Kayat la unay ti Bagi a Manarawidwid nga usaren dagiti naidonar a pondo tapno maaddaantayo kadagiti pasilidad a makatulong iti trabaho a panangikasaba iti Pagarian. Kas pagarigan, bayat ti 2023 a tawen serbisio, dagiti korporasion nga us-usaren dagiti sanga nga opisina dagiti Saksi ni Jehova ket nangbusbos iti nasurok a 500 a milion a doliar tapno aggatang, agibangon, ag-renovate, ken agmantener kadagiti Kingdom Hall ken Assembly Hall iti intero a lubong. a Saan pay a karaman iti dayta ti nabusbos dagiti kongregasion iti intero a lubong a mangmantener iti Kingdom Hall-da.

 Maus-usar met dagiti naidonar a pondo nga agibangon ken mangmantener kadagiti pasilidad ti sangay, a tumultulong tapno maorganisar ken masuportaran ti trabaho a panangasaba iti intero a lubong. Napasimple dagiti trabaho iti sangay tapno mausar ti dadduma a pondo iti panagibangon ken panag-renovate kadagiti Kingdom Hall ken Assembly Hall. Ngem dakkel latta a pondo ti kasapulan tapno matarimaan, ma-renovate, wenno mayakar dagiti pasilidad ti sangay. Apay a napateg dagitoy a proyekto? Kasano a supsuportaran dagiti sangay ti napateg a trabaho iti tay-ak? Kitaentayo.

 Adu a sanga nga opisina ti nasurok a 30 wenno 40 a tawen ti kabayagdan! Inlawlawag ni Nicholas manipud iti Worldwide Design/Construction Department: “Uray no nasayaat ti pannakamantener ti patakder, dumaan ken agrakaya latta iti panaglabas ti panawen. Dagiti panag-renovate ket makatulong tapno agbayag dagiti pasdek ken agtultuloy ti pannakausarda.”

 Masapul met a maibagay dagiti pasilidad ti Bethel iti dumakdakkel a panagkasapulan ti organisasion. Iti intero a lubong, dakkel ti ngimmatuan ti bilang dagiti agibumbunannag sipud idi naibangon ti adu a sanga nga opisina. Tapno masuportaran daytoy a panagrang-ay, kasapulan ti ad-adu a boluntario nga agtrabaho kadagitoy nga opisina. Kas resultana, dagiti pasilidad a kalkalainganna idi ti kadakkelna ket nakail-ileten!

 Naikabilangan met ti kinatalged. Bayat nga umas-asidegtayo iti panungpalan daytoy maudi nga al-aldaw, maipasangotayo iti ad-adu a makapapatay a natural a didigra. (Lucas 21:11) No usarentayo dagiti kabaruan a teknik iti konstruksion bayat ti panag-renovate, agbalin a nataltalged dagiti pasilidad para kadagidiay agtrabaho sadiay. Gapu kadagitoy a panangpasayaat, mausar met dagiti kakabsat dagitoy a pasdek no adda maorganisar a panangsaranay ken tapno agtultuloy a masuportaran ti trabaho iti ministerio kalpasan ti natural a didigra.

 Babaen ti panangiwanwan ti Bagi a Manarawidwid, nairugi ti dadakkel a konstruksion iti 43 a pasilidad ti sangay bayat ti 2023 a tawen serbisio. Kaipapanan dayta nga adda maar-aramid a konstruksion iti dandani kagudua ti bilang ti amin a pasilidad ti Bethel iti intero a lubong. Kitaem ti dadduma a pagarigan a mangipakita iti pateg dagitoy a proyekto.

 Angola. Imbaga ni Matt a miembro ti Komite ti Sangay iti Angola: “Pribilehiomi a masaksian ti naisangsangayan a pannakatungpal ti padto iti Haggeo 2:7. Iti uneg laeng ti 10 a tawen, ngimmato iti 60 a porsiento ti bilang dagiti agibumbunannag! Tapno masuportaran dagiti agibumbunannag, masapul nga agtriple ti bilang ti pamilia ti Bethel. Ngem limitado laeng ti mabalinmi nga awisen nga agtrabaho ditoy ta bassit laeng ti pasilidad. Gapu iti dayta, adu a Bethelite ti masapul a mangibaklay iti adu a trabaho ken ag-overtime.”

 Adda dagiti kakabsat a nadutokan a mangadal no kasano a mapalawada ti sangay. Idi damo, napanunotda a ti kapartakan ken praktikal a solusion ket ti panang-renovate kadagiti datin a pasdek iti sangay. Ngem kalpasan ti adu a panag-research, nakitada a saan a ti panag-renovate ti kasayaatan a pangusaran iti pondo. Imbes ketdi, inrekomendada ti pananggatang ken panang-renovate iti pasdek nga adda iti asideg ti sangay. “Idi naiparang iti Komite ti Sangay ti opsion a pananggatang ken panang-renovate iti dayta a pasdek, madanagankami ta baka saan unay a maitutop dayta iti kasapulanmi no ikompara kadagiti mismo nga imbangonmi,” imbaga ni Matt. “Ngem idi nalpasen ti proyekto, nakitami a maibagay dayta iti kasapulanmi. Binendisionan ni Jehova daytoy a desision.”

 Mabalin nga agkasapulanto ti sangay iti Angola iti kanayonan nga espasio iti masanguanan. Ngem ti baro a pasdek, kasta met dagiti naaramid a temporario a pagyanan iti Bethel, ken dagiti narentaan nga apartment iti ruar ket nakatulong tapno adda pagyanan dagiti boluntario. Iti kasta, agtultuloy a masuportaran ti nagdakkel a panagrang-ay iti tay-ak.

 Japan. Dagiti kangrunaan a pasdek iti sangay ket naibangon dandani 40 a tawenen ti napalabas ken kaaduan ti saan pay a pulos na-renovate. Ikagkagumaan dagiti kakabsat a manteneren ti pasilidad, ngem uray no kasta, at-atiddogen a panawen ti pannakausar dagita a pasdek ngem iti naiplano a kapaut ti pannakausarda. Gapu iti dayta, madaman ti dakkel a trabaho a panang-renovate kadagita.

 Nagbaliw met ti biag iti Bethel iti naglabas a tawtawen. Sakbay ti 2015, maisagsagana ti amin a makan para iti pamilia ti Bethel. Isu a nadisenio a bassit laeng ti “kosina” ti adu a kuarto iti Bethel idiay Japan. Ngem ita, dagiti Bethelite ti mangisagsaganan iti kaaduan a kanenda. Isu nga idi na-renovate dagiti kuarto iti Bethel, napalawa ti kosina tapno nalaklakan a makaluto dagiti Bethelite iti kanenda. Imbaga ni Kumiko, maysa a sister nga agserserbi iti sangay iti Japan, “Mas komportableak itan iti napabaro a kosina ken mas masuportarak dagiti baro nga urnos iti Bethel.”

 Ti trabaho a maar-aramid iti sangay iti Japan ket nakapatpateg iti sangalubongan a trabaho. (Mateo 28:19, 20) Ti Japan ti maysa iti dua laeng a sangay nga agim-imprenta iti kompleto a Biblia. Isu a ti maysa a paset ti madama a proyekto iti konstruksion ket ti pannaka-install ti trimming ken dust collection system tapno nataltalged ti amin nga agtrabtrabaho iti Printery. Dandani maysa a milion a doliar ti nagasto iti pananggatang ken panang-install iti daytoy a system, ngem dayta ti makatulong iti sangay tapno agtultuloy ti pannakayimprenta ken pannakaipatulod dagiti naespirituan a taraon.

 Uray no madama ti konstruksion, sigsiguraduen dagiti kakabsat nga agtultuloy latta ti panagimprenta iti Biblia. Imbaga ni Trey a maysa a miembro ti Komite ti Sangay iti Japan: “Bayat ti konstruksion, ad-adu pay a patarus iti Biblia ti mairuruar, ken umad-adu a tattao iti intero a lubong ti agkasapulan iti Biblia. Ti panangyeskediul agpadpada iti pannaka-install ti baro nga equipment ken ti pannakayimprenta dagiti literatura ket agkasapulan iti naannad a panagtitinnulong ti adu a departamento ken ti kontraktor.” Ngem iti laksid dagita a karit, dandani 220,000 a Biblia ti mayim-imprenta kada bulan, manipud Marso agingga iti Agosto 2023—idi maar-aramid ti kadakkelan a trabaho iti konstruksion iti Printery. Naileppas amin dagita a trabaho a saan a dimmakkel ti nagasto.

 Ti maysa pay a napateg a kalat ti panag-renovate ket tapno maksayan ti magasto iti koriente. Ma-install dagiti baro a solar panel. Natantia a gapu kadagita, maksayan iti $120,000 ti magasto para iti koriente iti kada tawen. Ma-install met dagiti triple-glazed a tawa, nga ad-adda manen a mangkissay iti makonsumo a koriente, isu a maksayan manen iti agarup $10,000 ti magastotayo iti kada tawen. Uray no dumakkel ti magasto iti panag-renovate gapu kadagita, natantia a nasurok a 3.5 a milion a doliar ti maikissay iti magastotayo bayat ti manamnama a kapaut ti pannakausar dagita a panel ken tawa. Maksayan met dagiti madi nga epekto dagiti pasdek iti aglawlaw.

 Ipakita dagiti proyekto iti dua a sangay nga adu a trabaho ti maar-aramid tapno masigurado a dagiti pasilidad iti Bethel masuportaranda dagiti kasapulan iti tay-ak. Ngem saan pay a nalpas ti trabaho. “Adu ti naaramiden, ngem adu pay ti masapul a maileppas,” imbaga ni Aaron manipud iti Worldwide Design/Construction Department. Kasano a maaramid daytoy a trabaho? Intuloyna: “Malaksid kadagiti donasion a makatulong tapno adda pangpondo kadagitoy a napateg a proyekto, apresiarenmi met ti kinatulok ti amin a nagboluntario iti napalabas ken dagidiay mangbalbaliw iti kasasaadda tapno makapagboluntarioda iti masanguanan. Ti pisikal ken pinansial a suporta dagiti kakabsat ket dakkel a pammaneknek iti pamendision ni Jehova.”—Salmo 110:3.

 Amin a trabaho a panagibangon ken panag-renovate ket supsuportaran dagiti boluntario a donasion, nga adu kadagita ti naaramid babaen ti donate.pr418.com. Pagyamanan unay iti agtultuloy a kinaparaburyo.