduak a misionero idiay Iraq
No addakami kadagiti tiendaan wenno kalsada, padpadasenmi met a kasarita dagiti Muslim iti nainggayyeman a pamay-an. Kaaduanna a mangibaga ni Doris kadagiti banag a paginteresan dagiti makasaritana. Kas pagarigan, ibagana no kua: “Kanayon nga ibagbaga ni Tatang a manungsungbattayo iti Namarsua kadatayo.” (Roma 14:12) Sananto ibaga: “Kanayon a makatultulong kaniak dayta. Sika ngay, ania ti makunam?”
Natagiragsakmi ti agserbi idiay Baghdad iti dandani tallo a tawen. Tinulonganmi dagiti kakabsat a lallaki sadiay a siaannad a mangorganisar iti trabaho a panangasaba. Inusarmi ti pagtaenganmi a misionero nga aggigimong iti Arabic a lengguahe. Makaparagsak a makita nga umay makigimong dagiti aggapu iti tribu dagiti Asiriano a kaaduan kadakuada ti mangibilbilang iti bagida a Kristiano. Idi nakitada nga adda ayat ken panagkaykaysa kadagiti gimongtayo, nabigbigda a datayo a talaga dagiti pudno nga adalan ni Jesus.—Juan 13:35.
Aggigimongkami iti pagtaenganmi a misionero idiay Baghdad
Maysa kadagiti dagus nga immawat iti mensahetayo ket ni Nicolas Aziz, maysa a nasingpet ken napakumbaba a pamiliado a lalaki nga Armenian-Assyrian ti pulina. Inakseptar a dagus ni Nicolas ken ti asawana a ni Helen ti kinapudno nga agduma a persona ni Jehova ken ti Anakna a ni Jesus. (1 Corinto 8:5, 6) Malagipko pay laeng ti aldaw a nabautisaran ni Nicolas ken ti 20 a dadduma pay idiay Karayan Euphrates.
Nakitak ti Ima ni Jehova Idiay Iran
Idi 1958, idiay Iran
Idi Hulio 14, 1958, kalpasan ti kudeta a nakatayan ti ari ti Iraq a ni Faisal II, naideportakami idiay Iran. Intultuloymi sadiay ti mangasaba a siaannad kadagiti ganggannaet iti agarup innem a bulan.
Sakbay la unay a pimmanawkami idiay Tehran, ti kapital ti Iran, impandak iti estasion ti polis tapno imbestigarandak. Isu a naammuak a subsubaybayandak gayam dagiti polis. Kalpasan a pinagsaludsodandak, kinontakko ni Doris ket imbagak a sipsiputandakami dagiti polis. Nagtulagkami a tapno nataltalgedkami, saanak pay laeng nga agawid ken agsinakami pay laeng iti pagyanan agingga a makapanawkami iti pagilian.
Nakabirok ni Doris iti natalged a pagyananna bayat nga ur-urayenna ti panagkitami idiay airport. Ngem kasano a makapan sadiay a saan a madmadlaw dagiti polis? Inkarkararag dayta ni Doris ken Jehova.
Idi kuan, bigla a nagtudo iti napigsa isu a nagtataray dagiti tattao nga agbirok iti paglinongan a pakairamanan dagiti polis. Awanen ti tattao kadagiti kalsada, isu a nawaya ni Doris a magna. Imbagana, “Talaga a milagro dayta a panaglayus!”
Idi pimmanawkami idiay Iran, nayakarkami iti sabali a teritoria. Nangaskasabakami kadagiti tattao nga agduduma ti tribu ken relihionda. Idi 1961, nagbisbisitakami kadagiti sirkito. Binisitami dagiti kakabsat iti nagduduma a paset ti Middle East.
Nakitak nga Agtigtignay ti Espiritu ni Jehova
Iti ministeriomi idiay Middle East, namin-ano a nakitak no kasano kabileg ti espiritu ti Dios a mamagkaykaysa kadagiti tattao. Malagipko pay laeng ti nakamaymayat a saritaanmi idi iyad-adalak iti Biblia ti dua a Palestinian a da Eddy ken Nicolas. Magusgustuanda idi ti makigimong, ngem biglada a nagsardeng nga agadal iti Biblia gapu kadagiti taktakderanda nga isyu ti politika. Inkararagko ken Jehova a tignayenna koma ti pusoda a mangawat iti kinapudno. Idi nabigbigda a solusionanto ti Dios dagiti problema, saan laeng nga idiay Palestina no di ket iti intero a lubong, intuloyda ti nagadal. (Isaias 2:4) Inikkatdan ti kinanasionalistikoda ket nagpabautisarda. Nagbalin ni Nicolas idi agangay a naregta a manangaywan iti sirkito.
Bayat ti panagbisitami iti agduduma a nasion, naparegtakami ken Doris iti kinamatalek dagiti kakabsat iti amin a kasasaad. Gapu ta nakaad-adu ti masapul nga ibturanda, inkagumaak ti mangliwliwa kadakuada bayat ti panangbisitak kas manangaywan iti sirkito. (Roma 1:11, 12) Tapno maaramidko dayta, kanayon a laglagipek a saanak a nangatngato ngem kadagiti kakabsatko. (1 Corinto 9:22) No parparegtaek dagiti kakabsat nga agkasapulan iti tulong, kanayon a mariknak ti pannakapnek.
Naidumduma ti riknam no makitam nga adu kadagiti inyadalam iti Biblia ti agmatmatalek ken Jehova. Adu a pamilia ti immakar iti sabali a nasion tapno maitarayanda dagiti panaggugubat iti nasionda. Ngem nagbalinda a bendision kadagiti teritoria nga Arabic ti pagsasaona idiay Australia, Canada, Europe, ken United States. Iti napalpalabas a tawen, dadduma kadagiti adulton nga annakda ti nagsubli idiay Middle East tapno agserbida kadagiti lugar a dakdakkel ti panagkasapulanna kadagiti natutured a manangaskasaba. Anian a nagragsak para kadakami ken Doris ti maaddaan iti nagadu a naespirituan nga annak ken appo!
Panagtalek ken Jehova iti Agnanayon
Iti intero a panagbiagmi, namin-ano a nariknami nga ay-aywanan ken idaldalannakami ni Jehova. Agyamyamanak ta tinulongannak a mangtallikud iti panangidumduma ken kinanasionalistiko nga inkakaubingak. Ti pannakasanay a naawatko kadagiti natutured ken saan a mangidumduma a kakabsat ti nangisagana kaniak a mangiranud iti kinapudno iti Biblia kadagiti tattao nga agduduma ti pulina. Bayat ti panagbisitami iti agduduma a nasion, nakaad-adu a narigat a situasion ti nakaipasanguanmi ken Doris ket no dadduma, adda pay ketdi dagiti saanmi a mapakpakadaan a mapasamak. Ngem sinuruannakami daytoy a naan-anay nga agtalek ken Jehova a Dios, saan ketdi nga iti bagimi.—Salmo 16:8.
No sublianak ti adun a dekada a panagserbik ken Jehova, maibagak a nakaad-adun ti utangko iti nailangitan nga Amak. Agpayso ti kanayon nga ibagbaga ti dungdungnguek a ni Doris, nga awan ti aniaman a mangpasardeng kadatayo a mangipaay iti naipamaysa a debosion ken Jehova uray pakatayantayo! Saankaminto pulos mauma nga agyaman ken Jehova ta impalubosna nga ipakaammomi ti mensahena iti Middle East. (Salmo 46:8, 9) Agtalekkami nga agtultuloy nga idalan ken protektaran ni Jehova ti amin nga agtaltalek kenkuana.—Isaias 26:3.