Kada bulan, magagarantayo a mangpadaan kadagiti naespirituan a programa ken video a mairuar iti JW Broadcasting. Ngem adu a kakabsattayo idiay Africa ti saan a makabuya kadagitoy a programa iti Internet. Apay?

 Adu a lugar iti Africa ti awanan iti Internet. Ken kadagiti lugar nga addaan iti Internet, masansan a nabuntog wenno nakanginngina dayta. Kas pagarigan, nag-download ti maysa a manangaywan iti sirkito idiay Madagascar iti maysa a programa ti binulan a JW Broadcasting iti Internet café. Nasingir iti nasurok a ₱700 ($16) a gagangay a dakdakkel pay ngem iti masapulan ti dadduma a tattao iti makalawas! a

 Adda man dagita a problema iti Africa, minilion itan ti makabuya iti JW Broadcasting uray awan ti Internet. Kasano?

 Nangrugi idi 2017, mabuyan dagiti aggigian iti sub-Saharan Africa ti JW Broadcasting babaen ti maysa a satellite-television channel. Libre a mabuya daytoy a channel iti uneg ti 24 nga oras iti maysa nga aldaw, 7 nga aldaw iti makalawas, iti 16 a lengguahe.

 Tapno maaramid dayta, nangbayad dagiti Saksi ni Jehova iti maysa a channel ti telebision tapno maipabuya dagiti programa babaen ti satellite. Agarup 35 a pagilian iti sub-Saharan Africa ti masakupan ti maus-usar a satellite. Nasurok a ₱580,000 (nasurok a $12,000) ti binulan a mabayadan. No dadduma, sabali pay dagiti mabayadan tapno maibrodkas dagiti live a programa iti sabali a channel. Gapu iti dayta, rinibu ti makabuya kadagiti kombension wenno espesial a programa bayat ti pannakabisita ti sangay.

 Adu a tattao ti makabuya iti JW satellite channel iti telebision iti pagtaenganda uray dagiti saan a Saksi. Ngem adu a kakabsattayo ti saan a makabuya iti daytoy a satellite channel gapu ta awan ti igatangda iti usarenda nga agbuya. Tapno matulongan dagiti kakabsat, nasurok a 3,670 a Kingdom Hall ti naikkan iti antena tapno mabuyada sadiay ti JW Broadcasting. Aggatad dayta iti nasurok a ₱3,000 ($70) agraman ti pannakaideliberna no addaanen ti Kingdom Hall iti telebision wenno projector. Ngem no awan, umabut agingga iti nasurok a ₱25,000 ($530) ti magastos para kadagiti kasapulan nga equipment.

 Agyamyaman unay dagiti kakabsattayo gapu iti channel. Kinuna ti maysa a panglakayen a taga-Cameroon: “Kasla manna dayta iti tengnga ti desierto a para iti pamiliami.” Kinuna ti maysa a brother a taga-Nigeria a ni Odebode: “Iti kada lawas, mamitlokami nga agbuya a sangapamiliaan iti dayta a channel. Kanayon a padpadaanan dagiti ubbingmi ti panagbuyami. Ken no dadduma, ibagada pay ketdi nga iyakarmi ti channel ti buybuyaenmi iti JW channel.” Kinuna met ni Rose a taga-Nigeria: “Maragsakanak a mangibaga a ti JW satellite channel ti buybuyaekon imbes a kanayon nga agbuyaak iti news. No agbuybuyaak iti news, nalaka Ia a masuronak kadagiti mabuybuyak ken ngumato pay ketdi ti presion ti darak. Ngem no agbuybuyaak iti JW Broadcasting, maparparegtaak ken kalmadoak! Daytoyen ti paboritok a channel. Nagdakkel a bendision manipud ken Jehova.”

 Impadamag ti maysa a manangaywan iti sirkito idiay Mozambique a naikkan dagiti Kingdom Hall iti sirkitona kadagiti kasapulan nga equipment tapno mabuyada ti channel. Maysa nga oras wenno nasapsapa pay a sumangpet dagiti kakabsat kadagitoy a kongregasion sakbay ti gimong tapno agbuyada iti JW Broadcasting babaen ti satellite.

 Para iti 2019 nga internasional a kombension idiay Johannesburg, South Africa, nausar ti channel tapno maipabuya iti siam a dadduma pay a lokasion dagiti kangrunaan a palawag, agraman ti palawag ti miembro ti Bagi a Manarawidwid. Imbaga ni Sphumelele, nga agtrabtrabaho iti local Broadcasting Department iti sangay iti South Africa: “Dati, maipadalan iti Internet dagiti maipabuya a palawag. Ngem kasapulan a napigsa ti Internet ken bayadan ti data. Nalaklaka ken napimpintas ti koneksion ti JW satellite channel.”

 Gapu kadagiti nabuslon a donasionyo para iti sangalubongan a trabaho, mabuyan ti adu a kakabsattayo idiay Africa ti JW Broadcasting babaen ti satellite. Agyamyamankami unay kadagiti donasionyo nga impaayyo babaen kadagiti nadumaduma a pamay-an ti panagdonar nga adda iti donate.pr418.com.