Iti nasurok a 130 a tawen, tinawen nga agkakadua dagiti Saksi ni Jehova para kadagiti kombension. Karamanen kadagiti programa ita dagiti nasurok a 40 nga agduduma a palawag, kasta met dagiti musika, interbiu, ken video. Tapno magunggonaan ken maparegta dagiti umatender iti programa, masapul a nalawag a ‘mangngeg ken makitada’ dayta. (Lucas 2:20) Kasano a maus-usar dagiti donasionyo tapno masigurado nga amin ket mabenepisiaran kadagitoy a kombension, sadinoman ti lugarda?

 Adu a moderno nga istadium ken arena kadagiti pagilian iti Laud ti addaanen iti audio/video system. Isu a no abangantayo dagiti kasta a pagkombensionan, apay a masansan nga ag-install-tayo pay laeng iti bukodtayo nga equipment? Imbaga ni David nga agtrabtrabaho iti World Headquarters Broadcasting Department: “Manmano kadagiti inabangantayo a pasilidad ti nadisenio a dagiti umatender ket dumngeg a naimbag iti programa a kaaduanna nga adda agsasao iti sango ti entablado iti nasurok nga innem nga oras. Kas pagarigan, kadagiti pakaang-angayan ti isports, kaaduanna a maus-usar ti public address system para kadagiti ababa a pakaammo ken musika. Ipabuyada kadagiti iskrin ti video dagiti iskor, adbertismen, ken replay ti ay-ayam. Ngem kayattayo a dagiti umatender ket agbuya kadagiti at-atiddog a video ken nalawag a mangngeg ken maawatanda ti tunggal ibaga ti agsasao iti entablado.”

 Agduduma ti tunggal lugar a pagkombensionan, isu a masapul a maibagay iti dayta ti audio/video system. No napilin dagiti lugar a pagkombensionan, ikeddeng ti Broadcasting Department kadagiti sanga nga opisinatayo no sadino ti pagtugawan dagiti umatender sigun iti bilang dagiti posible nga umatender ken iti bilang dagiti tattao nga umanay iti pasilidad. Kalpasanna, sigun kadagiti rukod a nakuentada, ikeddengda no sadino ti masapul a pakaipuestuan dagiti ispiker ken iskrin ti video, imapada no kasanoda nga agkokonektar, ken ilistada ti amin nga equipment a kasapulan tapno masigurado a mangngeg ken makita ti amin ti programa.

 Mas komplikado pay ti panang-install iti audio/video system kadagiti kombension a maiparang ti programa iti adu a lengguahe. No maipatarus ti programa iti sabali a lengguahe, masapul a makita ken mangngeg dayta dagiti interpreter. Kalpasanna, maibrodkas ti patarusda iti sabali a frequency ti radio tapno mangngeg dayta dagiti immatender a makaawat iti dayta a lengguahe. Gapu kadagiti espesial a media player, mabalin nga aggigiddan a mabuya ti amin nga immatender ti video, uray no maibrodkas ti audio iti walo nga agduduma a lengguahe. “Nakakomkomplikado dagitoy,” kuna ni David, “isu a masapul a masanay a naimbag dagiti boluntario nga ag-operate.”

 Adda suplay ti kaaduan a sanga nga opisina kadagiti audio/video equipment a maus-usar iti kada tawen. No kasta, iplano dagiti kakabsat ti pannakaibiahe ti tunggal paset ti equipment manipud iti maysa a kombension a maipan iti sumaruno a kombension. Iti laeng sangay iti United States, nasurok a $200,000 a ti magasgastos kada tawen tapno laeng maideliber dagiti equipment iti kombension. Uray no kasta, nalaklaka dayta ngem iti gumatang ken mangmantener kadagiti kanayonan nga equipment. Kuna ni Steven a tumultulong a mangidaulo iti audio/video iti maysa a kombension iti Canada: “Ar-aramiden ti audio/video team-mi ti amin tapno masigurado a tunggal tornilio, ruskas, kable, ken dadduma a paset ket mailista, maaywanan, naannad a mayempake, ken nakasaganan para iti sumaruno nga agkombension.”

 No agabangtayo kadagiti audio/video equipment, nakanginngina unay ken masansan a dagiti equipment ket saan a dekalidad wenno saan a nasayaat ti kondisionna. Isu a kaaduanna a gumatangtayo lattan kadagiti kasapulantayo nga equipment. Ita, ti presio ti maysa nga indoor nga LED video wall a 5x3 a metro (16x10 ft) ket agarup $24,000, ken uray ti maysa laeng a 15 a metro (50 ft) a kable ti mikropono ket agarup $20. Isu a makipagtrabtrabaho ti Broadcasting Department iti Purchasing Department tapno ‘kuentaenda ti magastos’ sakbay a gumatangda iti aniaman nga equipment. (Lucas 14:28) Kas pagarigan, isaludsodda dagitoy: Mano a tattao ti mabenepisiaran iti daytoy nga equipment? Ti kadi pananggatang iti baro nga equipment ti kasayaatan a solusion? Adda kadi nasayaat a pangidulinan iti equipment, ken adda kadi dagiti kasapulan a tools ken nasanay a boluntario a mangmantener iti dayta?

 Tapno mabayag a mausar dagiti audio/video equipment ken saan a masayang dagiti donasion, regular nga itsekmi dagiti elektroniko a paset ti equipment ken tarimaanenmi dagiti nadadael a paset ti equipment. Sakbay nga ibiahemi, ikabilmi dagita kadagiti natibker ken nalagda a pagkargaan tapno maliklikan a madadael, ken matartarimaan met dagiti pagkargaan no kasapulan.

 Agbilbilib ti adu a saan a Saksi iti kalidad ti audio/video dagiti kombensiontayo. Kas pagarigan, iti maysa a kombension, nagkomento ti empleado ti maysa kadagiti kadakkelan a broadcasting company iti intero a lubong maipapan iti kalidad ti programatayo ken ti pannakaipabuya dayta. “Nasdaaw idi naammuanna a boluntario ken saan a propesional ti amin nga adda iti audio/video team-mi,” imbaga ni Jonathan a tumultulong nga ag-install ken ag-operate kadagiti audio/video equipment kadagiti kombension. “Imbagana nga iti pagtrabtrabahuanna a kompania, lima nga aldaw nga i-install-da ti maysa ket kagudua laeng nga aldaw nga in-install-mi.” Iti sabali a kombension, imbaga ti mangimanmanehar iti pasilidad: “Adun a propesional iti musika ken video ti immay ditoy, ngem itaak pay laeng a nakakita kadagiti kastoy kapropesional ken kalaing a tattao!”

 Kasano a nagsayaatam ti audio/video system iti kombension? Mabalin a nariknam ti narikna ni David a taga-England. Imbagana: “Otsentay otsokon, ken adun a kombension ti naatenderak iti intero a panagbiagko. Ngem nalaklaka itan a makapagpokusak iti kombension. Gapu kadagiti nagpipintas a video, kasla nagpartak a malpas ti programa ken nalawlawag ken saan a putedputed ti pannakaidanon ti mensahe.” Napaliiw ni Micheal a taga-Nigeria: “Saanen a marigatan dagiti kakabsat a dumngeg iti ispiker wenno agbuya kadagiti video, isu a makapagpokusda ken ma-enjoy-da ti programa.”

 Bayat nga umatenderkayo iti “Ipakaammo ti Naimbag a Damag!” a Rehional ken Espesial a Kombension ita a tawen, mangiwayakayo iti tiempo a mangpanunot iti amin a naaramid a trabaho tapno mangngeg ken makitayo ti programa. Nakatulong dagiti donasionyo, a pakairamanan dagiti naited babaen ti donate.pr418.com, tapno agbalin a posible dayta. Agyamyamankami unay.