“Iti napalabas, kasla imposible a maaddaantayo iti naespirituan a taraon iti elektroniko a format.” Kasta met kadi idi ti riknam? Imbaga dayta ni Geoffrey Jackson iti 2020 Update Manipud iti Bagi a Manarawidwid #6. Intuloyna: “Ngem ita ta pandemia, mabalin a mapampanunottayo, kasano laengen no awan dagiti tools a kas iti JW Library? Nabayagen nga isagsagananatayo ni Jehova para iti kasasaad a kas iti daytoy.”

 Kasanonatayo nga insagana ni Jehova? Kasano a naaramid ti JW Library app, ken kasano a maap-update ken mapaspasayaat dayta?

 Idi Mayo 2013, indawat ti Bagi a Manarawidwid iti MEPS Programming, a maysa a departamento iti world headquarters, a mangaramidda iti app a pakaikabilan ti rebisado a New World Translation. “Sakbay dayta, awan pay ti in-release-mi a mobile app iti aniaman nga app store,” imbaga ni Paul Willies, nga agtrabtrabaho iti MEPS Programming. “Isu a nangbukelkami iti maysa a team, insardengmi ti dadduma a proyekto, ken nakipagtrabahokami iti dadduma a departamento a mang-design ken mangbukel iti app ken dagiti linaonna. Kanayon a nagkarkararagkami, ket iti tulong ni Jehova, kalpasan laeng ti lima a bulan nai-release ti app iti tinawen a miting!”

 Ti simmaruno a narigat a paset ti trabahomi ket no kasanomi a pagbalinen ti app a kasla iti agpaypayso a library a makargaan iti ad-adu a publikasion ken maluktan iti ad-adu a lengguahe. Idi Enero 2015, kaaduan a publikasion iti Ingles ket available-en iti app, ken kalpasan laeng ti innem a bulan, mai-download-en dagita a publikasion iti ginasut a lengguahe.

 Manipud idin, adun ti simmayaatan ti app. Addan dagiti video, napagtitipon ti amin a publikasion ken media a mausar kadagiti gimong iti maymaysa a tab, ken direktan a ma-access kadagiti bersikulo ti Biblia dagiti reperensia nga adda iti Giya iti Panagsukimat.

 Iti inaldaw, malukluktan ti JW Library kadagiti 8 a milion a gadyet ken iti nasurok a 15 a milion a gadyet iti kada bulan! Ania ti kasapulan tapno nasayaat ti panagandar dayta nga app kadagita a gadyet? Imbaga ni Brother Willies: “Agtultuloy a maap-update ti mobile app isu a saantay a maibaga a nalpas daytan. Kanayon nga adda dagiti baro a feature nga inayonmi tapno ad-adu ti maaramid iti app ken nalaklaka nga usaren. Gapu ta kanayon a maap-update dagiti operating system dagiti gadyet, masapul a kanayon met a ma-update ti app tapno makagiddan kadagita a system. Masapul met a ma-maintain ken ma-upgrade dagiti internal software-tayo ta umad-adu nga umad-adu dagiti publikasion ken recording-tayo iti JW Library.” Iti amin a lengguahe iti app, addan 200,000 a publikasion ken nasurok a 600,000 nga audio ken video recording nga available iti JW Library!

 Tapno agtultuloy a maaramid dayta, saan la a computer hardware ti kasapulan. Masapul met a gumatangtayo kadagiti software license. Ti presio ti maysa laeng a license ket umabut iti $1,500 (wenno, nasurok a ₱75,000) kada tawen. Sabali pay ti magasgastos para iti MEPS Programming. Tinawen a sumurok-kumurang a $10,000 (wenno, nasurok a ₱500,000) ti magasgastos para kadagiti gadyet manipud iti nagduduma a manufacturer tapno sigurado a nasayaat ti panagtaray ti app kadagiti baro a kompiuter, tablet, ken selpon.

 Gapu iti JW Library, dakkel a pondo ti naikkat para iti printing, binding, ken pannakaipatulod dagiti literaturatayo. Alaentayo a pagarigan ti bokleta a Panangsukimat iti Kasuratan iti Inaldaw. Idi 2013, dandani 12 milion a kopia ti inyimprentatayo. Ngem idi 2020, ag-lima a milion a bokleta laeng ti inyimprentatayo—uray no ngimmato ti bilang dagiti agibumbunannag iti sumurok-kumurang a 700,000 iti intero a lubong. Apay a dakkel ti bimmabaanna? Gapu ta basbasaenen ti adu a kakabsat ti pagtekstuan iti JW Library. a

 Nakaad-adu ti maitultulong ti JW Library. Nakita ni Geneviève, a taga-Canada, a nagbalin a regular ti panagadalna iti Biblia gapu iti app. Inaminna, “No masapul pay nga alaek amin a libro sakbay nga agadalak, siguro saanak a makainaldaw nga agadal. Ngem gapu iti app nga adda iti tablet-ko, adda amin ditan ti kasapulak nga agadal. Nakatulong kaniak ti regular a panagadalko tapno tumibker ti pammatik ken espiritualidadko.”

 Nakadakdakkel a tulong ti app bayat ti COVID-19 pandemic. Kuna ni Charlyn, a taga-United States: “Idi nagwaras ti COVID-19 iti intero a lubong, nasurok a makatawenen a saanak a nakakita iti baro a nayimprenta a publikasiontayo. Ngem gapu iti JW Library, kompleto latta dagiti kasapulantayo iti naespirituan, ket agyamyamanak ken Jehova iti ayatna a nangipaay kadagitoy.”

 Adu ti makarikrikna iti kas iti marikrikna ni Faye, a taga-Pilipinas. Imbagana: “Maysa la nga app ti kasapulak tapno agtultuloy a nadekket ti relasionko ken Jehova. Dayta ti umuna a basaek kada bigat. Dayta ti dengdenggek no agtrabtrabahoak iti balay. Dayta ti us-usarek no agadalak para iti gimong. Dayta ti us-usarek no agsaganaak nga ag-Bible study. No free time-ko, agbuybuyaak dita kadagiti video. No agur-urayak, agbasaak dita kadagiti artikulo wenno ti Biblia. Nakadakdakkel a tulong.”

 Nagdakkel met laeng a tulong dayta nga app iti ministerio. Kas pagarigan, bayat a mangaskasaba, kayat nga usaren ti maysa a sister idiay Cameroon ti teksto nga inusar ti sabali a sister mano a lawas ti napalabasen. Ngem saanna a malagip no ania dayta a teksto. Kunana: “Imbag laengen ta adda sasao a malagipko. Linuktak ti app, napanak iti Biblia, sa in-search-ko dagita a sasao. Nabirokak a dagus ti teksto. Iti tulong ti app, mabirbirokak dagiti maliplipatak a teksto.”

 Gapu kadagiti donasionyo babaen kadagiti pamay-an a naibaga iti donate.pr418.com nakaaramid, maap-update, ken mapaspasayaattayo ti JW Library app para kadagiti kakabsat iti intero a lubong. Agyamankami iti kinaparaburyo.

1. Oktubre 2013—Nairuar ti app a naglaon iti rebisado a New World Translation

2. Enero 2015—Available-en ti dadduma a publikasion iti Ingles, sa sinaruno ti ginasut a dadduma pay a lengguahe

3. Nobiembre 2015—Addan ti feature-na a highlight

4. Mayo 2016—Nainayon ti tab a Meetings

5. Mayo 2017—Mabalinen ti agikabil iti note

6. Disiembre 2017—Nainayon ti Study Bible

7. Marso 2019—Mabalinen nga i-download ti audio recording, ag-stream iti video, ken mabalinen a ma-access dagiti reperensia iti Giya iti Panagsukimat

8. Enero 2021—Naikabil dagiti kanayonan a feature ti Agbiagka a Naragsak iti Agnanayon!